ശൈഖുൽ ഇസ്ലാം മുഹമ്മദ് ഇബ്നു അബ്ദിൽ വഹ്ഹാബ് – ഫദ്ലുൽ ഇസ്ലാം
[1] അല്ലാഹുവിന്റെ വചനം:
﴿فَلَوْلَا كَانَ مِنَ الْقُرُونِ مِن قَبْلِكُمْ أُولُوا بَقِيَّةٍ يَنْهَوْنَ عَنِ الْفَسَادِ فِي الْأَرْضِ﴾
എന്നാൽ നിങ്ങൾക്ക് മുമ്പുള്ള തലമുറകളിൽ നിന്ന് ഭൂമിയിൽ കുഴപ്പമുണ്ടാക്കുന്നത് തടയാൻ തക്കവണ്ണം നന്മയുടെ അവശിഷ്ടമുള്ളവർ എന്തുകൊണ്ട് ഉണ്ടായില്ല?… [ഹൂദ് – 116]
[2] അബൂ ഹുറൈറ رَضِيَ اللَّهُ عَنْهُ വിൽ നിന്നുള്ള മർഫൂഅ് ആയ നിവേദനം:
«بَدَأَ الإِسْلَامُ غَرِيبًا، وَسَيَعُودُ غَرِيبًا كَمَا بَدَأَ، فَطُوبَى لِلْغُرَبَاءِ»
ഇസ്ലാം അപരിചിതമായ നിലയിലാണ് ആരംഭിച്ചത്, അത് ആരംഭിച്ചതുപോലെ തന്നെ അപരിചിതമായ അവസ്ഥയിലേക്ക് മടങ്ങുന്നതാണ്. അതിനാൽ ആ അപരിചിതർക്ക് (ഗുറബാക്കൾക്ക്) മംഗളങ്ങൾ. [സ്വഹീഹ് മുസ്ലിം – 145]
[3] ഇമാം അഹ്മദ് ഇബ്നു മസ്ഊദ് رَضِيَ اللَّهُ عَنْهُ വിൽ നിന്നും ഇത് റിപ്പോർട്ട് ചെയ്തിട്ടുണ്ട്; അതിൽ ഇപ്രകാരമുണ്ട്: ചോദിക്കപ്പെട്ടു: ‘ആരാണ് ആ ഗുറബാക്കൾ?’ അവിടുന്ന് പറഞ്ഞു:
«النَّزَّاعُ مِنَ القَبَائِلِ»
വിവിധ ഗോത്രങ്ങളിൽ നിന്നുള്ള അപരിചിതരാണവർ (അകന്നുവന്നവരാണവർ).
മറ്റൊരു നിവേദനത്തിൽ ഇപ്രകാരമുണ്ട്:
«الغُرَبَاءُ الَّذِينَ يَصْلُحُونَ إِذَا فَسَدَ النَّاسُ»
ജനങ്ങൾ വഴിപിഴക്കുമ്പോൾ നന്മയിൽ നിലകൊള്ളുന്നവരാണ് ഗുറബാക്കൾ.
സഅ്ദ് ബിൻ അബീ വഖാസ് رَضِيَ اللَّهُ عَنْهُ വിൽ നിന്നും ഇമാം അഹ്മദ് ഇത് ഉദ്ധരിച്ചിട്ടുണ്ട്.
[4] അതിൽ (സഅ്ദിന്റെ ഹദീസിൽ) ഇപ്രകാരമുണ്ട്:
«فَطُوبَى يَوْمَئِذٍ لِلْغُرَبَاءِ إِذَا فَسَدَ النَّاسُ»
ജനങ്ങൾ വഴിപിഴക്കുന്ന ആ കാലത്ത് ഗുറബാക്കൾക്കാണ് മംഗളങ്ങൾ.
[5] തിർമിദിയിൽ കസീർ ബിൻ അബ്ദുല്ല, തന്റെ പിതാവിൽ നിന്നും അദ്ദേഹം തന്റെ പിതാമഹനിൽ നിന്നും നിവേദനം ചെയ്ത ഹദീസിലുണ്ട്:
«طُوبَى لِلْغُرَبَاءِ الَّذِينَ يُصْلِحُونَ مَا أَفْسَدَ النَّاسُ مِنْ سُنَّتِي»
ജനങ്ങൾ എന്റെ സുന്നത്തിൽ നിന്ന് നശിപ്പിച്ചതിനെ നന്നാക്കിയെടുക്കുന്ന ഗുറബാക്കൾക്ക് മംഗളങ്ങൾ.
