സലഫി മൻഹജിനെ മുറുകെപ്പിടിക്കൽ

ശൈഖ് റബീഅ് ബിൻ ഹാദീ ഉമൈർ അൽ-മദ്ഖലി

തീർച്ചയായും സർവ്വ സ്തുതിയും അല്ലാഹുവിനാകുന്നു. നാം അവനെ സ്തുതിക്കുകയും, അവനോട് മാത്രം സഹായം തേടുകയും, അവനോട് പാപമോചനം പ്രാർത്ഥിക്കുകയും ചെയ്യുന്നു. നമ്മുടെ ദേഹങ്ങളുടെ തിന്മകളിൽ നിന്നും നമ്മുടെ ദുഷ്പ്രവൃത്തികളിൽ നിന്നും നാം അല്ലാഹുവിനോട് ശരണം തേടുന്നു. അല്ലാഹു ആർക്ക് സന്മാർഗ്ഗം നൽകിയോ അവനെ പിഴപ്പിക്കാൻ ആർക്കും സാധ്യമല്ല. അവൻ ആരെ വഴിപിഴപ്പിച്ചുവോ അവനെ നേർവഴിയിലാക്കാനും ആർക്കും സാധ്യമല്ല. അല്ലാഹുവല്ലാതെ ആരാധനക്കർഹനായി മറ്റാരുമില്ലെന്നും, അവൻ ഏകനാണെന്നും അവന് യാതൊരു പങ്കുകാരുമില്ലെന്നും ഞാൻ സാക്ഷ്യം വഹിക്കുന്നു. മുഹമ്മദ് നബി ﷺ അവൻ്റെ ദാസനും ദൂതനുമാണെന്നും ഞാൻ സാക്ഷ്യം വഹിക്കുന്നു.

يَـٰٓأَيُّهَا ٱلَّذِينَ ءَامَنُوا۟ ٱتَّقُوا۟ ٱللَّهَ حَقَّ تُقَاتِهِۦ وَلَا تَمُوتُنَّ إِلَّا وَأَنتُم مُّسْلِمُونَ

സത്യവിശ്വാസികളേ, നിങ്ങൾ അല്ലാഹുവിനെ സൂക്ഷിക്കേണ്ട മുറപ്രകാരം സൂക്ഷിക്കുക. നിങ്ങൾ മുസ്ലിംകളായിക്കൊണ്ടല്ലാതെ മരിക്കാനിടയാകരുത്. ¹

يَـٰٓأَيُّهَا ٱلنَّاسُ ٱتَّقُوا۟ رَبَّكُمُ ٱلَّذِى خَلَقَكُم مِّن نَّفْسٍ وَٰحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَآءً ۚ وَٱتَّقُوا۟ ٱللَّهَ ٱلَّذِى تَسَآءَلُونَ بِهِۦ وَٱلْأَرْحَامَ ۚ إِنَّ ٱللَّهَ كَانَ عَلَيْكُمْ رَقِيبًا

മനുഷ്യരേ, നിങ്ങളെ ഒരേയൊരു സത്തയിൽ നിന്ന് സൃഷ്ടിച്ചവനായ നിങ്ങളുടെ രക്ഷിതാവിനെ നിങ്ങൾ സൂക്ഷിക്കുക. അതിൽ നിന്നുതന്നെ അതിൻ്റെ ഇണയെയും അവൻ സൃഷ്ടിച്ചു. അങ്ങനെ അവർ ഇരുവരിലും നിന്നായി ധാരാളം പുരുഷന്മാരെയും സ്ത്രീകളെയും അവൻ വ്യാപിപ്പിച്ചു. ഏതൊരു അല്ലാഹുവിൻ്റെ പേരിൽ നിങ്ങൾ അന്യോന്യം ചോദിച്ചുകൊണ്ടിരിക്കുന്നുവോ അവനെ നിങ്ങൾ സൂക്ഷിക്കുക. കുടുംബബന്ധങ്ങളെയും (നിങ്ങൾ സൂക്ഷിക്കുക). തീർച്ചയായും അല്ലാഹു നിങ്ങളെ നിരീക്ഷിച്ചുകൊണ്ടിരിക്കുന്നവനാകുന്നു. ²

