എന്തുകൊണ്ട് മുസ്ലിങ്ങൾ അല്ലാഹുവോടൊപ്പം മറ്റുള്ളവരെ ആരാധിക്കുന്നത് നിരാകരിക്കുന്നു?

ഹനീഫ് ഒലിവർ

നന്ദികേട്

സ്രഷ്ടാവ് നിലനിൽക്കുന്നുണ്ടെന്നും, അവൻ മാത്രമാണ് പ്രപഞ്ചത്തെ നിരന്തരം സൃഷ്ടിക്കുകയും നിലനിർത്തുകയും നിയന്ത്രിക്കുകയും ചെയ്യുന്നതെന്നും ഒരാൾ അംഗീകരിച്ചുകഴിഞ്ഞാൽ, സ്രഷ്ടാവിനെ മാത്രം ആരാധിക്കുകയും അവന് മാത്രം വഴിപ്പെടുകയും ചെയ്യുന്നവർ സത്യത്തിലാണ് നിലകൊള്ളുന്നതെന്ന് യുക്തിപരമായി വ്യക്തമാകും. തീർച്ചയായും, സ്രഷ്ടാവിന്റെ സൃഷ്ടിപരമായ കാര്യങ്ങളിലും നിയന്ത്രണാധികാരങ്ങളിലും അവന്റെ ഏകത്വം അംഗീകരിക്കുകയും, പിന്നീട് അവനോടൊപ്പം മറ്റുള്ളവരെ ആരാധിക്കാനും അവർക്ക് വഴിപ്പെടാനും മുതിരുന്നത് യുക്തിസഹമാണോ?

ذَٰلِكَ بِأَنَّ اللَّهَ هُوَ الْحَقُّ وَأَنَّ مَا يَدْعُونَ مِن دُونِهِ هُوَ الْبَاطِلُ وَأَنَّ اللَّهَ هُوَ الْعَلِيُّ الْكَبِيرُ

‘അതെന്തുകൊണ്ടെന്നാൽ അല്ലാഹുവാണ് സത്യമായിട്ടുള്ളവൻ. അവനു പുറമെ അവർ വിളിച്ച് പ്രാർത്ഥിക്കുന്നതെല്ലാം വ്യർത്ഥമാണ്. അല്ലാഹു തന്നെയാണ് ഉന്നതനും മഹാനും.’¹

മനുഷ്യരാശിക്ക് അവതരിപ്പിക്കപ്പെട്ട അവസാനത്തെ വെളിപാടിൽ, താൻ മാത്രമാണ് ആരാധിക്കപ്പെടാൻ അർഹനെന്നും, അതിനുള്ള കാരണം എന്താണെന്നും സ്രഷ്ടാവ്² വ്യക്തമാക്കിയിട്ടുണ്ട്.³ അതുപോലെത്തന്നെ, നക്ഷത്രങ്ങൾ, മരങ്ങൾ, വിഗ്രഹങ്ങൾ, മലക്കുകൾ, പ്രവാചകന്മാർ,⁴ പുണ്യവാളന്മാർ തുടങ്ങിയ, തനിക്ക് പുറമെ മറ്റുള്ളവരെ ആരാധിക്കുന്നവരുടെയും അവസ്ഥ അവൻ വ്യക്തമാക്കിയിട്ടുണ്ട്.

ആരാധിക്കപ്പെടാനും വഴിപ്പെടാനും അർഹത നൽകുന്ന യാതൊന്നും ഈ ആരാധ്യവസ്തുക്കൾ സൃഷ്ടിച്ചിട്ടില്ലെന്ന് അവൻ കാണിച്ചുതന്നിരിക്കുന്നു. നേരെമറിച്ച്, അവ ഒരു നിശ്ചിത കാലയളവിലേക്ക് മാത്രം നിലനിൽക്കുകയും, സ്രഷ്ടാവിന്റെ നിയമങ്ങൾക്ക് വിധേയമായ വെറുമൊരു സൃഷ്ടിയായി മാഞ്ഞുപോവുകയും ചെയ്തു.

അവൻ നൽകിയ എല്ലാ സൃഷ്ടിപരമായ അനുഗ്രഹങ്ങളെക്കുറിച്ചും നമ്മെ ഓർമ്മിപ്പിച്ച ശേഷം, ശൂന്യതയിൽ നിന്ന് അവൻ ഉണ്ടാക്കിയെടുത്ത അവന്റെ സൃഷ്ടിപ്പിലെ വിസ്മയകരമായ കാര്യങ്ങളിൽ ഏതെങ്കിലും സൃഷ്ടിക്കാൻ നമുക്ക് കഴിയുമോ എന്ന് താഴെ പറയുന്ന സൂക്തങ്ങളിലൂടെ നമ്മുടെ സ്രഷ്ടാവ് നമ്മോട് ചോദിക്കുന്നു. കൂടാതെ, അവൻ നമുക്ക് നൽകിയ എല്ലാറ്റിനും ശേഷം, കാലങ്ങളിലൂടെ ഉയർത്തിക്കൊണ്ടുവരപ്പെടുകയും പിന്നീട് വിസ്മരിക്കപ്പെടുകയും ചെയ്യുന്ന എണ്ണമറ്റ ദൈവങ്ങൾക്കും ദേവതകൾക്കും ഏതെങ്കിലും തരത്തിലുള്ള ഭക്തി ലഭിക്കാൻ അർഹതയുണ്ടോ എന്നും നമ്മോട് ചോദിക്കപ്പെടുന്നു:

