ഡോ. അബ്ദുൽ മുഹ്സിൻ ബിൻ മുഹമ്മദ് അൽ-ഖാസിം
മനഃപാഠമാക്കുന്നതുമായി ബന്ധപ്പെട്ട അടിസ്ഥാന തത്വങ്ങളും നിയമങ്ങളും
ഒരൊറ്റ അച്ചടിയിലുള്ള (പ്രിന്റ്) മുസ്ഹഫിൽ നിന്ന് വേണം ഒരാൾ ഖുർആൻ മനഃപാഠമാക്കാൻ. ഇത് മനഃപാഠം ദൃഢമാക്കാൻ സഹായിക്കുകയും, വചനങ്ങളുടെ സ്ഥാനം (അതായത് പേജിൽ അവ എവിടെയാണെന്നത്), അതുപോലെ തന്നെ പേജുകളുടെ തുടക്കവും ഒടുക്കവും പെട്ടെന്ന് ഓർത്തെടുക്കാൻ അയാൾക്ക് എളുപ്പമാക്കുകയും ചെയ്യുന്നു.
നിങ്ങളുടെ പാരായണം ശരിയാക്കുന്നതിനായി ഒരു ശൈഖിന്റെ (യോഗ്യതയുള്ള ഖുർആൻ അദ്ധ്യാപകൻ) അടുക്കൽ വെച്ചുതന്നെ നിങ്ങൾ ഖുർആൻ മനഃപാഠമാക്കേണ്ടതുണ്ട്. എല്ലാ ദിവസവും മനഃപാഠമാക്കുക; ദിനങ്ങൾ ഒഴിവാക്കുന്നത് ഒരാളുടെ താല്പര്യത്തെയും മനഃപാഠത്തെയും ദുർബ്ബലപ്പെടുത്തും. മനഃപാഠത്തിന്റെ അടിസ്ഥാനം ആവർത്തനമാണ്; ഒരാൾ എത്രത്തോളം ആവർത്തിക്കുന്നുവോ അത്രത്തോളം മനഃപാഠം നൈപുണ്യമുള്ളതായിത്തീരും.
മനഃപാഠമാക്കാൻ ആരംഭിക്കേണ്ടത് സൂറത്തുൽ നാസ് മുതൽ സൂറത്തുൽ ബഖറ വരെയുള്ള ക്രമത്തിലായിരിക്കണം, കാരണം അതാണ് എളുപ്പമുള്ളത്. ഖുർആൻ പൂർണ്ണമായും മനഃപാഠമാക്കി കഴിഞ്ഞാൽ, നിങ്ങൾ സൂറത്തുൽ ബഖറ മുതൽ സൂറത്തുൽ നാസ് എന്ന ക്രമത്തിൽ വേണം ആവർത്തിച്ചുറപ്പിക്കാൻ (മുറാജഅത്ത് ചെയ്യാൻ). മനഃപാഠമാക്കുന്നതിനും ആവർത്തിച്ചുറപ്പിക്കുന്നതിനും ഒരേസമയം നിങ്ങൾക്ക് വേണ്ടത്ര സമയമില്ലെങ്കിൽ, ആവർത്തിച്ചുറപ്പിക്കുന്നതിന് (മുറാജഅത്തിന്) മുൻഗണന നൽകുക. മുൻപുള്ള പേജ് യാതൊരു പിഴവുകളോ തപ്പലോ ഇല്ലാതെ പൂർണ്ണമായി ശരിയാക്കുന്നത് വരെ പുതിയൊരു പേജ് മനഃപാഠമാക്കുന്നതിലേക്ക് നിങ്ങൾ കടക്കരുത്.