[6] അബൂ ഉമയ്യ പറയുന്നു: ഞാൻ അബൂ സഅ്ലബ അൽ ഖുശനി رَضِيَ اللَّهُ عَنْهُ വിനോട് ചോദിച്ചു: ‘അബൂ സഅ്ലബ, അല്ലാഹുവിന്റെ ഈ വചനത്തെക്കുറിച്ച് താങ്കൾക്കെന്താണ് പറയാനുള്ളത്: ﴿يَتَأَيُّهَا الَّذِينَ ءَامَنُوا عَلَيْكُمْ أَنفُسَكُمْ لَا يَضُرُّكُم مَّن ضَلَّ إِذَا اهْتَدَيْتُمْ﴾ (സത്യവിശ്വാസികളേ, നിങ്ങളുടെ സ്വന്തം കാര്യങ്ങൾ നിങ്ങൾ ശ്രദ്ധിച്ചുകൊള്ളുക. നിങ്ങൾ സന്മാർഗ്ഗം പ്രാപിച്ചിട്ടുണ്ടെങ്കിൽ വഴിപിഴച്ചവർ നിങ്ങൾക്കൊരു ദ്രോഹവും വരുത്തുകയില്ല… [അൽ മാഇദ – 105]). അദ്ദേഹം പറഞ്ഞു: അല്ലാഹുവാണെ സത്യം, ഇതിനെക്കുറിച്ച് ശരിയായ അറിവുള്ള ആളോട് തന്നെയാണ് നീ ചോദിച്ചത്. ഞാൻ റസൂൽ ﷺ യോട് ഇതിനെക്കുറിച്ച് ചോദിച്ചിരുന്നു. അപ്പോൾ അവിടുന്ന് പറഞ്ഞു:
«بَلِ ائْتَمِرُوا بِالْمَعْرُوفِ، وَتَنَاهَوْا عَنِ المُنْكَرِ ، حَتَّى إِذَا رَأَيْتُمْ شُحًا مُطَاعًا، وَهَوَى مُتَّبَعًا، وَدُنْيَا مُؤْثَرَةٌ، وَإِعْجَابَ كُلِّ ذِي رَأْيِ بِرَأْيِهِ – فَعَلَيْكَ بِنَفْسِكَ، وَدَعْ عَنْكَ العَوَامَ، فَإِنَّ مِنْ وَرَائِكُمْ أَيَّامَ الصَّبْرِ ، القَابِضُ فِيهِنَّ عَلَى دِينِهِ كَالقَابِضِ عَلَى الْجَمْرِ، لِلْعَامِلِ فِيهِنَّ مِثْلُ أَجْرِ خَمْسِينَ رَجُلًا يَعْمَلُونَ مِثْلَ عَمَلِكُمْ»
അല്ല, നിങ്ങൾ നന്മ കൽപ്പിക്കുകയും തിന്മ വിരോധിക്കുകയും ചെയ്യുക. എന്നാൽ അനുസരിക്കപ്പെടുന്ന പിശുക്കും, പിൻപറ്റപ്പെടുന്ന ദേഹേച്ഛകളും, മുൻഗണന നൽകപ്പെടുന്ന ഭൗതിക താല്പര്യങ്ങളും, സ്വന്തം അഭിപ്രായമുള്ളവരൊക്കെ അവരുടെ അഭിപ്രായങ്ങളിൽ അത്ഭുതം കൊള്ളുന്നതും നീ കണ്ടാൽ – അന്ന് നീ നിന്റെ സ്വന്തം കാര്യം മാത്രം ശ്രദ്ധിക്കുകയും സാധാരണ ജനങ്ങളെ വിട്ടേക്കുകയും ചെയ്യുക. നിശ്ചയമായും നിങ്ങൾക്ക് പിന്നിൽ ക്ഷമയുടെ ചില ദിനങ്ങളുണ്ട്, അന്ന് സ്വന്തം മതത്തെ മുറുകെപ്പിടിക്കുന്നവൻ തീക്കനൽ കയ്യിൽ പിടിക്കുന്നവനെപ്പോലെയാണ്. അന്ന് പ്രവർത്തിക്കുന്നവന് നിങ്ങളെപ്പോലെ പ്രവർത്തിക്കുന്ന അമ്പത് ആളുകളുടെ പ്രതിഫലമുണ്ട്.