أَمَّنْ خَلَقَ السَّمَاوَاتِ وَالْأَرْضَ وَأَنزَلَ لَكُم مِّنَ السَّمَاءِ مَاءً فَأَنبَتْنَا بِهِ حَدَائِقَ ذَاتَ بَهْجَةٍ مَّا كَانَ لَكُمْ أَن تُنبِتُوا شَجَرَهَا ۗ أَإِلَٰهٌ مَّعَ اللَّهِ ۚ بَلْ هُمْ قَوْمٌ يَعْدِلُونَ

‘അതല്ലെങ്കിൽ ആകാശങ്ങളും ഭൂമിയും സൃഷ്ടിക്കുകയും, നിങ്ങൾക്ക് ആകാശത്ത് നിന്ന് വെള്ളം ചൊരിഞ്ഞുതരികയും ചെയ്തവനോ? എന്നിട്ട് ആ വെള്ളം മുഖേന കൗതുകമുള്ള ചില തോട്ടങ്ങൾ നാം മുളപ്പിച്ചു. അതിലെ മരങ്ങൾ മുളപ്പിക്കുവാൻ നിങ്ങൾക്ക് കഴിയുമായിരുന്നില്ല. അല്ലാഹുവോടൊപ്പം വേറെ വല്ല ദൈവവുമുണ്ടോ? അല്ല, അവർ വ്യതിചലിച്ചുപോകുന്ന ഒരു ജനതയാകുന്നു.’

أَمَّن جَعَلَ الْأَرْضَ قَرَارًا وَجَعَلَ خِلَالَهَا أَنْهَارًا وَجَعَلَ لَهَا رَوَاسِيَ وَجَعَلَ بَيْنَ الْبَحْرَيْنِ حَاجِزًا ۗ أَإِلَٰهٌ مَّعَ اللَّهِ ۚ بَلْ أَكْثَرُهُمْ لَا يَعْلَمُونَ

‘അതല്ലെങ്കിൽ ഭൂമിയെ വാസയോഗ്യമാക്കുകയും, അതിന്നിടയിൽ നദികളുണ്ടാക്കുകയും, അതിന് ഉറപ്പുള്ള പർവ്വതങ്ങളുണ്ടാക്കുകയും, രണ്ട് കടലുകൾക്കിടയിൽ ഒരു തടസ്സം ഉണ്ടാക്കുകയും ചെയ്തവനോ? അല്ലാഹുവോടൊപ്പം വേറെ വല്ല ദൈവവുമുണ്ടോ? അല്ല, അവരിൽ അധികപേരും കാര്യങ്ങൾ മനസ്സിലാക്കുന്നില്ല.’

أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ ۗ أَإِلَٰهٌ مَّعَ اللَّهِ ۚ قَلِيلًا مَّا تَذَكَّرُونَ

‘അതല്ലെങ്കിൽ കഷ്ടപ്പെടുന്നവൻ വിളിച്ചു പ്രാർത്ഥിച്ചാൽ അവന് ഉത്തരം നൽകുകയും, വിഷമം അകറ്റിക്കൊടുക്കുകയും, നിങ്ങളെ ഭൂമിയിൽ മുൻഗാമികളുടെ പിൻഗാമികളാക്കുകയും ചെയ്യുന്നവനോ? അല്ലാഹുവോടൊപ്പം വേറെ വല്ല ദൈവവുമുണ്ടോ? കുറച്ചു മാത്രമേ നിങ്ങൾ ആലോചിച്ചു മനസ്സിലാക്കുന്നുള്ളൂ.’

أَمَّن يَهْدِيكُمْ فِي ظُلُمَاتِ الْبَرِّ وَالْبَحْرِ وَمَن يُرْسِلُ الرِّيَاحَ بُشْرًا بَيْنَ يَدَيْ رَحْمَتِهِ ۗ أَإِلَٰهٌ مَّعَ اللَّهِ ۚ تَعَالَى اللَّهُ عَمَّا يُشْرِكُونَ

‘അതല്ലെങ്കിൽ കരയിലെയും കടലിലെയും അന്ധകാരങ്ങളിൽ നിങ്ങൾക്ക് വഴികാണിച്ചുതരികയും, തന്റെ കാരുണ്യത്തിന് മുമ്പായിക്കൊണ്ട് സന്തോഷവാർത്ത അറിയിച്ചുകൊണ്ട് കാറ്റുകളെ അയക്കുകയും ചെയ്യുന്നവനോ? അല്ലാഹുവോടൊപ്പം വേറെ വല്ല ദൈവവുമുണ്ടോ? അവർ പങ്കുചേർക്കുന്നതിനെല്ലാം അല്ലാഹു അത്യുന്നതനായിരിക്കുന്നു.’