يَـٰٓأَيُّهَا ٱلَّذِينَ ءَامَنُوا۟ ٱتَّقُوا۟ ٱللَّهَ وَقُولُوا۟ قَوْلًا سَدِيدًا * يُصْلِحْ لَكُمْ أَعْمَـٰلَكُمْ وَيَغْفِرْ لَكُمْ ذُنُوبَكُمْ ۗ وَمَن يُطِعِ ٱللَّهَ وَرَسُولَهُۥ فَقَدْ فَازَ فَوْزًا عَظِيمًا

സത്യവിശ്വാസികളേ, നിങ്ങൾ അല്ലാഹുവിനെ സൂക്ഷിക്കുകയും ശരിയായ വാക്ക് പറയുകയും ചെയ്യുക. എങ്കിൽ അവൻ നിങ്ങൾക്ക് നിങ്ങളുടെ കർമ്മങ്ങൾ നന്നാക്കിത്തരികയും നിങ്ങളുടെ പാപങ്ങൾ അവൻ പൊറുത്തുതരികയും ചെയ്യും. അല്ലാഹുവെയും അവൻ്റെ ദൂതനെയും ആർ അനുസരിക്കുന്നുവോ അവൻ മഹത്തായ വിജയം നേടിയിരിക്കുന്നു. ³

أَمَّا بَعْدُ: فَإِنَّ أَصْدَقَ الْحَدِيثِ كِتَابُ اللهِ، وَخَيْرَ الْهَدْيِ هَدْيُ مُحَمَّدٍ، وَشَرَّ الْأُمُورِ مُحْدَثَاتُهَا، وَكُلَّ مُحْدَثَةٍ بِدْعَةٌ، وَكُلَّ بِدْعَةٍ ضَلَالَةٌ

അതിന് ശേഷം അറിയുക: തീർച്ചയായും സംസാരങ്ങളിൽ വെച്ച് ഏറ്റവും സത്യസന്ധമായത് അല്ലാഹുവിൻ്റെ ഗ്രന്ഥമാണ്. മാർഗ്ഗദർശനങ്ങളിൽ വെച്ച് ഏറ്റവും ഉത്തമമായത് മുഹമ്മദ് നബി ﷺ യുടെ മാർഗ്ഗദർശനമാണ്. കാര്യങ്ങളിൽ വെച്ച് ഏറ്റവും മോശപ്പെട്ടത് (മതത്തിൽ) പുതുതായി നിർമ്മിക്കപ്പെട്ടവയാണ്. പുതുതായി നിർമ്മിക്കപ്പെട്ടവയെല്ലാം ബിദ്അത്താണ്. എല്ലാ ബിദ്അത്തുകളും വഴികേടാണ്.

അല്ലാഹു അനുഗ്രഹിക്കട്ടെ എന്ന് ഞാൻ പ്രാർത്ഥിക്കുന്ന നമ്മുടെ ബഹുമാന്യനായ ശൈഖുമായും അദ്ദേഹത്തിൻ്റെ ശിഷ്യന്മാരുമായും കണ്ടുമുട്ടാൻ കഴിഞ്ഞത് വളരെ സന്തോഷകരമായ ഒരു അവസരമാണ്. മുഹമ്മദ് നബി ﷺ യുടെ സുന്നത്തിൻ്റെ പതാകവാഹകരായി, അവരുടെ സച്ചരിതരായ മുൻഗാമികളെപ്പോലെ അല്ലാഹുവിൻ്റെ തൗഹീദും റസൂൽ ﷺ യുടെ സുന്നത്തും പ്രചരിപ്പിക്കുന്നതിലും, റസൂൽ ﷺ താക്കീത് നൽകിയ ബിദ്അത്തുകളെയും അന്ധവിശ്വാസങ്ങളെയും ഇല്ലാതാക്കുന്നതിലും അവരെ അല്ലാഹു തബാറക വതആല അനുഗ്രഹിക്കട്ടെ എന്ന് ഞാൻ പ്രാർത്ഥിക്കുന്നു.