ഞങ്ങൾ ചോദിച്ചു: ‘ഞങ്ങളിൽ നിന്നുള്ള അമ്പത് പേരോ, അതോ അവരിൽ നിന്നുള്ളവരോ?’ അവിടുന്ന് പറഞ്ഞു:
«بَلْ مِنْكُمْ»
അല്ല, നിങ്ങളിൽ നിന്നുള്ള. [അബൂ ദാവൂദും തിർമിദിയും റിപ്പോർട്ട് ചെയ്തത്]
[7] ഇബ്നു വദ്ദാഹ് ഇതിന്റെ ആശയത്തിലുള്ള ഹദീസ് ഇബ്നു ഉമർ رَضِيَ اللَّهُ عَنْهُمَا വിൽ നിന്ന് ഉദ്ധരിച്ചിട്ടുണ്ട്, അതിലെ പദങ്ങൾ ഇപ്രകാരമാണ്:
«إِنَّ مِنْ بَعْدِكُمْ أَيَّامًا الصَّابِرُ فِيهَا ، المُتَمَسِّكُ بِمِثْلِ مَا أَنْتُمْ عَلَيْهِ اليَوْمَ؛ لَهُ أَجْرُ خَمْسِينَ مِنْكُمْ»
നിശ്ചയമായും നിങ്ങൾക്ക് ശേഷം ചില ദിനങ്ങളുണ്ട്; അന്ന് ക്ഷമിക്കുകയും ഇന്ന് നിങ്ങൾ ഏതൊരു മാർഗ്ഗത്തിലാണോ അതിൽ മുറുകെപ്പിടിക്കുകയും ചെയ്യുന്നവന് നിങ്ങളിൽ നിന്നുള്ള അമ്പത് പേരുടെ പ്രതിഫലമുണ്ട്.
[8] പിന്നീട് അദ്ദേഹം (ഇബ്നു വദ്ദാഹ്) പറഞ്ഞു: മുഹമ്മദ് ബിൻ സഈദ് ഞങ്ങളെ അറിയിച്ചു, അദ്ദേഹം പറഞ്ഞു: അസദ് ഞങ്ങളെ അറിയിച്ചു, അദ്ദേഹം പറഞ്ഞു: സുഫ്യാൻ ബിൻ ഉയൈയ്ന ഞങ്ങൾക്ക് വിവരം നൽകി, അസ്ലം അൽ ബസ്വരിയിൽ നിന്ന്, അദ്ദേഹം ഹസന്റെ സഹോദരനായ സഈദിൽ നിന്ന്, അദ്ദേഹം നബി ﷺ യിലേക്ക് ചേർത്തുപറയുന്നു (മർഫൂഅ്), റസൂൽ ﷺ പറഞ്ഞു:
«إِنَّكُمُ اليَوْمَ عَلَى بَيِّنَةٍ مِنْ رَبِّكُمْ، تَأْمُرُونَ بِالْمَعْرُوفِ، وَتَنْهَوْنَ عَنِ المُنْكَرِ، وَتُجَاهِدُونَ فِي سَبِيلِ اللهِ، وَلَمْ تَظْهَرْ فِيكُمُ السَّكْرَتَانَ : سَكْرَةُ الجَهْلِ وَسَكْرَةُ حُبِّ العَيْشِ ، وَسَتُحَوَّلُونَ عَن ذَلِكَ ، فَالمُتَمَسِّكُ يَوْمَئِذٍ بِالْكِتَابِ وَالسُّنَّةِ لَهُ أَجْرُ خَمْسِينَ»
നിശ്ചയമായും ഇന്ന് നിങ്ങൾ നിങ്ങളുടെ രക്ഷിതാവിങ്കൽ നിന്നുള്ള വ്യക്തമായ തെളിവിലാണുള്ളത്, നിങ്ങൾ നന്മ കൽപ്പിക്കുകയും തിന്മ വിരോധിക്കുകയും അല്ലാഹുവിന്റെ മാർഗ്ഗത്തിൽ ജിഹാദ് ചെയ്യുകയും ചെയ്യുന്നു. അറിവില്ലായ്മയുടെ ലഹരിയും, ഭൗതിക ജീവിതത്തോടുള്ള ഇഷ്ടത്തിന്റെ ലഹരിയുമാകുന്ന രണ്ടുതരം ലഹരികൾ നിങ്ങളിൽ വെളിപ്പെട്ടിട്ടില്ല. എന്നാൽ പിന്നീട് നിങ്ങൾ ഈ അവസ്ഥയിൽ നിന്ന് മാറ്റിമറിക്കപ്പെടും. ആ സമയത്ത് ഖുർആനും സുന്നത്തും മുറുകെപ്പിടിക്കുന്നവന് അമ്പത് ആളുകളുടെ പ്രതിഫലമുണ്ട്.