أَمَّن يَبْدَأُ الْخَلْقَ ثُمَّ يُعِيدُهُ وَمَن يَرْزُقُكُم مِّنَ السَّمَاءِ وَالْأَرْضِ ۗ أَإِلَٰهٌ مَّعَ اللَّهِ ۚ قُلْ هَاتُوا بُرْهَانَكُمْ إِن كُنتُمْ صَادِقِينَ

‘അതല്ലെങ്കിൽ സൃഷ്ടി ആരംഭിക്കുകയും, പിന്നീട് അത് ആവർത്തിക്കുകയും ചെയ്യുന്നവനും, ആകാശത്തുനിന്നും ഭൂമിയിൽനിന്നും നിങ്ങൾക്ക് ഉപജീവനം നൽകുന്നവനുമായുള്ളവനോ? അല്ലാഹുവോടൊപ്പം വേറെ വല്ല ദൈവവുമുണ്ടോ? പറയുക: നിങ്ങൾ സത്യവാൻമാരാണെങ്കിൽ നിങ്ങൾക്കുള്ള തെളിവ് കൊണ്ടുവരിക.’⁵

ചിന്തിക്കാവുന്നതിൽ വെച്ച് ഏറ്റവും വലിയ കുറ്റകൃത്യം

സൃഷ്ടികൾക്കെതിരെ ചെയ്യപ്പെടുന്ന കുറ്റകൃത്യങ്ങൾ വലിയ സ്വഭാവമുള്ളവയായിരിക്കാം എന്ന് ആളുകൾ സമ്മതിക്കുന്നു. അങ്ങനെയെങ്കിൽ, ഈ സൃഷ്ടികളെ അസ്തിത്വത്തിലേക്ക് കൊണ്ടുവന്നവനെതിരെ ചെയ്യപ്പെടുന്ന കുറ്റകൃത്യത്തിന്റെ തോത് എത്രത്തോളം വലുതായിരിക്കണം?

كَيْفَ تَكْفُرُونَ بِاللَّهِ وَكُنتُمْ أَمْوَاتًا فَأَحْيَاكُمْ ۖ ثُمَّ يُمِيتُكُمْ ثُمَّ يُحْيِيكُمْ ثُمَّ إِلَيْهِ تُرْجَعُونَ

‘നിങ്ങൾക്കെങ്ങനെയാണ് അല്ലാഹുവിൽ അവിശ്വസിക്കാൻ കഴിയുക? നിങ്ങൾ നിർജ്ജീവരായിരുന്ന അവസ്ഥയ്ക്ക് ശേഷം അവൻ നിങ്ങൾക്ക് ജീവൻ നൽകി. പിന്നീട് അവൻ നിങ്ങളെ മരിപ്പിക്കുകയും, വീണ്ടും ജീവിപ്പിക്കുകയും ചെയ്യും. പിന്നീട് അവനിലേക്ക് തന്നെ നിങ്ങൾ മടക്കപ്പെടുന്നതുമാണ്.’⁶

തീർച്ചയായും, പ്രപഞ്ചത്തിന്മേൽ സമ്പൂർണ്ണ അധികാരവും നിയന്ത്രണവുമുള്ളവനിൽ പങ്കുകാരെ ചേർക്കുക എന്നതാണ് ഒരാൾക്ക് ചെയ്യാൻ കഴിയുന്ന ഏറ്റവും വലിയ കുറ്റകൃത്യമെന്ന് ഖുർആനിൽ വ്യക്തമാക്കപ്പെട്ടിട്ടുണ്ട്. എണ്ണമറ്റ രീതികളിൽ അല്ലാഹു അവർക്ക് കരുണയോടെ ഉപജീവനം നൽകിയതിന് ശേഷം, ആളുകൾ അല്ലാഹുവോടൊപ്പം മറ്റുള്ളവരെ ആരാധിക്കുകയും അവർക്ക് വഴിപ്പെടുകയും ചെയ്യുമ്പോഴാണ് ഈ കുറ്റകൃത്യം ചെയ്യപ്പെടുന്നത്.