തീർച്ചയായും അല്ലാഹു തബാറക വതആല മുഹമ്മദ് നബി ﷺ യെ ലോകർക്ക് കാരുണ്യമായിക്കൊണ്ടും, ജനങ്ങളെ അന്ധകാരങ്ങളിൽ നിന്ന് വെളിച്ചത്തിലേക്ക് കൊണ്ടുവരുന്നതിനും വേണ്ടിയാണ് നിയോഗിച്ചത്. അങ്ങനെ അവിടുന്ന് തൻ്റെ പ്രബോധന ദൗത്യം പൂർത്തീകരിക്കുകയും അമാനത്ത് വിശ്വസ്തതയോടെ കൈമാറുകയും ചെയ്തു. അവിടുത്തെ മുഖേന അല്ലാഹു ജനങ്ങളെ അന്ധകാരങ്ങളിൽ നിന്ന് വെളിച്ചത്തിലേക്ക് നയിച്ചു. അതിനാൽ അല്ലാഹുവിൻ്റെ സ്വലാത്തും സലാമും ആ പ്രവാചകൻ്റെ മേൽ എപ്പോഴും ഉണ്ടായിരിക്കട്ടെ.

ഈ പ്രവാചകൻ ﷺ യിൽ വിശ്വസിക്കാനും, അവിടുത്തെ അനുസരിക്കാനും പിൻപറ്റാനും അല്ലാഹു നമ്മെ ചുമതലപ്പെടുത്തിയിരിക്കുന്നു. ഐഹിക ലോകത്തും പരലോകത്തുമുള്ള നമ്മുടെ വിജയം അവിടുത്തെ അനുസരിക്കുന്നതിലും, അവിടുത്തെ വചനങ്ങളെ സത്യപ്പെടുത്തുന്നതിലും, അവിടുത്തെ പിൻപറ്റുന്നതിലും മാത്രമാണ് നിലകൊള്ളുന്നത്. അതിനാൽ തന്നെ ഈ പ്രവാചകൻ ﷺ യെ അനുസരിക്കുന്നതിനും പിൻപറ്റുന്നതിനും അല്ലാഹു തബാറക വതആല ധാരാളം ആയത്തുകളിലൂടെ നമ്മെ പ്രേരിപ്പിക്കുകയും, അവിടുത്തെ ധിക്കരിക്കുന്നതിനെയും എതിർക്കുന്നതിനെയും താക്കീത് ചെയ്യുകയും ചെയ്തിട്ടുണ്ട്. മാത്രമല്ല, അവിടുത്തെ എതിർക്കുന്നവർക്ക് നരകശിക്ഷയുണ്ടെന്ന് അവൻ മുന്നറിയിപ്പ് നൽകുകയും ചെയ്തിരിക്കുന്നു. അതിൽ നിന്ന് നാം അല്ലാഹുവിനോട് ശരണം തേടുന്നു.

അതുകൊണ്ട് ഈ മാന്യനായ പ്രവാചകൻ ﷺ യെ ഏതെങ്കിലുമൊരു കാര്യത്തിൽ എതിർക്കുന്നതിനെ നാം അങ്ങേയറ്റം കരുതിയിരിക്കേണ്ടതുണ്ട്. അല്ലാഹു തബാറക വതആലയുടെ ഈ വചനം നാം എപ്പോഴും നമ്മുടെ കൺമുന്നിൽ വെക്കേണ്ടതാണ്:

وَٱعْتَصِمُوا۟ بِحَبْلِ ٱللَّهِ جَمِيعًا وَلَا تَفَرَّقُوا۟ ۚ وَٱذْكُرُوا۟ نِعْمَتَ ٱللَّهِ عَلَيْكُمْ إِذْ كُنتُمْ أَعْدَآءً فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِۦٓ إِخْوَٰنًا

നിങ്ങളെല്ലാവരും ഒന്നിച്ച് അല്ലാഹുവിൻ്റെ കയർ മുറുകെ പിടിക്കുക. നിങ്ങൾ ഭിന്നിച്ചുപോകരുത്. നിങ്ങൾ അന്യോന്യം ശത്രുക്കളായിരുന്നപ്പോൾ അല്ലാഹു നിങ്ങൾക്ക് ചെയ്ത അനുഗ്രഹം ഓർക്കുകയും ചെയ്യുക. അവൻ നിങ്ങളുടെ മനസ്സുകൾ തമ്മിൽ ഇണക്കി. അങ്ങനെ അവൻ്റെ അനുഗ്രഹത്താൽ നിങ്ങൾ സഹോദരങ്ങളായിത്തീർന്നു. ⁴