ഖുർആൻ മനഃപാഠമാക്കുന്ന ഏതൊരാൾക്കും ആദ്യത്തെ രണ്ട് വർഷങ്ങൾക്കുള്ളിൽ തങ്ങൾ മനഃപാഠമാക്കിയതിൽ നിന്ന് ചിലതൊക്കെ നഷ്ടപ്പെടുന്നതാണ്. ഇതിനെ ‘ശേഖരണ ഘട്ടം’ എന്ന് വിളിക്കുന്നു. നിങ്ങളുടെ മനഃപാഠം നഷ്ടപ്പെടുകയോ നിങ്ങൾക്ക് നിരവധി പിഴവുകൾ സംഭവിക്കുകയോ ചെയ്താൽ നിങ്ങൾ ദുഃഖിക്കരുത്; കാരണം പ്രയാസകരമായ ഈ ഘട്ടം ഒരു പരീക്ഷണമാണ്. ഖുർആൻ മനഃപാഠമാക്കുന്നതിൽ നിന്നും ആവർത്തിച്ചുറപ്പിക്കുന്നതിൽ നിന്നും നിങ്ങളെ പിന്തിരിപ്പിക്കാൻ പിശാച് അതിൽ ഒരു പങ്ക് വഹിക്കുന്നുണ്ട്. അതിനാൽ അവന്റെ ദുർബോധനങ്ങളെ പിന്നിലാക്കി ഖുർആൻ മനഃപാഠമാക്കുന്നത് തുടരുക. ഓർക്കുക, ആർക്കും അത്രപെട്ടെന്ന് നൽകപ്പെടാത്ത ഒരു നിധിയാണത്.
പ്രതിദിനം മനഃപാഠമാക്കേണ്ടതിന്റെ അളവ്
എല്ലാ ദിവസവും ഒരു പേജ് വീതം മനഃപാഠമാക്കുക. നിങ്ങളുടെ മനഃപാഠം ശക്തമാണെങ്കിൽ, നിങ്ങൾക്ക് ഒരു പേജിൽ കൂടുതൽ മനഃപാഠമാക്കാം. എന്നാൽ കൃത്യതയില്ലാതെ മനഃപാഠമാക്കുന്ന അളവ് വർദ്ധിപ്പിക്കുകയാണെങ്കിൽ, നിങ്ങൾ മനഃപാഠമാക്കിയത് ദുർബ്ബലമായിരിക്കും. എല്ലാ ദിവസവും ഒരു പേജ് മനഃപാഠമാക്കാൻ നിങ്ങൾക്ക് കഴിയുന്നില്ലെങ്കിൽ, നിങ്ങൾക്ക് കഴിയുന്നത്ര മനഃപാഠമാക്കുക.
അമിതമായി മനഃപാഠമാക്കുന്നത് ഒഴിവാക്കാനായി ഒരു ദിവസം രണ്ട് പേജിൽ കൂടുതൽ മനഃപാഠമാക്കരുത്. അല്ലാത്തപക്ഷം നിങ്ങൾ മനഃപാഠമാക്കിയത് നിങ്ങൾ മറന്നുപോകും; കാരണം വേഗത്തിൽ മനഃപാഠമാക്കുന്നവൻ വേഗത്തിൽ മറന്നുപോകുന്നു.
ഖുർആൻ മനഃപാഠമാക്കാനുള്ള മാർഗ്ഗം
മഹത്തായ ഖുർആൻ മനഃപാഠമാക്കാൻ നിരവധി മാർഗ്ഗങ്ങളുണ്ട്. വേഗത്തിലും സുദൃഢമായും ഖുർആൻ മനഃപാഠമാക്കാൻ കഴിയുന്ന സവിശേഷമായ ഒരു മാർഗ്ഗം ഞാൻ താഴെ വിശദീകരിക്കാം.
ഇവിടെ, സൂറത്തുൽ ജുമുഅയിലെ ഒരു പേജ് ഉദാഹരണമായി എടുത്തുകൊണ്ട് ഈ മാർഗ്ഗം കാണിച്ചിരിക്കുന്നു:
നിങ്ങളുടെ പാരായണം പൂർണ്ണമായി ശരിയാകുന്നതുവരെ ഒരു അദ്ധ്യാപകന് മുൻപിൽ ശരിയായ പാരായണ നിയമങ്ങളോടെ പേജ് പൂർണ്ണമായും (മുസ്ഹഫിൽ നിന്ന് നോക്കി) പാരായണം ചെയ്യുക.