ഗുരുത്വാകർഷണം പോലെയുള്ള, നമ്മുടെ സ്രഷ്ടാവ് മനുഷ്യരാശിക്ക് നൽകിയ എണ്ണമറ്റ അനുഗ്രഹങ്ങളെക്കുറിച്ച് ചിന്തിക്കുക. ഈ അവിശ്വസനീയമായ ശക്തി കൃത്യമായി സന്തുലിതമാക്കപ്പെട്ടിരിക്കുന്നു, അത് നമ്മെ വായുവിൽ പൊന്തിക്കിടക്കുന്നതിൽ നിന്നോ ഭൂമിയിലേക്ക് അമിതമായി ഭാരം വന്ന് വീഴുന്നതിൽ നിന്നോ തടയുന്നു. അതുപോലെ, നമ്മുടെ ശ്വാസകോശവും ഹൃദയവും വായുവിൽ നിന്ന് ഓക്സിജൻ എങ്ങനെ വേർതിരിച്ചെടുക്കുന്നു എന്ന എണ്ണമറ്റ അനുഗ്രഹത്തെക്കുറിച്ചുള്ള ആഴത്തിലുള്ള ചിന്ത, നമ്മോടുള്ള സ്രഷ്ടാവിന്റെ യുക്തിയുടെയും കഴിവിന്റെയും ഔദാര്യത്തിന്റെയും പൂർണ്ണമായ സ്വഭാവത്തിലേക്ക് വിരൽ ചൂണ്ടുന്നു. ശ്വസന പ്രക്രിയയിലൂടെ, നമ്മുടെ ഹൃദയ-രക്തധമനീ വ്യവസ്ഥയ്ക്ക് പ്രവർത്തിക്കാനും, നമ്മെ ജീവനോടും ആരോഗ്യത്തോടും കൂടി നിലനിർത്താനും കഴിയുന്നു. രസകരമെന്നു പറയട്ടെ, ഒരാളുടെ ഹൃദയം ഏകദേശം എഴുപത് വർഷത്തോളം പ്രവർത്തിക്കുമെന്ന് പ്രതീക്ഷിക്കുന്നത് അസാധ്യമല്ല, എന്നാൽ ഒരു യന്ത്രം ഇതിന്റെ ഒരു ചെറിയ കാലയളവിലെങ്കിലും വിശ്രമമില്ലാതെ പ്രവർത്തിക്കുമെന്ന് നാം പ്രതീക്ഷിക്കാറില്ല.

നമ്മുടെ ദഹനവ്യവസ്ഥയുടെ അത്ഭുതകരമായ സ്വഭാവത്തെക്കുറിച്ചും, നമുക്കാവശ്യമായ ഭക്ഷണത്തിന്റെ എല്ലാ പ്രധാന ഘടകങ്ങളെയും അത് എങ്ങനെ വേർതിരിക്കുന്നു എന്നതിനെക്കുറിച്ചും ചിന്തിക്കുക. നമ്മുടെ ശരീരത്തിന് ആവശ്യമായ പോഷകങ്ങൾ വിതരണം ചെയ്യുന്നതിനോടൊപ്പം, ദോഷകരമായ ഏതൊരു മാലിന്യങ്ങളെയും അത് പുറന്തള്ളുകയും ചെയ്യുന്നു. കൂടാതെ, നമ്മുടെ ദഹനനാളത്തിൽ നിലനിൽക്കുന്ന കുടലിലെ ബാക്ടീരിയകൾ രോഗങ്ങളെയും അണുബാധകളെയും ചെറുക്കുന്ന നമ്മുടെ പ്രതിരോധ വ്യവസ്ഥയുടെ ഒരു പ്രധാന ഭാഗമാണ്.

തീർച്ചയായും, നമ്മിലെ ഓരോ അണുവിന്റെയും ഘടകങ്ങളുടെ സന്തുലിതാവസ്ഥയും നിയന്ത്രണവും ഒരു സ്രഷ്ടാവിന്റെ അസ്തിത്വത്തെ മാത്രമല്ല സൂചിപ്പിക്കുന്നത്, മറിച്ച് അവൻ നമുക്ക് നിരന്തരം നൽകുന്ന മഹത്തായ അനുഗ്രഹങ്ങളെ സാക്ഷ്യപ്പെടുത്തുകയും ചെയ്യുന്നു. ഈ അനുഗ്രഹങ്ങളെക്കുറിച്ച് അശ്രദ്ധരാകുന്നതിലൂടെയോ, അല്ലെങ്കിൽ അവയെ തുടക്കത്തിലേ അംഗീകരിക്കാൻ വിസമ്മതിക്കുന്നതിലൂടെയോ മനുഷ്യരാശി അവയോട് നന്ദികേട് കാണിക്കാൻ പ്രവണത കാണിക്കുന്നു.