ഈ സമുദായത്തിൻ്റെ കാര്യങ്ങൾ ഈ പ്രവാചകൻ ﷺ യെ സത്യസന്ധതയോടും ആത്മാർത്ഥതയോടും കൂടി അനുസരിക്കുകയും പിൻപറ്റുകയും ചെയ്തുകൊണ്ടല്ലാതെ നേരെയാവുകയില്ല. അതുപോലെ അല്ലാഹുവിൻ്റെ കയറാകുന്ന അല്ലാഹുവിൻ്റെ ഗ്രന്ഥവും റസൂൽ ﷺ യുടെ സുന്നത്തും മുറുകെപ്പിടിച്ചുകൊണ്ടല്ലാതെ സമുദായത്തിന് നിലനിൽപ്പില്ല.

ഈ അടിസ്ഥാനങ്ങളില്ലാതെ ഈ സമുദായത്തിന് ഒരിക്കലും നിലനിൽക്കാൻ സാധിക്കുകയില്ല. അതുകൊണ്ട് വ്യക്തികളായാലും സംഘങ്ങളായാലും, ജനങ്ങളായാലും ഭരണാധികാരികളായാലും നാമെല്ലാവരും അല്ലാഹു തബാറക വതആലയുടെ കയർ മുറുകെ പിടിക്കേണ്ടത് അനിവാര്യമാണ്. അല്ലാഹുവിൻ്റെ കയർ നാം മുറുകെ പിടിക്കുക എന്നതും, അവൻ്റെയും അവൻ്റെ റസൂൽ ﷺ യുടെയും സച്ചരിതരായ ഖലീഫമാരുടെയും മാർഗ്ഗം—റസൂൽ ﷺ നമ്മോട് വസ്വിയ്യത്ത് ചെയ്തതുപോലെയും സൂചിപ്പിക്കപ്പെട്ട ആയത്തുകൾ കൽപിക്കുന്നതുപോലെയും—അണപ്പല്ലുകൾ കൊണ്ട് നാം മുറുകെ കടിച്ചുപിടിക്കുക എന്നതും മാത്രമാണ് നമ്മുടെ റബ്ബ് നമ്മിൽ നിന്ന് തൃപ്തിപ്പെടുന്നത്.

ഇതൊരു മഹത്തായ കാര്യമാണ്. എന്നാൽ ഇന്ന് നാം ഈ സമുദായം ഛിന്നഭിന്നമായിരിക്കുന്നതാണ് കാണുന്നത്. എന്താണ് അതിൻ്റെ രഹസ്യം?! അല്ലാഹു കാത്തുരക്ഷിക്കട്ടെ, ദേഹേച്ഛകളെ പിൻപറ്റിയതാണ് അതിന് കാരണം. അഭിപ്രായവ്യത്യാസങ്ങളുള്ള കാര്യങ്ങളിൽ നാം അല്ലാഹുവിൻ്റെയും റസൂൽ ﷺ യുടെയും വിധി തേടിയിരുന്നെങ്കിൽ ഒരിക്കലും ഈ ഭിന്നതകൾ തുടരുമായിരുന്നില്ല. എന്നാൽ ഈ ഭിന്നതകൾ അവസാനിക്കാതെ തുടരുന്നത് തന്നെ തെളിയിക്കുന്നത്, ധാരാളം ആളുകൾ തങ്ങളുടെ ദേഹേച്ഛകളെ പിൻപറ്റുകയും തന്നിഷ്ടപ്രകാരം പ്രവർത്തിക്കുകയും ചെയ്യുന്നുവെന്നാണ്. അവർ അല്ലാഹു തബാറക വതആലയുടെ ഈ നിർദ്ദേശങ്ങൾക്ക് കീഴ്പ്പെടുന്നില്ല:

