بِسْمِ ٱللّٰهِ ٱلرَّحْمٰنِ ٱلرَّحِيمِ
മതത്തെ പല പദവികളും സ്ഥാനങ്ങളുമാക്കുകയും, അതിനെക്കുറിച്ചുള്ള അറിവിന് അടിസ്ഥാനങ്ങളും സുപ്രധാന തത്വങ്ങളും നിശ്ചയിക്കുകയും ചെയ്ത അല്ലാഹുവിനാണ് സർവ്വസ്തുതിയും. സത്യമായും അല്ലാഹുവല്ലാതെ മറ്റൊരു ആരാധ്യനില്ലെന്നും, മുഹമ്മദ് നബി ﷺ അവന്റെ ദാസനും ദൂതനുമാണെന്നും ഞാൻ സാക്ഷ്യം വഹിക്കുന്നു. അല്ലാഹുവേ, ഇബ്രാഹീം നബിക്കും അദ്ദേഹത്തിന്റെ കുടുംബത്തിനും നീ അനുഗ്രഹം ചൊരിഞ്ഞത് പോലെ മുഹമ്മദ് നബിക്കും അദ്ദേഹത്തിന്റെ കുടുംബത്തിനും നീ അനുഗ്രഹം ചൊരിയേണമേ. നിശ്ചയമായും നീ സ്തുത്യർഹനും മഹത്വമുള്ളവനുമാകുന്നു. അല്ലാഹുവേ, ഇബ്രാഹീം നബിക്കും അദ്ദേഹത്തിന്റെ കുടുംബത്തിനും നീ ബറകത്ത് നൽകിയത് പോലെ മുഹമ്മദ് നബിക്കും അദ്ദേഹത്തിന്റെ കുടുംബത്തിനും നീ ബറകത്ത് നൽകേണമേ. നിശ്ചയമായും നീ സ്തുത്യർഹനും മഹത്വമുള്ളവനുമാകുന്നു.
പല ശൈഖുമാരിൽ നിന്നും എനിക്ക് ഹദീസ് ലഭിച്ചിട്ടുണ്ട്. സനദോട് കൂടി അവരിൽ നിന്ന് ഞാൻ ആദ്യമായി കേട്ട ഹദീസാണിത്:
«الرَّاحِمُونَ يَرْحَمُهُمُ الرَّحْمَنُ، ارْحَمُوا مَنْ فِي الْأَرْضِ؛ يَرْحَمُكُمْ مَنْ فِي السَّمَاءِ»
കരുണ കാണിക്കുന്നവരോട് പരമകാരുണികനായ അല്ലാഹു കരുണ കാണിക്കുന്നതാണ്. നിങ്ങൾ ഭൂമിയിലുള്ളവരോട് കരുണ കാണിക്കുക; എങ്കിൽ ആകാശത്തുള്ളവൻ നിങ്ങളോട് കരുണ കാണിക്കുന്നതാണ്. 1
മതത്തിന്റെ വിധികൾ പഠിപ്പിച്ചു കൊടുക്കുന്നതിലും, ദൃഢബോധ്യത്തിന്റെ പദവികളിലേക്ക് അവരെ ഉയർത്തുന്നതിലും അധ്യാപകർ വിദ്യാർത്ഥികളോട് കാണിക്കുന്ന കരുണയാണ് ഏറ്റവും പ്രധാനപ്പെട്ട കരുണകളിൽ ഒന്ന്.
അടിസ്ഥാന ഗ്രന്ഥങ്ങൾ (മത്നുകൾ) ഓതിക്കൊടുക്കുകയും, അവയുടെ പ്രധാന ലക്ഷ്യങ്ങളും പൊതുവായ അർത്ഥങ്ങളും വിശദീകരിച്ചുകൊടുക്കുകയും ചെയ്തുകൊണ്ട് അറിവിലെ സുപ്രധാന കാര്യങ്ങൾ വിദ്യാർത്ഥികളെ ബോധ്യപ്പെടുത്തുക എന്നത് അവർ കാണിക്കുന്ന കരുണയുടെ രീതികളിൽ പെട്ടതാണ്. ഇതിലൂടെ തുടക്കക്കാരായ വിദ്യാർത്ഥികൾക്ക് അവരുടെ പഠനം ആരംഭിക്കാനും, ഇടത്തരം വിദ്യാർത്ഥികൾക്ക് തങ്ങൾ പഠിച്ചത് ഓർമ്മിക്കാനും, ഉന്നതതലത്തിലുള്ള വിദ്യാർത്ഥികൾക്ക് വിജ്ഞാനത്തിലെ സങ്കീർണ്ണമായ വിഷയങ്ങൾ കൂടുതൽ കൃത്യമായി മനസ്സിലാക്കാനും സാധിക്കും.
‘മുഹിമ്മാത്തുൽ ഇൽമ്’ (അറിവിലെ സുപ്രധാന കാര്യങ്ങൾ) എന്ന പഠന പദ്ധതിയുടെ ആറാം വർഷത്തിലെ (ഹിജ്റ 1436) മൂന്നാമത്തെ ഗ്രന്ഥത്തിന്റെ വിശദീകരണമാണിത്. അറേബ്യൻ ഉപദ്വീപിലെ പന്ത്രണ്ടാം നൂറ്റാണ്ടിലെ സലഫി നവോത്ഥാന നായകനായ ശൈഖ് മുഹമ്മദ് ബിൻ അബ്ദുൽ വഹാബ് ബിൻ സുലൈമാൻ അത്തമീമി رَحِمَهُ اللَّهُ (ഹിജ്റ 1206-ൽ മരണപ്പെട്ട) രചിച്ച ‘ഫദ്ലുൽ ഇസ്ലാം’ (ഇസ്ലാമിന്റെ ശ്രേഷ്ഠത) എന്ന ഗ്രന്ഥമാണിത്.
- സുനനുൽ തിർമിദി – 1924 ↩︎