أَفَبِالْبَاطِلِ يُؤْمِنُونَ وَبِنِعْمَتِ اللَّهِ هُمْ يَكْفُرُونَ

‘എന്നിട്ടും അവർ അസത്യത്തിൽ വിശ്വസിക്കുകയും, അല്ലാഹുവിന്റെ അനുഗ്രഹത്തെ നിഷേധിക്കുകയുമാണോ ചെയ്യുന്നത്?’⁷

വിവേകമുള്ളവർക്ക് അല്ലാഹു അവർക്ക് നൽകിയ എണ്ണമറ്റ അനുഗ്രഹങ്ങളെക്കുറിച്ച് ചിന്തിക്കാനും അവയുടെ ക്രമീകരണങ്ങളുടെ മികവിനെയും സൗന്ദര്യത്തെയും പൂർണ്ണതയെയും അഭിനന്ദിക്കാനും സാധിക്കുന്നു. എന്നിരുന്നാലും, ഈ സൃഷ്ടികളിൽ കാണാൻ കഴിയുന്ന ഏതൊരു പൂർണ്ണതയും സ്രഷ്ടാവിന്റെ പൂർണ്ണതയുമായി താരതമ്യം ചെയ്യാനാവാത്തതാണ്. ഈ തിരിച്ചറിവിലെത്തുന്നവർ മനസ്സിലാക്കുന്നത്, ഈ സൃഷ്ടിപരമായ അനുഗ്രഹങ്ങളെല്ലാം അവയുടെ സ്രഷ്ടാവിനെ മഹത്വപ്പെടുത്തുന്നതിലേക്കും, അവനോടുള്ള നന്ദിയിലേക്കും അടുപ്പത്തിലേക്കും, എല്ലാവിധത്തിലുള്ള ആരാധനകളിലും വഴിപാടുകളിലും അവനെ മാത്രം ഏകനാക്കുന്നതിലെ ആത്മാർത്ഥതയിലേക്കുമാണ് വിളിക്കുന്നത് എന്നാണ്.

എന്നിരുന്നാലും, അറിയപ്പെടുന്ന എല്ലാവിധ ആരാധനകളും നിരന്തരമായി നിലനിർത്താൻ ഒരാൾ ശ്രമിച്ചാൽ പോലും, ഈ അനുഗ്രഹങ്ങൾക്ക് സ്രഷ്ടാവിന് നൽകേണ്ട നന്ദി പൂർത്തീകരിക്കാൻ ആ വ്യക്തിക്ക് ഒരിക്കലും കഴിയില്ല. ഇക്കാരണത്താൽ, അല്ലാഹു ഏറെ പൊറുക്കുന്നവനും അത്യധികം കരുണാനിധിയുമാകുന്നു, അവൻ ധാരാളം നൽകുന്നുണ്ടെങ്കിലും വളരെ ലളിതമായ നന്ദിപ്രകടനം കൊണ്ട് അവൻ തൃപ്തിപ്പെടുന്നു.

وَإِن تَعُدُّوا نِعْمَةَ اللَّهِ لَا تُحْصُوهَا ۗ إِنَّ اللَّهَ لَغَفُورٌ رَّحِيمٌ

‘അല്ലാഹുവിന്റെ അനുഗ്രഹങ്ങൾ നിങ്ങൾ എണ്ണുകയാണെങ്കിൽ നിങ്ങൾക്കവ കണക്കാക്കാനാവില്ല. തീർച്ചയായും അല്ലാഹു ഏറെ പൊറുക്കുന്നവനും കരുണാനിധിയുമാകുന്നു.’⁸

കേൾവി, കാഴ്ച, ഗ്രഹണശേഷി എന്നിവ നമുക്ക് നൽകിയവൻ വ്യക്തമാക്കിയിട്ടുള്ളത് അല്ലാഹുവോടൊപ്പം മറ്റുള്ളവരെ ആരാധിക്കുന്നതും അവർക്ക് വഴിപ്പെടുന്നതും വലിയൊരു നന്ദികേടാണെന്നാണ്. ഈ അനുഗ്രഹങ്ങളിലൊന്നുപോലും ഉണ്ടാക്കുന്നതിൽ ഈ ആരാധ്യവസ്തുക്കൾ യാതൊരു പങ്കും വഹിച്ചിട്ടില്ല എന്ന് മനസ്സിലാക്കുമ്പോൾ ഇത് പ്രത്യേകിച്ചും ബോധ്യമാകുന്നതാണ്. തൽഫലമായി, ഒരാൾ പശ്ചാത്തപിക്കാതെ ഈ അവസ്ഥയിൽ മരണപ്പെട്ടാൽ ഒരിക്കലും പൊറുക്കപ്പെടാത്ത ഒരേയൊരു പാപം ഇതാണ്:

إِنَّ اللَّهَ لَا يَغْفِرُ أَن يُشْرَكَ بِهِ وَيَغْفِرُ مَا دُونَ ذَٰلِكَ لِمَن يَشَاءُ ۚ وَمَن يُشْرِكْ بِاللَّهِ فَقَدِ افْتَرَىٰ إِثْمًا عَظِيمًا

‘തന്നോട് പങ്കുചേർക്കപ്പെടുന്നത് അല്ലാഹു ഒരിക്കലും പൊറുക്കുകയില്ല. അതിന് താഴെയുള്ളതെല്ലാം അവൻ ഉദ്ദേശിക്കുന്നവർക്ക് അവൻ പൊറുത്തുകൊടുക്കുന്നതാണ്. ആർ അല്ലാഹുവോട് പങ്കുചേർക്കുന്നുവോ അവൻ തീർച്ചയായും വലിയൊരു പാപമാണ് ചമച്ചുണ്ടാക്കിയിരിക്കുന്നത്.’⁹