فَإِن تَنَـٰزَعْتُمْ فِى شَىْءٍ فَرُدُّوهُ إِلَى ٱللَّهِ وَٱلرَّسُولِ إِن كُنتُمْ تُؤْمِنُونَ بِٱللَّهِ وَٱلْيَوْمِ ٱلْـَٔاخِرِ ۚ ذَٰلِكَ خَيْرٌ وَأَحْسَنُ تَأْوِيلًا

ഇനി വല്ല കാര്യത്തിലും നിങ്ങൾക്കിടയിൽ തർക്കമുണ്ടാകുകയാണെങ്കിൽ നിങ്ങളത് അല്ലാഹുവിലേക്കും റസൂലിലേക്കും മടക്കുക. നിങ്ങൾ അല്ലാഹുവിലും അന്ത്യദിനത്തിലും വിശ്വസിക്കുന്നവരാണെങ്കിൽ (അതാണ് വേണ്ടത്‌). അതാണ് ഉത്തമവും കൂടുതൽ നല്ല പര്യവസാനമുള്ളതും. ⁵

അതിനാൽ അല്ലാഹുവിൻ്റെയും റസൂൽ ﷺ യുടെയും വിധി സ്വീകരിക്കേണ്ടത് അനിവാര്യമാണ്. ഇതിലൂടെ മാത്രമേ ഭിന്നതകൾ അവസാനിക്കുകയും, ഈ ഛിന്നഭിന്നമായ അവസ്ഥ ഇല്ലാതാവുകയും, ദേഹേച്ഛകൾ നീങ്ങിപ്പോകുകയും ചെയ്യുകയുള്ളൂ. നാം ഈയൊരു നിലവാരത്തിലല്ല എങ്കിൽ പിന്നെ നമ്മുടെ മുൻപിൽ നഷ്ടങ്ങൾ മാത്രമാണുള്ളത്. ഐഹിക ലോകത്തും പരലോകത്തും വഴികേടും നാശവും പരാജയവും മാത്രമായിരിക്കും നമുക്ക് ലഭിക്കുക. അല്ലാഹുവാണെ സത്യം, നാം ഇന്ന് സുരക്ഷിതമായി അന്തിയുറങ്ങുന്നത് സലഫി ദഅ്‌വത്തിൻ്റെ തണലിലാണ്.

മുജദ്ദിദായ ഇമാം മുഹമ്മദ് ബിൻ അബ്ദിൽ വഹാബ് (رَحِمَهُ اللَّهُ) പതാക ഉയർത്തിയ സലഫി ദഅ്‌വത്ത്. അല്ലാഹുവിൻ്റെ റസൂൽ ﷺ യുടെ അനുചരന്മാരുടെയും, സച്ചരിതരായ ഖലീഫമാരുടെയും, ഉത്തമ നൂറ്റാണ്ടുകളിലെ ഈ സമുദായത്തിൻ്റെ നേതാക്കളായ സച്ചരിതരായ ഇമാമുമാരുടെയും മാർഗ്ഗം കൃത്യമായി പിൻപറ്റിക്കൊണ്ടാണ് അദ്ദേഹം അത് നിർവ്വഹിച്ചത്. ആരാധനകളിലും, വിശ്വാസത്തിലും, ഭരണകാര്യങ്ങളിലും, മുസ്ലിംകളുടെ മറ്റെല്ലാ കാര്യങ്ങളിലും ഒരു അമ്പിൻ്റെ തൂവലുകൾ പരസ്പരം സമമാകുന്നതുപോലെ അവരിൽ നിന്ന് ഒട്ടും വ്യതിചലിക്കാതെ അദ്ദേഹം ആ മാർഗ്ഗം കൃത്യമായി പിൻപറ്റി. ഈ അനുഗ്രഹീതമായ ദഅ്‌വത്തിലൂടെ അല്ലാഹു സകല അസത്യങ്ങളെയും, അന്ധവിശ്വാസങ്ങളെയും, സിഹ്റിനെയും, തട്ടിപ്പുകളെയും, നമസ്കാരം ഉപേക്ഷിക്കുന്ന പ്രവണതകളെയും, രക്തച്ചൊരിച്ചിലുകളെയും, സമ്പത്ത് കൊള്ളയടിക്കുന്നതിനെയും ഇല്ലാതാക്കി. ഈ അബദ്ധങ്ങളെയും അസംബന്ധങ്ങളെയും വഴികേടുകളെയും വ്യതിയാനങ്ങളെയും ഈ അനുഗ്രഹീതമായ ദഅ്‌വത്തിലൂടെ അല്ലാഹു തുടച്ചുനീക്കി. ഈ ദഅ്‌വത്തിൻ്റെ അനുഗ്രഹത്താൽ അല്ലാഹുവിൻ്റെ യഥാർത്ഥ മൻഹജിൽ അധിഷ്ഠിതമായി ലോകത്തിന് തന്നെ വെളിച്ചം നൽകുന്ന സർവ്വകലാശാലകൾ അല്ലാഹു ഇവിടെ സ്ഥാപിച്ചു. അതിനാൽ നാം സലഫി മൻഹജെന്നും സലഫി ദഅ്‌വത്തെന്നും പറയുമ്പോൾ നാം ഉദ്ദേശിക്കുന്നത്, അല്ലാഹുവിൻ്റെ റസൂൽ ﷺ യും അവിടുത്തെ മാന്യരായ സ്വഹാബികളും സച്ചരിതരായ ഇമാമുമാരും, അവർക്ക് ശേഷം ഇമാം അഹ്‌മദ് ബിൻ ഹൻബലും, ഇബ്നു തൈമിയ്യയും, മുഹമ്മദ് ബിൻ അബ്ദിൽ വഹാബുമൊക്കെ (അല്ലാഹു അവരെ പൊരുത്തപ്പെടട്ടെ) സഞ്ചരിച്ച ഈ അനുഗ്രഹീതമായ ദഅ്‌വത്തിനെയാണ്.