ശേഷം, മനഃപാഠമാക്കുന്നതിനായി, പേജിനെ രണ്ട് ഭാഗങ്ങളായി തിരിക്കുക.
- ഒന്നാം ഭാഗം: താഴെ പറയുന്ന മാർഗ്ഗം ഉപയോഗിച്ച് പേജിന്റെ ആദ്യ പകുതി മനഃപാഠമാക്കുക:
1 – ഒന്നാമത്തെ വചനം കാണാതെ പാരായണം ചെയ്യുക (20 തവണ).
يُسَبِّحُ لِلَّهِ مَا فِي السَّمَاوَاتِ وَمَا فِي الْأَرْضِ الْمَلِكِ الْقُدُّوسِ الْعَزِيزِ الْحَكِيمِ
ആകാശങ്ങളിലുള്ളതും ഭൂമിയിലുള്ളതുമെല്ലാം അല്ലാഹുവെ പ്രകീർത്തിക്കുന്നു. രാജാവായ, പരമപരിശുദ്ധനായ, പ്രതാപവാനായ, യുക്തിമാനായിട്ടുള്ളവനെ.
2 – രണ്ടാമത്തെ വചനം കാണാതെ പാരായണം ചെയ്യുക (20 തവണ).
هُوَ الَّذِي بَعَثَ فِي الْأُمِّيِّينَ رَسُولًا مِّنْهُمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِن كَانُوا مِن قَبْلُ لَفِي ضَلَالٍ مُّبِينٍ
അക്ഷരജ്ഞാനമില്ലാത്തവരില് അവരില് നിന്നുതന്നെയുള്ള ഒരു ദൂതനെ (മുഹമ്മദ് നബിയെ) നിയോഗിച്ചവനാണവന്. അവര്ക്ക് അവന്റെ വചനങ്ങള് വായിച്ചുകേള്പിക്കുകയും, അവരെ (അവിശ്വാസത്തിന്റെയും ബഹുദൈവാരാധനയുടെയും മാലിന്യത്തിൽ നിന്ന്) സംസ്കരിക്കുകയും, അവര്ക്ക് ഗ്രന്ഥവും (ഖുർആനും ഇസ്ലാമിക നിയമങ്ങളും) ഹിക്മത്തും (നബിയുടെ സുന്നത്തും) പഠിപ്പിക്കുകയും ചെയ്യാന്. തീര്ച്ചയായും അവര് മുമ്പ് വ്യക്തമായ വഴികേടിലായിരുന്നു.
3 – രണ്ട് വചനങ്ങളെയും തമ്മിൽ ബന്ധിപ്പിക്കുന്നതിനായി ഒന്നാമത്തെ വചനം രണ്ടാമത്തെ വചനത്തോടൊപ്പം ചേർത്ത് കാണാതെ പാരായണം ചെയ്യുക (10 തവണ).
4 – മൂന്നാമത്തെ വചനം കാണാതെ പാരായണം ചെയ്യുക (20 തവണ).
وَآخَرِينَ مِنْهُمْ لَمَّا يَلْحَقُوا بِهِمْ وَهُوَ الْعَزِيزُ الْحَكِيمُ
അവരില് പെട്ട മറ്റുചിലരിലേക്കും (മുസ്ലിംകളിലേക്ക്, അദ്ദേഹത്തെ നിയോഗിച്ചിരിക്കുന്നു). അവർ ഇതുവരെയും അവരോട് വന്നുചേര്ന്നിട്ടില്ല (എന്നാൽ അവർ വരാനിരിക്കുന്നതേയുള്ളൂ). അവന് (അല്ലാഹു) പ്രതാപവാനും യുക്തിമാനുമാകുന്നു.