ഈസാ നബി അലൈഹിസ്സലാം ഒരു ത്രിത്വത്തിന്റെ ഭാഗമാണെന്നും, അതിനാൽ അല്ലാഹുവോടൊപ്പം ആരാധിക്കപ്പെടാൻ അർഹനാണെന്നും പല ക്രിസ്ത്യാനികളും വിശ്വസിക്കുന്നു. ഇത്തരത്തിൽ ദൈവീകവൽക്കരിക്കുന്ന കാര്യത്തിൽ ക്രിസ്ത്യാനികൾ മാത്രമല്ല ഉള്ളത്. ഇസ്ലാമിലേക്ക് തങ്ങളെത്തന്നെ ചേർത്തുപറയുന്ന ചില ആളുകൾ ഈസാ നബിയെക്കാൾ വളരെ താഴെ പദവിയുള്ള വ്യക്തികളെ ദൈവീകവൽക്കരിച്ചിട്ടുണ്ട്. ചിന്തിച്ചുനോക്കിയാൽ, ഈ വ്യക്തികളൊന്നും എത്രത്തോളം മഹത്തുക്കളോ ഭക്തിയുള്ളവരോ ആയിരുന്നാലും, ആരാധനയുടെ യാതൊരു പങ്കിനും അവർ അർഹരല്ലെന്ന് മനസ്സിലാക്കാൻ സാധിക്കും.

مَّا الْمَسِيحُ ابْنُ مَرْيَمَ إِلَّا رَسُولٌ قَدْ خَلَتْ مِن قَبْلِهِ الرُّسُلُ وَأُمُّهُ صِدِّيقَةٌ ۖ كَانَا يَأْكُلَانِ الطَّعَامَ ۗ انظُرْ كَيْفَ نُبَيِّنُ لَهُمُ الْآيَاتِ ثُمَّ انظُرْ أَنَّىٰ يُؤْفَكُونَ

‘മർയമിന്റെ മകൻ മസീഹ് ഒരു ദൂതൻ മാത്രമാകുന്നു. അദ്ദേഹത്തിന് മുമ്പും ദൂതന്മാർ കഴിഞ്ഞുപോയിട്ടുണ്ട്. അദ്ദേഹത്തിന്റെ മാതാവ് സത്യവതിയുമാകുന്നു.¹⁰ അവർ ഇരുവരും ഭക്ഷണം കഴിക്കുന്നവരായിരുന്നു.¹¹ നോക്കൂ; എപ്രകാരമാണ് നാം അവർക്ക് ദൃഷ്ടാന്തങ്ങൾ വിവരിച്ചുകൊടുക്കുന്നതെന്ന്. വീണ്ടും നോക്കൂ; എങ്ങനെയാണ് അവർ വ്യതിചലിപ്പിക്കപ്പെടുന്നതെന്ന്.’¹²

അല്ലാഹുവിനു പുറമെ ആരാധിക്കപ്പെടുന്ന ഈ വസ്തുക്കളോ വ്യക്തികളോ യാതൊന്നും സൃഷ്ടിക്കാൻ കഴിവില്ലാത്തവരാണ് എന്ന് മാത്രമല്ല, ആളുകൾ അവരോട് നടത്തുന്ന പ്രാർത്ഥനകൾ കേൾക്കാൻ പോലും അവർക്ക് കഴിയില്ല. തൽഫലമായി, ഈ ആരാധ്യവസ്തുക്കൾക്ക് അവർക്ക് യാതൊരു ഉപകാരമോ ഉപദ്രവമോ ചെയ്യാൻ കഴിയില്ല.

وَمَنْ أَضَلُّ مِمَّن يَدْعُو مِن دُونِ اللَّهِ مَن لَّا يَسْتَجِيبُ لَهُ إِلَىٰ يَوْمِ الْقِيَامَةِ وَهُمْ عَن دُعَائِهِمْ غَافِلُونَ

‘അല്ലാഹുവിന് പുറമെ, ഉയിർത്തെഴുന്നേൽപ്പിന്റെ നാളുവരെയും തനിക്ക് ഉത്തരം നൽകാത്തവരെ വിളിച്ച് പ്രാർത്ഥിക്കുന്നവനേക്കാൾ വഴിപിഴച്ചവൻ ആരുണ്ട്? അവരാകട്ടെ ഇവരുടെ പ്രാർത്ഥനയെപ്പറ്റി അശ്രദ്ധരുമാകുന്നു.’¹³