മതം പരിപൂർണ്ണമാണ്. ഏതെങ്കിലുമൊരു കക്ഷിയിൽ നിന്നോ വിഭാഗത്തിൽ നിന്നോ പുതിയ അഭിപ്രായങ്ങളോ ചിന്തകളോ നമുക്ക് ആവശ്യമില്ല. അല്ലാഹുവിൻ്റെ ഗ്രന്ഥത്തിലും റസൂൽ ﷺ യുടെ സുന്നത്തിലും, വിശ്വാസപരമായും ആരാധനാപരമായും അവയെ കൃത്യമായി ഗ്രഹിച്ച ഈ സച്ചരിതരായ മുൻഗാമികളുടെ കർമ്മശാസ്ത്രത്തിലും മതം പരിപൂർണ്ണമായി നിലകൊള്ളുന്നു.

അതുകൊണ്ട് നാം ഈ വിശദീകരിച്ച സലഫി മൻഹജിനെ അണപ്പല്ലുകൾ കൊണ്ട് മുറുകെ കടിച്ചുപിടിക്കുക. അത് തന്നെയാണ് യഥാർത്ഥ സത്യം. അല്ലാഹുവിൻ്റെ റസൂൽ ﷺ സത്യത്തിലാണെന്ന് അറിയിച്ച സഹായം ലഭിക്കുന്ന വിഭാഗത്തിൻ്റെ മൻഹജാണത്. റസൂൽ ﷺ സമുദായത്തിൻ്റെ ഭിന്നിപ്പുകളെക്കുറിച്ച് സംസാരിച്ചപ്പോൾ പരാമർശിച്ച രക്ഷപ്പെടുന്ന വിഭാഗത്തിൻ്റെയും മൻഹജാണത്. പ്രവാചകൻ ﷺ യുടെ പ്രവചനം സത്യമായിപ്പുലരുകയും സമുദായം ഭിന്നിക്കുകയും ചെയ്തപ്പോൾ, ഈ വിഭാഗം—അഥവാ അഹ്‌ലുൽ ഹദീസ്—മാത്രം അവശേഷിച്ചു. അഹ്‌ലുസ്സുന്നയ്ക്ക് പുറമെയുള്ള ബിദ്അത്തുകാർ വരെ സാക്ഷ്യപ്പെടുത്തിയിട്ടുള്ളത് ഇവർ തന്നെയാണ് സത്യത്തിൻ്റെ വക്താക്കളെന്നും, ഇവരാണ് സഹായം ലഭിക്കുന്ന വിഭാഗമെന്നും, ഇവരാണ് രക്ഷപ്പെടുന്ന വിഭാഗമെന്നുമാണ്. ഇബ്നു തൈമിയ്യയും ഇബ്നു അബ്ദിൽ വഹാബുമൊക്കെ (അല്ലാഹു അവരെ പൊരുത്തപ്പെടട്ടെ) ഈയൊരു മാർഗ്ഗമാണ് കൃത്യമായി പിൻപറ്റിയത്.