5 – രണ്ട് വചനങ്ങളെയും തമ്മിൽ ബന്ധിപ്പിക്കുന്നതിനായി രണ്ടാമത്തെ വചനം മൂന്നാമത്തെ വചനത്തോടൊപ്പം ചേർത്ത് കാണാതെ പാരായണം ചെയ്യുക (10 തവണ).
6 – നാലാമത്തെ വചനം കാണാതെ പാരായണം ചെയ്യുക (20 തവണ).
ذَلِكَ فَضْلُ اللَّهِ يُؤْتِيهِ مَن يَشَاءُ وَاللَّهُ ذُو الْفَضْلِ الْعَظِيمِ
അത് അല്ലാഹുവിന്റെ അനുഗ്രഹമാകുന്നു. അവന് ഉദ്ദേശിക്കുന്നവര്ക്ക് അവനത് നല്കുന്നു. അല്ലാഹു മഹത്തായ അനുഗ്രഹമുള്ളവനാകുന്നു.
7 – രണ്ട് വചനങ്ങളെയും തമ്മിൽ ബന്ധിപ്പിക്കുന്നതിനായി മൂന്നാമത്തെ വചനം നാലാമത്തെ വചനത്തോടൊപ്പം ചേർത്ത് കാണാതെ പാരായണം ചെയ്യുക (10 തവണ).
8 – എല്ലാ വചനങ്ങളെയും തമ്മിൽ ബന്ധിപ്പിക്കുന്നതിനായി ഈ നാല് വചനങ്ങളും തുടക്കം മുതൽ ഒടുക്കം വരെ കാണാതെ പാരായണം ചെയ്യുക (10 തവണ).
- രണ്ടാം ഭാഗം: പേജിന്റെ രണ്ടാം പകുതിയിലേക്ക് കടക്കുക, താഴെ പറയുന്ന മാർഗ്ഗം ഉപയോഗിച്ച് മനഃപാഠമാക്കുന്നത് തുടരുക.
1 – അഞ്ചാമത്തെ വചനം കാണാതെ പാരായണം ചെയ്യുക (20 തവണ).
مَثَلُ الَّذِينَ حُمِّلُوا التَّوْرَاةَ ثُمَّ لَمْ يَحْمِلُوهَا كَمَثَلِ الْحِمَارِ يَحْمِلُ أَسْفَارًا بِئْسَ مَثَلُ الْقَوْمِ الَّذِينَ كَذَّبُوا بِآيَاتِ اللَّهِ وَاللَّهُ لَا يَهْدِي الْقَوْمَ الظَّالِمِينَ
തൗറാത്ത് ചുമതലപ്പെടുത്തപ്പെടുകയും (അതിലെ കല്പനകൾ അനുസരിക്കാനും നിയമങ്ങൾ പാലിക്കാനുമുള്ള ബാധ്യത), എന്നിട്ടത് പേറാതിരിക്കുകയും (ആ ബാധ്യതകളിൽ അവർ പരാജയപ്പെടുകയും) ചെയ്തവരുടെ ഉദാഹരണം വലിയ ഗ്രന്ഥങ്ങൾ ചുമക്കുന്ന കഴുതയുടേത് (അതിൽ നിന്ന് യാതൊന്നും മനസ്സിലാക്കാത്ത കഴുതയുടേത്) പോലെയാകുന്നു. അല്ലാഹുവിന്റെ വചനങ്ങളെ നിഷേധിച്ചുതള്ളിയ ജനങ്ങളുടെ ഉദാഹരണം എത്രയോ ചീത്ത! അക്രമികളായ ജനങ്ങളെ അല്ലാഹു നേര്വഴിയിലാക്കുകയില്ല.
2 – രണ്ട് വചനങ്ങളെയും തമ്മിൽ ബന്ധിപ്പിക്കുന്നതിനായി നാലാമത്തെ വചനം അഞ്ചാമത്തെ വചനത്തോടൊപ്പം ചേർത്ത് കാണാതെ പാരായണം ചെയ്യുക (10 തവണ).
3 – ആറാമത്തെ വചനം കാണാതെ പാരായണം ചെയ്യുക (20 തവണ).