ബഹുദൈവാരാധനയോടുള്ള ലിബറലിസ്റ്റ് പ്രത്യയശാസ്ത്രങ്ങളുടെ കാഴ്ചപ്പാട്

ലിബറൽ ചിന്താഗതികൾ പ്രകാരം, സ്രഷ്ടാവിനോടുള്ള ഇത്തരം ബഹുദൈവാരാധനാപരമായ അതിക്രമങ്ങൾ കുറ്റകൃത്യങ്ങളായി അംഗീകരിക്കപ്പെടുന്നില്ല. നേരെമറിച്ച്, അവ പ്രോത്സാഹിപ്പിക്കപ്പെടുകയും, അവയിൽ പങ്കുചേരുന്നവർ മറ്റാരെയും പോലെയുള്ളവരായോ അല്ലെങ്കിൽ പലപ്പോഴും മറ്റുള്ളവരെക്കാൾ മികച്ചവരായോ പരിഗണിക്കപ്പെടുകയും ചെയ്യുന്നു. മറുവശത്ത്, പ്രവാചകന്മാരുടെ പാത സൂക്ഷ്മമായി പിൻപറ്റുകയും എല്ലാ ആരാധനകളിലും അനുസരണങ്ങളിലും സ്രഷ്ടാവിനെ മാത്രം ഏകനാക്കുകയും ചെയ്യുന്നവർ യാഥാസ്ഥിതികരും വഴിപിഴച്ചവരുമായി കണക്കാക്കപ്പെടുന്നു.

أَمَّنْ هُوَ قَانِتٌ آنَاءَ اللَّيْلِ سَاجِدًا وَقَائِمًا يَحْذَرُ الْآخِرَةَ وَيَرْجُو رَحْمَةَ رَبِّهِ ۗ قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ ۗ إِنَّمَا يَتَذَكَّرُ أُولُو الْأَلْبَابِ

‘അതല്ലെങ്കിൽ, പരലോകത്തെ ഭയപ്പെടുകയും തന്റെ രക്ഷിതാവിന്റെ കാരുണ്യം ആഗ്രഹിക്കുകയും ചെയ്തുകൊണ്ട് രാത്രിസമയങ്ങളിൽ സാഷ്ടാംഗം ചെയ്തുകൊണ്ടും നിന്നുനമസ്കരിച്ചുകൊണ്ടും ഭക്തിയോടെ നിർവ്വഹിക്കുന്നവനോ? പറയുക: അറിവുള്ളവരും അറിവില്ലാത്തവരും സമമാകുമോ? ബുദ്ധിമാന്മാർ മാത്രമേ ആലോചിച്ചു മനസ്സിലാക്കുകയുള്ളൂ.’¹⁴