ചോദിക്കപ്പെട്ടു: ‘അവരിൽ നിന്നുള്ള (അമ്പത് പേരോ)?’ അവിടുന്ന് പറഞ്ഞു:
«بَلْ مِنْكُمْ»
അല്ല, നിങ്ങളിൽ നിന്നുള്ള. [കിതാബുൽ ബിദഅ് – ഇബ്നു വദ്ദാഹ്]
[9] അദ്ദേഹത്തിന് (ഇബ്നു വദ്ദാഹിന്) തന്നെ അൽ മആഫിരിയിൽ നിന്നുള്ള സനദിലൂടെ മറ്റൊരു നിവേദനമുണ്ട്, റസൂൽ ﷺ പറഞ്ഞു:
«طُوبَى لِلْغُرَبَاءَ؛ الَّذِينَ يَتَمَسَّكُونَ بِكِتَابِ اللهِ حِينَ يُتْرَكُ، وَيَعْمَلُونَ بِالسُّنَّةِ حِينَ تُطْفَأُ»
അല്ലാഹുവിന്റെ ഗ്രന്ഥം ഉപേക്ഷിക്കപ്പെടുമ്പോൾ അത് മുറുകെപ്പിടിക്കുകയും, സുന്നത്ത് കെടുത്തപ്പെടുമ്പോൾ അത് പ്രവർത്തിക്കുകയും ചെയ്യുന്ന ഗുറബാക്കൾക്ക് മംഗളങ്ങൾ.
ശൈഖ് സ്വാലിഹ് അൽ-ഉസൈമി:
ഈ അധ്യായത്തിന്റെ ഉദ്ദേശ്യം: ഇസ്ലാമിന്റെ അപരിചിതത്വം സംഭവിക്കുമെന്ന് വ്യക്തമാക്കലും, ആ അപരിചിതരുടെ ശ്രേഷ്ഠത അറിയിക്കലുമാണ്. ഇസ്ലാമനുസരിച്ച് പ്രവർത്തിക്കുന്ന ആളുകളുടെ എണ്ണം കുറയുകയും, മറ്റുള്ളവരിൽ നിന്ന് അവർ ഒറ്റപ്പെടുകയും ചെയ്യുമ്പോഴാണ് ഈ അപരിചിതത്വം സംഭവിക്കുന്നത്.
ഇസ്ലാമിന്റെ ആളുകളുടെ ഈ അപരിചിതത്വം രണ്ടുതരമുണ്ട്:
- ഒന്നാമത്തേത് الغُرْبَةُ القَدَرِيَّةُ: അവിശ്വാസികൾക്കിടയിലുള്ള എല്ലാ മുസ്ലിംകളുടെയും അപരിചിതത്വമാണിത് (ഇതൊരു സ്വാഭാവികമായ അപരിചിതത്വമാണ്).
- രണ്ടാമത്തേത് الغُرْبَةُ الشَّرْعِيَّةُ: മുസ്ലിംകൾക്കിടയിൽ റസൂൽ ﷺ യുടെ സുന്നത്ത് പിൻപറ്റുന്ന യഥാർത്ഥ മുസ്ലിമിന്റെ അപരിചിതത്വമാണിത് (ഇതാണ് ശറഇയായ അപരിചിതത്വം).
ഖുർആനിലും ഹദീസുകളിലും ഗുറബാക്കൾക്കായി പറഞ്ഞിട്ടുള്ള ഈ ശ്രേഷ്ഠതകളും മഹത്വങ്ങളും മറ്റു മുസ്ലിംകളെക്കൂടാതെ ഇവർക്ക് മാത്രം അവകാശപ്പെട്ടതാണ്. കാരണം, മതപരമായി അംഗീകരിക്കപ്പെട്ടതും പ്രശംസിക്കപ്പെട്ടതുമായ അപരിചിതത്വം എന്നത്, ഒരു ദാസൻ നബി ﷺ യുടെ മാർഗ്ഗം മുറുകെപ്പിടിക്കുന്നതിലൂടെ ഉണ്ടാകുന്നതാണ്.