قُلْ يَا أَيُّهَا الَّذِينَ هَادُوا إِن زَعَمْتُمْ أَنَّكُمْ أَوْلِيَاءُ لِلَّهِ مِن دُونِ النَّاسِ فَتَمَنَّوُا الْمَوْتَ إِن كُنتُمْ صَادِقِينَ
പറയുക (ഓ മുഹമ്മദ്): ഹേ; യഹൂദരായുള്ളവരേ, മറ്റു മനുഷ്യരെ കൂടാതെ നിങ്ങള് മാത്രം അല്ലാഹുവിന്റെ മിത്രങ്ങളാണെന്ന് നിങ്ങള് വാദിക്കുകയാണെങ്കില് നിങ്ങള് മരണത്തെ കൊതിക്കുക. നിങ്ങള് സത്യവാന്മാരാണെങ്കില്.
4 – രണ്ട് വചനങ്ങളെയും തമ്മിൽ ബന്ധിപ്പിക്കുന്നതിനായി അഞ്ചാമത്തെ വചനം ആറാമത്തെ വചനത്തോടൊപ്പം ചേർത്ത് കാണാതെ പാരായണം ചെയ്യുക (10 തവണ).
5 – ഏഴാമത്തെ വചനം കാണാതെ പാരായണം ചെയ്യുക (20 തവണ).
وَلَا يَتَمَنَّوْنَهُ أَبَدًا بِمَا قَدَّمَتْ أَيْدِيهِمْ وَاللَّهُ عَلِيمٌ بِالظَّالِمِينَ
അവരുടെ കൈകള് മുന്കൂട്ടി ചെയ്തുവെച്ച കര്മ്മങ്ങള് കാരണമായി അവരൊരിക്കലും അത് (മരണത്തെ) കൊതിക്കുകയില്ല. അല്ലാഹു അക്രമികളെപ്പറ്റി നന്നായി അറിവുള്ളവനാകുന്നു.
6 – രണ്ട് വചനങ്ങളെയും തമ്മിൽ ബന്ധിപ്പിക്കുന്നതിനായി ആറാമത്തെ വചനം ഏഴാമത്തെ വചനത്തോടൊപ്പം ചേർത്ത് കാണാതെ പാരായണം ചെയ്യുക (10 തവണ).
7 – എട്ടാമത്തെ വചനം കാണാതെ പാരായണം ചെയ്യുക (20 തവണ).
قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ ثُمَّ تُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُم بِمَا كُنتُمْ تَعْمَلُونَ
പറയുക: തീര്ച്ചയായും ഏതൊരു മരണത്തില് നിന്ന് നിങ്ങള് ഓടിയകലുന്നുവോ അത് തീര്ച്ചയായും നിങ്ങളുമായി കണ്ടുമുട്ടുന്നതാണ്. പിന്നീട് അദൃശ്യവും ദൃശ്യവും അറിയുന്നവന്റെ (അല്ലാഹുവിന്റെ) അടുത്തേക്ക് നിങ്ങള് മടക്കപ്പെടുകയും ചെയ്യും. അപ്പോള് നിങ്ങള് പ്രവര്ത്തിച്ചുകൊണ്ടിരിക്കുന്നതിനെപ്പറ്റി അവന് നിങ്ങളെ വിവരമറിയിക്കുന്നതാണ്.
8 – രണ്ട് വചനങ്ങളെയും തമ്മിൽ ബന്ധിപ്പിക്കുന്നതിനായി ഏഴാമത്തെ വചനം എട്ടാമത്തെ വചനത്തോടൊപ്പം ചേർത്ത് കാണാതെ പാരായണം ചെയ്യുക (10 തവണ).
9 – വചനങ്ങളെ തമ്മിൽ ബന്ധിപ്പിക്കുന്നതിനായി അഞ്ചാമത്തെ വചനം മുതൽ എട്ടാമത്തെ വചനം വരെ കാണാതെ പാരായണം ചെയ്യുക (10 തവണ).