---

1. അൽ ഹജ്ജ് – 62
2. നിലവിലുള്ള സകലതിനെയും സൃഷ്ടിച്ചവനായ ഒരേയൊരു യഥാർത്ഥ ദൈവം, അവന് യാതൊരു പങ്കുകാരോ സമന്മാരോ ഇല്ല; അവന്റെ സൃഷ്ടിപരമായ കഴിവുകളിലോ, അവനെ മാത്രം ആരാധിക്കാനുള്ള അവന്റെ അവകാശത്തിലോ.
3. ഏകദൈവാരാധനയെ തങ്ങളുടെ പ്രബോധനത്തിന്റെ തുടക്കവും ഒടുക്കവുമാക്കുന്നതിൽ എല്ലാ പ്രവാചകന്മാരും വ്യക്തവും സുസ്ഥിരവുമായ ഒരു രീതിശാസ്ത്രം പിൻതുടർന്നു. പഴയനിയമം അല്ലാഹുവിനെ മാത്രം ആരാധനകളിൽ ഏകനാക്കണമെന്ന് ആഹ്വാനം ചെയ്യുന്ന വചനങ്ങൾ കൊണ്ട് നിറഞ്ഞിരിക്കുന്നു. ആവർത്തനപുസ്തകം 6:13-ൽ, ദൈവത്തെ മാത്രമേ ആരാധിക്കാവൂ എന്ന് പരാമർശിച്ചിരിക്കുന്നു: “നിന്റെ ദൈവമായ കർത്താവിനെ ഭയപ്പെടുക, അവനെ മാത്രം സേവിക്കുക, അവന്റെ നാമത്തിൽ നിന്റെ ശപഥങ്ങൾ എടുക്കുക.” ഹോശേയ 13:4 പ്രസ്താവിക്കുന്നത്, തന്റെ ദാസന്മാരെ തന്റെ ശിക്ഷയിൽ നിന്ന് രക്ഷിക്കാൻ അവനല്ലാതെ മറ്റൊരു ദൈവമില്ല എന്നാണ്: “ഈജിപ്തിൽ നിന്ന് നിന്നെ കൊണ്ടുവന്ന നിന്റെ ദൈവമായ കർത്താവ് ഞാനാകുന്നു. എനിക്കല്ലാതെ മറ്റൊരു ദൈവത്തെയും നീ അംഗീകരിക്കരുത്, എനിക്കല്ലാതെ മറ്റൊരു രക്ഷകനുമില്ല.”
4. പുതിയനിയമത്തിൽ ഈസാ നബിക്ക് അലൈഹിസ്സലാം ദൈവത്വം സൂചിപ്പിക്കുന്ന ചില വചനങ്ങൾ ഉണ്ടെങ്കിലും, ഈ വചനങ്ങൾ മറ്റ് പല വചനങ്ങളോടും വ്യക്തമായി വൈരുദ്ധ്യം പുലർത്തുന്നവയാണ്, അതിൽ ഈസാ നബി അലൈഹിസ്സലാം തന്നെ ഒരു പ്രവാചകനായി അയച്ചവന് മാത്രമാണ് ദൈവത്വം സ്ഥിരീകരിക്കുന്നത്, അല്ലാതെ ഒരു ദൈവമായല്ല: “ഏക സത്യദൈവമായ നിന്നെയും നീ അയച്ച ഈസായെയും അവർ അറിയുക എന്നതാണ് നിത്യജീവൻ.” (യോഹന്നാൻ 17:3). ഈസാ നബിക്ക് അലൈഹിസ്സലാം ദൈവീക പദവി നൽകുന്ന ന്യൂനപക്ഷം വചനങ്ങൾ പുതിയനിയമത്തിൽ നിലനിൽക്കുന്നത് സത്യസന്ധരല്ലാത്ത പുരോഹിതന്മാരും പകർപ്പെഴുത്തുകാരും യഥാർത്ഥ ഗ്രന്ഥങ്ങളിൽ വരുത്തിയ കൂട്ടിച്ചേർക്കലുകൾ കാരണമാണ്. ഓരോ പ്രവാചകന്റെയും ആഹ്വാനം തങ്ങൾ ആരാധിക്കപ്പെടണം എന്നായിരുന്നില്ല, മറിച്ച് ആളുകളോട് പറയുകയായിരുന്നു, “നിങ്ങൾ അല്ലാഹുവിനെ ആരാധിക്കുക: നിങ്ങൾക്ക് അവനല്ലാതെ മറ്റൊരു ദൈവമില്ല.” (ഖുർആൻ 23:32). തന്നെ അയച്ചവന്റെ ഏകദൈവത്വത്തെക്കുറിച്ച് മനുഷ്യരാശിയെ അറിയിക്കാനുള്ള തന്റെ ഉത്തരവാദിത്തം നിറവേറ്റിയതിനാൽ, തനിക്ക് മുമ്പ് വന്ന പ്രവാചകന്മാരിൽ നിന്ന് ഈസാ നബി വ്യത്യാസപ്പെട്ടിരുന്നില്ല. ഖുർആനിൽ കാണപ്പെടുന്നത്, അതായത്, “അവനല്ലാതെ മറ്റൊന്നും ആരാധിക്കപ്പെടാനോ സേവിക്കപ്പെടാനോ അർഹമല്ല,” എന്നത് തന്നെയാണ് ഈസാ നബിയും അലൈഹിസ്സലാം എല്ലാ പ്രവാചകന്മാരും പഠിപ്പിച്ചത്. ഈസാ നബിക്ക് ശേഷം വന്നവർ മാത്രമാണ് അദ്ദേഹത്തിന്റെ സന്ദേശം മാറ്റിയത്: “എഴുതപ്പെട്ടിരിക്കുന്നതുപോലെ: നിന്റെ ദൈവമായ കർത്താവിനെ ആരാധിക്കുക, അവനെ മാത്രം സേവിക്കുക.” (മത്തായി 4:10).
5. അൻ നംൽ – 60-64
6. അൽ ബഖറ – 28
7. അൻ നഹ്‌ൽ – 72
8. അൻ നഹ്‌ൽ – 18
9. അൻ നിസാഅ് – 48
10. അതായത്: അവർ അല്ലാഹുവിന്റെ വചനങ്ങളിലും അവന്റെ ഗ്രന്ഥങ്ങളിലും വിശ്വസിച്ചിരുന്നു.
11. അതായത്: മറ്റേതൊരു മനുഷ്യനെയും പോലെ അവർ ഇരുവരും ഭക്ഷണം കഴിക്കുന്നവരായിരുന്നു, അതേസമയം അല്ലാഹുവിന് ആഹാരം ആവശ്യമില്ല. ഈസാ നബി ഭക്ഷണം കഴിക്കുന്ന ആളായിരുന്നുവെങ്കിൽ, അദ്ദേഹം ഒരു ദൈവീക ത്രിത്വത്തിന്റെ ഭാഗമാണെന്നോ, അല്ലെങ്കിൽ അദ്ദേഹം നാഥനാണെന്ന് വിളിക്കപ്പെടണമെന്നോ, അല്ലെങ്കിൽ അല്ലാഹുവോടൊപ്പം അദ്ദേഹവും ആരാധിക്കപ്പെടണമെന്നോ വിശ്വസിക്കുന്നത് യുക്തിസഹമല്ല.
12. അൽ മാഇദ – 75
13. അൽ അഹ്ഖാഫ് – 5
14. അസ് സുമർ – 9