ഈ അധ്യായത്തിന്റെ ഉദ്ദേശ്യം യാഥാർത്ഥ്യമാക്കുന്നതിനായി ഒമ്പത് തെളിവുകളാണ് അദ്ദേഹം പരാമർശിച്ചിട്ടുള്ളത്:
ഒന്നാമത്തെ തെളിവ്: അല്ലാഹുവിന്റെ ഈ വചനമാണ്: ‘എന്നാൽ നിങ്ങൾക്ക് മുമ്പുള്ള തലമുറകളിൽ നിന്ന് ഭൂമിയിൽ കുഴപ്പമുണ്ടാക്കുന്നത് തടയാൻ തക്കവണ്ണം നന്മയുടെ അവശിഷ്ടമുള്ളവർ എന്തുകൊണ്ട് ഉണ്ടായില്ല?…’ ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നത് ഈ ആയത്തിന്റെ അവസാന ഭാഗത്തിലാണത്: ‘…നാം രക്ഷപ്പെടുത്തിയവരിൽ നിന്നുള്ള കുറച്ചുപേരൊഴികെ’. ഇതിൽ രക്ഷപ്പെട്ടവർ കുറഞ്ഞ ആളുകളാണ്, ഈ കുറവാണ് അപരിചിതത്വം. അവർ രക്ഷപ്പെട്ടു എന്നത് അവരുടെ ശ്രേഷ്ഠതയെ അറിയിക്കുന്നു. അതിനാൽ അവർ തന്നെയാണ് രക്ഷപ്പെടുന്നവർ എന്നത് ഈ ഗുറബാക്കളുടെ ശ്രേഷ്ഠതകളിൽ പെട്ടതാണ്.
ഇസ്ലാമിന്റെ അപരിചിതത്വത്തിന് തെളിവായി ഈ ആയത്ത് ഉദ്ധരിക്കുന്നതിൽ ഗ്രന്ഥകർത്താവ് (മുഹമ്മദ് ബിൻ അബ്ദുൽ വഹാബ് رَحِمَهُ اللَّهُ) പിൻപറ്റിയിട്ടുള്ളത് അബൂ ഇസ്മാഈൽ അൽ-ഹറവിയെയാണ്; അദ്ദേഹം തന്റെ ‘മനാസിലുസ്സായിരീൻ’ എന്ന ഗ്രന്ഥത്തിൽ ‘അപരിചിതത്വം’ (മൻസിലത്തുൽ ഗുർബഃ) എന്നൊരു അധ്യായം നൽകുകയും ഈ ആയത്ത് കൊണ്ട് അത് ആരംഭിക്കുകയും ചെയ്തിട്ടുണ്ട്. അൽ-ഹറവി ഈ ആയത്ത് തെളിവായി കൊണ്ടുവന്നത് അദ്ദേഹത്തിന്റെ വിജ്ഞാനത്തിലും ഖുർആനിലുള്ള അദ്ദേഹത്തിന്റെ അഗാധമായ അറിവിലും പാണ്ഡിത്യത്തിലുമുള്ള പൂർണ്ണതയെയാണ് അറിയിക്കുന്നത് എന്ന് ഇബ്നുൽ ഖയ്യിം തന്റെ ‘മദാരിജുസ്സാലികീൻ’ എന്ന വ്യാഖ്യാനഗ്രന്ഥത്തിൽ പരാമർശിച്ചിട്ടുണ്ട്.
രണ്ടാമത്തെ തെളിവ്: അബൂ ഹുറൈറ رَضِيَ اللَّهُ عَنْهُ വിന്റെ മർഫൂഅ് ആയ ഹദീസാണ്: ‘ഇസ്ലാം അപരിചിതമായ നിലയിലാണ് ആരംഭിച്ചത്…’ ഇത് ഇമാം മുസ്ലിം റിപ്പോർട്ട് ചെയ്തിട്ടുണ്ട്. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നത് വ്യക്തമാണ്; ഇസ്ലാമിന്റെ അപരിചിതത്വം സംഭവിക്കുമെന്നതിനെക്കുറിച്ചുള്ള സത്യസന്ധമായ വിവരണം ഇതിലുണ്ട്. ഇസ്ലാം അപരിചിതമായ നിലയിലാണ് ആരംഭിച്ചതെന്നും, അത് അപരിചിതമായ അവസ്ഥയിലേക്ക് തന്നെ മടങ്ങുമെന്നും ഇതിൽ പറയുന്നു. അതോടൊപ്പം ‘അതിനാൽ ആ അപരിചിതർക്ക് മംഗളങ്ങൾ’ എന്ന നബി ﷺ യുടെ വചനത്തിലൂടെ ഗുറബാക്കളുടെ ശ്രേഷ്ഠതയും ഇതിൽ വ്യക്തമാക്കിയിരിക്കുന്നു. ‘طُوبَى’ (തൂബാ) എന്നത് ‘طَيِّبٌ’ (നല്ലത്) എന്നതിൽ നിന്നുള്ള പദമാണ്. അതിനാൽ ഇഹലോകത്തും പരലോകത്തുമുള്ള എല്ലാ നല്ല കാര്യങ്ങളും അവർക്കുണ്ട്, ഇരുലോകത്തും നല്ലൊരു ജീവിതം നേടുന്ന വിജയികളാണവർ.