10 – ഈ പേജ് പൂർണ്ണമായി ശരിയാക്കുന്നതിനായി പേജ് മുഴുവനായും കാണാതെ പാരായണം ചെയ്യുക (10 തവണ).
ശ്രദ്ധിക്കുക: പൂർണ്ണമായ വചനം ഒറ്റയടിക്ക് തന്നെ മനഃപാഠമാക്കണമെന്ന് നിഷ്കർഷിക്കരുത്; ചില വചനങ്ങൾ ദീർഘമേറിയതോ വളരെ ചെറിയതോ ആകാം, മറിച്ച് ഒന്നോ രണ്ടോ വരികൾ വീതം മനഃപാഠമാക്കുക. ഓരോ വചനവും ഒന്നോ രണ്ടോ വരികൾക്ക് തുല്യമായതിനാലാണ് ഉദാഹരണമായി നാം സൂറത്തുൽ ജുമുഅയിലെ വചനങ്ങൾ ഉപയോഗിച്ചത്.
പുതുതായി മനഃപാഠമാക്കിയവ ആവർത്തിച്ചുറപ്പിക്കാനുള്ള (മുറാജഅത്ത്) മാർഗ്ഗം
പുതിയ പാഠം (അതായത് പുതിയ വചനങ്ങൾ) മനഃപാഠമാക്കാൻ തുടങ്ങുന്നതിന് മുൻപായി, താഴെ പറയുന്നവ ചെയ്യുക:
1 – പുതിയ പാഠത്തിന് മുൻപായി കഴിഞ്ഞ അഞ്ച് ദിവസങ്ങളിൽ നിങ്ങൾ മനഃപാഠമാക്കിയവ കാണാതെ ആവർത്തിച്ചുറപ്പിക്കുക (മുറാജഅത്ത് ചെയ്യുക).
2 – അതിനുശേഷം, നേരത്തെ വിശദീകരിച്ച മാർഗ്ഗം ഉപയോഗിച്ച് പുതിയ പാഠം മനഃപാഠമാക്കാൻ ആരംഭിക്കുക.
മനഃപാഠമാക്കുന്നതും ആവർത്തിച്ചുറപ്പിക്കുന്നതും ഒരുമിച്ച് കൊണ്ടുപോകൽ
ആവർത്തിച്ചുറപ്പിക്കലിലൂടെയല്ലാതെ (മുറാജഅത്ത്) മനഃപാഠം സുദൃഢമാവുകയില്ല. ഇബ്നുൽ ജൗസി (رَحِمَهُ اللَّهُ) പറഞ്ഞു: “(മുറാജഅത്തിലെ) നിരന്തരമായ തുടർച്ച എന്നത് മഹത്തായ ഒരു അടിസ്ഥാനമാകുന്നു. എത്രയെത്ര ആളുകളാണ് തങ്ങൾ മനഃപാഠമാക്കിയത് ആവർത്തിച്ചുറപ്പിക്കുന്നത് ഉപേക്ഷിച്ചു കളഞ്ഞത്; തൽഫലമായി, താൻ ഒരിക്കൽ മനഃപാഠമാക്കുകയും പിന്നീട് മറന്നുപോവുകയും ചെയ്തവ തിരികെ ലഭിക്കുന്നതിനായി അവർക്ക് വലിയൊരു സമയം ചിലവഴിക്കേണ്ടി വന്നിരിക്കുന്നു.”1
വിശുദ്ധ ഖുർആൻ പൂർണ്ണമായി മനഃപാഠമാക്കുകയും എന്നാൽ അത് ആവർത്തിച്ചുറപ്പിക്കാതിരിക്കുകയും ചെയ്യുന്ന ഏതൊരാളും, പിന്നീട് താൻ മുമ്പ് മനഃപാഠമാക്കിയതിലേക്ക് തിരികെ വരുമ്പോൾ, താൻ അത് മറന്നുപോയിട്ടുണ്ടെന്ന് അവന് മനസ്സിലാകുന്നതാണ്. ഖുർആൻ മനഃപാഠമാക്കുന്നതും ആവർത്തിച്ചുറപ്പിക്കുന്നതും ഒരേസമയം ഒരുമിച്ച് കൊണ്ടുപോകുക എന്നതാണ് ഏറ്റവും ഉത്തമമായ മാർഗ്ഗം.