മൂന്നാമത്തെ തെളിവ്: ഇബ്നു മസ്ഊദ് رَضِيَ اللَّهُ عَنْهُ വിന്റെ ഹദീസാണ്; അബൂ ഹുറൈറയുടെ ഹദീസിലുള്ളത് പോലെത്തന്നെ ഇതിലുമുണ്ട്, എന്നാൽ അതിൽ കൂടുതലായി ഇപ്രകാരം പറയുന്നു: ‘ചോദിക്കപ്പെട്ടു: ആരാണ് ആ ഗുറബാക്കൾ? അവിടുന്ന് പറഞ്ഞു: വിവിധ ഗോത്രങ്ങളിൽ നിന്നുള്ള അപരിചിതരാണവർ’. ഇത് ഇമാം അഹ്മദ് ഉദ്ധരിച്ചിട്ടുണ്ട്, തിർമിദിയിലുള്ളത് ഈ അവസാനത്തെ കൂട്ടിച്ചേർക്കലില്ലാതെയാണ്, ഇതിന്റെ സനദ് സ്വഹീഹാണ്. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നത് മുൻപത്തേത് പോലെത്തന്നെയാണ്; അവർക്ക് മംഗളങ്ങളുണ്ട് എന്ന് പറയുന്നതിലൂടെ ഗുറബാക്കളുടെ ശ്രേഷ്ഠത ഇതിൽ വ്യക്തമാക്കുന്നു. ‘വിവിധ ഗോത്രങ്ങളിൽ നിന്നുള്ള അപരിചിതരാണവർ’ (النُّزَّاعُ مِنَ القَبَائِلِ) എന്ന് നബി ﷺ അവരെ വിശേഷിപ്പിച്ചു; അതായത്, വിവിധ നാടുകളിൽ നിന്നും വ്യത്യസ്ത കുടുംബങ്ങളിൽ നിന്നും ഒരുമിച്ചുകൂടിയ ആളുകളാണവർ.
ഇബ്നു മസ്ഊദിന്റെ ഹദീസിൽ വന്നിട്ടുള്ള മറ്റൊരു നിവേദനമായ ‘ജനങ്ങൾ വഴിപിഴക്കുമ്പോൾ നന്മയിൽ നിലകൊള്ളുന്നവരാണ് ഗുറബാക്കൾ’ എന്നത് അൽ-ആജുരി തന്റെ ‘അൽ-ഗുറബാഅ്’ എന്ന ഗ്രന്ഥത്തിലും, അദ്ദാനി തന്റെ ‘അൽ-ഫിതൻ’ എന്ന ഗ്രന്ഥത്തിലും റിപ്പോർട്ട് ചെയ്തിട്ടുണ്ട്, എന്നാൽ അത് സ്വഹീഹല്ല. ഈ അർത്ഥത്തിൽ വന്നിട്ടുള്ളതിൽ വെച്ച് ഏറ്റവും സ്വീകാര്യമായത് ഇബ്നുൽ മുബാറക് തന്റെ ‘കിതാബുൽ ജിഹാദി’ൽ സ്വഹീഹായ സനദിലൂടെ അബ്ദുല്ല ബിൻ അംറ് رَضِيَ اللَّهُ عَنْهُمَا വിൽ നിന്ന് ഉദ്ധരിച്ച റിപ്പോർട്ടാണ്: അദ്ദേഹം പറഞ്ഞു: ‘ജനങ്ങൾ വഴിപിഴക്കുമ്പോൾ നന്മയിൽ നിലകൊള്ളുന്ന ഗുറബാക്കൾക്കാണ് മംഗളങ്ങൾ’. ജനങ്ങൾ വഴിപിഴക്കുന്ന സമയത്ത് അവർ സജ്ജനങ്ങളായിരിക്കും എന്ന് ഗുറബാക്കളെ വിശേഷിപ്പിച്ചുകൊണ്ട് വന്നിട്ടുള്ള അബ്ദുല്ല ബിൻ അംറിന്റെ ഈ അഥർ തന്നെയാണ് ഈ വിഷയത്തിൽ വന്നിട്ടുള്ളതിൽ വെച്ച് ഏറ്റവും സ്ഥിരപ്പെട്ടത്.
നാലാമത്തെ തെളിവ്: സഅ്ദ് ബിൻ അബീ വഖാസ് رَضِيَ اللَّهُ عَنْهُ വിന്റെ ഹദീസാണ്; അതിൽ ഇപ്രകാരമുണ്ട്: ‘ജനങ്ങൾ വഴിപിഴക്കുന്ന ആ കാലത്ത് ഗുറബാക്കൾക്കാണ് മംഗളങ്ങൾ’. ഇത് ഇമാം അഹ്മദ് റിപ്പോർട്ട് ചെയ്തിട്ടുണ്ട്, ഇതിലെ നിവേദകരെല്ലാം വിശ്വസ്തരാണ് (സിഖാത്തുകൾ). എന്നാൽ ഇതിൽ സഅ്ദിൽ നിന്ന് റിപ്പോർട്ട് ചെയ്തത് അദ്ദേഹത്തിന്റെ മകനാണെന്ന് അവ്യക്തമാക്കിയിട്ടുണ്ട്. സഅ്ദിന് വേറെയും ആൺമക്കളുണ്ട്, അവരിൽ ഈ ഹദീസ് റിപ്പോർട്ട് ചെയ്യാൻ ഏറ്റവും സാധ്യതയുള്ളത് ആമിർ ബിൻ സഅ്ദ് ആണ്, അദ്ദേഹം വിശ്വസ്തനുമാണ്. അതിനാൽ ഈ അവ്യക്തമാക്കപ്പെട്ട മകൻ വിശ്വസ്തനായ ആമിർ ആണെന്ന അഭിപ്രായം സ്വീകരിക്കുകയാണെങ്കിൽ ഈ ഹദീസ് സ്വഹീഹാണ്, ഇതാണ് ഏറ്റവും ശരിയായിട്ടുള്ളതും. അബ്ദുല്ല ബിൻ അംറിന്റെ അഥറും ഈ ഹദീസും തമ്മിലുള്ള വ്യത്യാസം ഇതാണ്: ഗുറബാക്കളുടെ വിശേഷണം പറയുന്ന അബ്ദുല്ല ബിൻ അംറിന്റെ അഥർ സ്വഹീഹാണെന്നതിൽ യാതൊരു തർക്കവുമില്ല, എന്നാൽ ഈ ഹദീസിന്റെ സ്വീകാര്യതയിൽ ചില തർക്കങ്ങളുണ്ട്. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നത് മുൻപത്തേത് പോലെത്തന്നെയാണ്.
അഞ്ചാമത്തെ തെളിവ്: ഔഫ് ബിൻ സെയ്ദ് رَضِيَ اللَّهُ عَنْهُ വിന്റെ ഹദീസാണ്: ‘ജനങ്ങൾ എന്റെ സുന്നത്തിൽ നിന്ന് നശിപ്പിച്ചതിനെ നന്നാക്കിയെടുക്കുന്ന ഗുറബാക്കൾക്ക് മംഗളങ്ങൾ’. ഇത് തിർമിദി റിപ്പോർട്ട് ചെയ്തിട്ടുണ്ട്, ഇതിന്റെ സനദ് ദഈഫാണ്. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നതും മുൻപത്തേത് പോലെത്തന്നെയാണ്.
ആറാമത്തെ തെളിവ്: അബൂ സഅ്ലബ അൽ ഖുശനി رَضِيَ اللَّهُ عَنْهُ വിന്റെ ഹദീസാണ്: ‘അല്ല, നിങ്ങൾ നന്മ കൽപ്പിക്കുകയും തിന്മ വിരോധിക്കുകയും ചെയ്യുക…’ നസാഇ ഒഴികെയുള്ള സുനനുകളുടെ രചയിതാക്കൾ ഇത് റിപ്പോർട്ട് ചെയ്തിട്ടുണ്ട്. ഇതിന്റെ സനദ് ദഈഫാണെങ്കിലും, ഇതിലെ വചനങ്ങളെ ശക്തിപ്പെടുത്തുന്ന മറ്റു സമാനമായ റിപ്പോർട്ടുകൾ വേറെയുമുണ്ട്; പ്രത്യേകിച്ച് ക്ഷമയുടെ നാളുകളിൽ പ്രവർത്തിക്കുന്നവന്റെ പ്രതിഫലത്തെക്കുറിച്ച് പറയുന്ന വാചകം. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നത് രണ്ട് രൂപത്തിലാണ്:
- ഒന്നാമതായി: ക്ഷമയുടെ നാളുകളിൽ സ്വന്തം മതത്തെ മുറുകെപ്പിടിക്കുന്നത് തീക്കനൽ കയ്യിൽ പിടിക്കുന്നതിനോട് ഉപമിച്ചതിലൂടെ ആ സമയത്തെ ഇസ്ലാമിന്റെ അപരിചിതത്വം ഇതിൽ വ്യക്തമാക്കുന്നു.