മനഃപാഠമാക്കുന്നതും ആവർത്തിച്ചുറപ്പിക്കുന്നതും ഒരുമിച്ച് കൊണ്ടുപോകാനുള്ള മാർഗ്ഗം താഴെ പറയുന്നതാണ്:
1 – സൂറത്തുൽ നാസ് മുതൽ സൂറത്തുൽ അഹ്ഖാഫ് വരെ നിങ്ങൾ മനഃപാഠമാക്കിക്കൊണ്ടിരിക്കുന്ന സമയത്ത്, നിങ്ങൾ മനഃപാഠമാക്കിയ ഇടമെത്തുന്നത് വരെ എല്ലാ ദിവസവും അര ജുസ്അ് വീതം മുറാജഅത്ത് ചെയ്യുക.
2 – സൂറത്തുൽ ജാസിയ മുതൽ സൂറത്തുൽ അൻകബൂത്ത് വരെ നിങ്ങൾ മനഃപാഠമാക്കിക്കൊണ്ടിരിക്കുന്ന സമയത്ത്, സൂറത്തുൽ നാസിന്റെ തുടക്കം മുതൽ നിങ്ങൾ മനഃപാഠമാക്കിയ ഇടമെത്തുന്നത് വരെ എല്ലാ ദിവസവും ഒരു ജുസ്അ് വീതം മുറാജഅത്ത് ചെയ്യുക.
3 – സൂറത്തുൽ ഖസ്വസ്വ് മുതൽ സൂറത്തുൽ കഹ്ഫ് വരെ നിങ്ങൾ മനഃപാഠമാക്കിക്കൊണ്ടിരിക്കുന്ന സമയത്ത്, സൂറത്തുൽ നാസിന്റെ തുടക്കം മുതൽ നിങ്ങൾ മനഃപാഠമാക്കിയ ഇടമെത്തുന്നത് വരെ എല്ലാ ദിവസവും ഒന്നര ജുസ്അ് വീതം മുറാജഅത്ത് ചെയ്യുക.
4 – സൂറത്തുൽ ഇസ്റാഅ് മുതൽ സൂറത്തുത്തൗബ വരെ നിങ്ങൾ മനഃപാഠമാക്കിക്കൊണ്ടിരിക്കുന്ന സമയത്ത്, സൂറത്തുൽ നാസിന്റെ തുടക്കം മുതൽ നിങ്ങൾ മനഃപാഠമാക്കിയ ഇടമെത്തുന്നത് വരെ എല്ലാ ദിവസവും രണ്ട് ജുസ്അ് വീതം മുറാജഅത്ത് ചെയ്യുക.
5 – സൂറത്തുൽ അൻഫാൽ മുതൽ സൂറത്തുൽ മാഇദ വരെ നിങ്ങൾ മനഃപാഠമാക്കിക്കൊണ്ടിരിക്കുന്ന സമയത്ത്, സൂറത്തുൽ നാസിന്റെ തുടക്കം മുതൽ നിങ്ങൾ മനഃപാഠമാക്കിയ ഇടമെത്തുന്നത് വരെ എല്ലാ ദിവസവും രണ്ടര ജുസ്അ് വീതം മുറാജഅത്ത് ചെയ്യുക.
6 – സൂറത്തുന്നിസാഅ് മുതൽ സൂറത്തുൽ ബഖറ വരെ നിങ്ങൾ മനഃപാഠമാക്കിക്കൊണ്ടിരിക്കുന്ന സമയത്ത്, സൂറത്തുൽ നാസിന്റെ തുടക്കം മുതൽ നിങ്ങൾ മനഃപാഠമാക്കിയ ഇടമെത്തുന്നത് വരെ എല്ലാ ദിവസവും മൂന്ന് ജുസ്അ് വീതം മുറാജഅത്ത് ചെയ്യുക.