- രണ്ടാമതായി: നബി ﷺ യുടെ സ്വഹാബിമാരിലെ അമ്പത് ആളുകളുടെ പ്രതിഫലം അന്ന് പ്രവർത്തിക്കുന്നവർക്കുണ്ട് എന്ന് പറഞ്ഞതിലാണത്. ഇപ്രകാരം പ്രതിഫലം ഇരട്ടിയാക്കപ്പെടുന്നത് അവരുടെ ശ്രേഷ്ഠതയെയാണ് അറിയിക്കുന്നത്. എന്നാൽ പ്രതിഫലം ഇരട്ടിയായതുകൊണ്ട് മാത്രം അവർ സ്വഹാബാക്കളെക്കാൾ ഉത്തമരാണെന്ന് അതിനർത്ഥമില്ല; കാരണം നബി ﷺ യോടൊപ്പമുള്ള സഹവാസം, അവരുടെ ജീവിതരീതികൾ തുടങ്ങിയവ പരിഗണിക്കുമ്പോൾ സ്വഹാബികൾ തന്നെയാണ് അവരേക്കാൾ ശ്രേഷ്ഠരായ ആളുകൾ.
ഏഴാമത്തെ തെളിവ്: ഇബ്നു ഉമർ رَضِيَ اللَّهُ عَنْهُمَا വിന്റെ ഹദീസാണ്: ‘നിശ്ചയമായും നിങ്ങൾക്ക് ശേഷം ചില ദിനങ്ങളുണ്ട്…’ ഇത് ഇബ്നു വദ്ദാഹ് റിപ്പോർട്ട് ചെയ്തിട്ടുണ്ട്, ഇതിന്റെ സനദ് ദഈഫാണ്. മുൻപ് കഴിഞ്ഞ അബൂ സഅ്ലബയുടെ ഹദീസ് ഇതിന് പകരമായി മതിയാകുന്നതാണ്. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നത് മുൻപത്തേത് പോലെത്തന്നെയാണ്.
എട്ടാമത്തെ തെളിവ്: താബിഉകളിൽ പെട്ട, ഹസന്റെ സഹോദരനായ സഈദ് അൽ ബസ്വരിയുടെ ഹദീസാണ്; അദ്ദേഹം പറഞ്ഞു: ‘നിശ്ചയമായും ഇന്ന് നിങ്ങൾ നിങ്ങളുടെ രക്ഷിതാവിങ്കൽ നിന്നുള്ള വ്യക്തമായ തെളിവിലാണുള്ളത്…’ ഇതും ഇബ്നു വദ്ദാഹ് റിപ്പോർട്ട് ചെയ്തിട്ടുണ്ട്, ഇതൊരു മുർസലായ ഹദീസായതുകൊണ്ട് സ്വഹീഹല്ല. താബിഇയായ ഒരാൾ നേരിട്ട് നബി ﷺ യിലേക്ക് ചേർത്തുപറയുന്നതിനാണ് മുർസൽ (الْمُرْسَلُ) എന്ന് പറയുന്നത്, ഇതിന്റെ വിധി ദഈഫ് എന്നാണ്. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നതും മുൻപ് പറഞ്ഞ രണ്ട് തെളിവുകൾ പോലെത്തന്നെയാണ്.
ഒമ്പതാമത്തെ തെളിവ്: താബിഉകളിൽ പെട്ട ബകർ ബിൻ അംറ് അൽ മആഫിരി رَحِمَهُ اللَّهُ വിന്റെ ഹദീസാണ്; അദ്ദേഹം പറഞ്ഞു: റസൂൽ ﷺ പറഞ്ഞു: ‘ഗുറബാക്കൾക്ക് മംഗളങ്ങൾ…’ ഇതും ഇബ്നു വദ്ദാഹ് റിപ്പോർട്ട് ചെയ്തിട്ടുണ്ട്, മുർസലായതുകൊണ്ട് ഇതും ദഈഫാണ്. ഈ അധ്യായത്തിന്റെ ഉദ്ദേശ്യത്തിലേക്ക് ഇത് വിരൽ ചൂണ്ടുന്നത് വ്യക്തമാണ്; ‘മംഗളങ്ങൾ’ (طُوبَى) എന്ന് പറയുന്നതിലൂടെ ഗുറബാക്കളുടെ ശ്രേഷ്ഠത ഇതിൽ വ്യക്തമാക്കുന്നു.