ഇത് താഴെ പറയുന്ന പട്ടികയിൽ വ്യക്തമാക്കിയിരിക്കുന്നു:
| വിഭാഗം | ഭാഗം (മനഃപാഠമാക്കുന്നത്) | അളവ് (മുറാജഅത്ത്) |
|---|---|---|
| 1 | സൂറത്തുൽ നാസ് മുതൽ സൂറത്തുൽ അഹ്ഖാഫ് വരെ | അര ജുസ്അ് |
| 2 | സൂറത്തുൽ ജാസിയ മുതൽ സൂറത്തുൽ അൻകബൂത്ത് വരെ | ഒരു ജുസ്അ് |
| 3 | സൂറത്തുൽ ഖസ്വസ്വ് മുതൽ സൂറത്തുൽ കഹ്ഫ് വരെ | ഒന്നര ജുസ്അ് |
| 4 | സൂറത്തുൽ ഇസ്റാഅ് മുതൽ സൂറത്തുത്തൗബ വരെ | രണ്ട് ജുസ്അ് |
| 5 | സൂറത്തുൽ അൻഫാൽ മുതൽ സൂറത്തുൽ മാഇദ വരെ | രണ്ടര ജുസ്അ് |
| 6 | സൂറത്തുന്നിസാഅ് മുതൽ സൂറത്തുൽ ബഖറ വരെ | മൂന്ന് ജുസ്അ് |
മുറാജഅത്തോട് കൂടി അല്ലാഹുവിന്റെ ഗ്രന്ഥം പൂർണ്ണമായും നിങ്ങൾ മനഃപാഠമാക്കി കഴിഞ്ഞാൽ, “നിങ്ങളുടെ ഖുർആൻ മനഃപാഠം എങ്ങനെ പൂർണ്ണതയിലെത്തിക്കാം” എന്ന ഭാഗത്ത് വിശദീകരിച്ചതുപോലെ, നിങ്ങളുടെ മനഃപാഠം പരിപൂർണ്ണമാക്കുന്നതിനുള്ള അടുത്ത ഘട്ടത്തിലേക്ക് നിങ്ങൾ കടക്കുക.
പരസ്പരം സാമ്യമുള്ള വചനങ്ങളെ എങ്ങനെ വേർതിരിച്ചറിയും?
പരസ്പരം സാമ്യമുള്ള ചില വചനങ്ങൾ നിങ്ങൾ കാണുകയാണെങ്കിൽ, അവ തമ്മിൽ വേർതിരിച്ചറിയാനുള്ള ഏറ്റവും നല്ല മാർഗ്ഗം താഴെ പറയുന്നവ ചെയ്യുക എന്നതാണ്:2
1 – പരസ്പരം സാമ്യമുള്ള വചനങ്ങളിലേക്ക് ഖുർആൻ തുറക്കുക, എന്നിട്ട് അവ തമ്മിലുള്ള വ്യത്യാസങ്ങൾ നോക്കി മനസ്സിലാക്കുക. ശേഷം അവയെക്കുറിച്ച് ചിന്തിക്കുകയും അവ തമ്മിൽ വേർതിരിച്ചറിയാൻ സാധിക്കുന്ന തരത്തിൽ നിങ്ങളുടേതായ ഒരു നിയമം ഉണ്ടാക്കുകയും ചെയ്യുക.
2 – നിങ്ങളുടെ മുറാജഅത്ത് സമയത്ത്, സമാനമായ വചനങ്ങൾക്കിടയിലുള്ള വ്യത്യാസങ്ങളിൽ നിങ്ങൾ പതിവായി ശ്രദ്ധ കേന്ദ്രീകരിക്കുക, അതിലൂടെ അവ തമ്മിലുള്ള സാമ്യതയെ നിങ്ങൾക്ക് കൃത്യമായി വേർതിരിച്ചറിയാൻ സാധിക്കുന്നതാണ്.