ഈ അനുഗ്രഹീതമായ ദഅ്‌വത്തിൻ്റെ തണലിൽ നാം സുഖമനുഭവിക്കുകയും അതിൻ്റെ പ്രകാശത്തിൽ നാം വെളിച്ചം കണ്ടെത്തുകയും ചെയ്യുന്നു. അത് ഈ രാജ്യത്ത് മാത്രമല്ല, ലോകത്തുടനീളം അങ്ങനെയുണ്ട്. അല്ലാഹുവിൻ്റെ ശത്രുക്കളിൽ നിന്നും ബിദ്അത്തുകാരായ വഴികേടിൻ്റെ വക്താക്കളിൽ നിന്നും ഈ ദഅ്‌വത്തിന് തടസ്സങ്ങളുണ്ടായിരുന്നില്ല എങ്കിൽ, ഈ ഇസ്ലാമിക ലോകം മുഴുവൻ ഈ അനുഗ്രഹീതമായ ദഅ്‌വത്തുകൊണ്ട് പ്രകാശിതമാകുന്നത് നിങ്ങൾക്ക് കാണാമായിരുന്നു. കാരണം അത് ലോകത്തുടനീളം അതിവേഗം പ്രചരിക്കാനും സ്വാധീനം ചെലുത്താനും തുടങ്ങിയിരുന്നു. അപ്പോഴാണ് ഈ ശക്തമായ മുന്നേറ്റത്തെയും ഒഴുക്കിനെയും തടഞ്ഞുനിർത്താൻ ബിദ്അത്തുകാരും സത്യനിഷേധികളും ഗൂഢാലോചനകൾ നടത്തിയത്. ഈ ദഅ്‌വത്തിനെ തടഞ്ഞുനിർത്താൻ അവർ സർവ്വ തന്ത്രങ്ങളും പ്രയോഗിച്ചു. അതിനാൽ ഈ ദഅ്‌വത്തിനെതിരെ നടക്കുന്ന ഗൂഢാലോചനകളും കുതന്ത്രങ്ങളും നിങ്ങൾ തിരിച്ചറിയേണ്ടതുണ്ട്. കാരണം ഈ ദഅ്‌വത്തിൻ്റെ വ്യാപനത്തിലും, അതിൻ്റെ പ്രകാശത്തിൻ്റെ മുന്നേറ്റത്തിലും അവർക്ക് ഒരിക്കലും ഉറങ്ങാൻ സാധിക്കുകയില്ല. അസത്യത്തിൻ്റെയും ബിദ്അത്തിൻ്റെയും വക്താക്കൾക്ക് ഒരിക്കലും സമാധാനിക്കാൻ കഴിയില്ല; ആ ബിദ്അത്തുകളും വഴികേടുകളും കുഫ്റിലൂടെയോ, കക്ഷിത്വത്തിലൂടെയോ, സൂഫിസത്തിലൂടെയോ, റാഫിളുകളിലൂടെയോ (ശിയാക്കൾ), അതുപോലെയുള്ള മറ്റേതെങ്കിലും വഴികേടുകളിലൂടെയോ ആകട്ടെ.

ഈ സത്യസന്ധമായ ഇസ്ലാമിക സലഫി ദഅ്‌വത്ത് ഭൂമിയിൽ പ്രചരിക്കുന്നത് കാണുമ്പോൾ അവരുടെ കണ്ണുകൾക്ക് ഒരിക്കലും കുളിർമയുണ്ടാവുകയില്ല, അവർക്ക് സമാധാനിക്കാൻ സാധിക്കുകയുമില്ല. അതിനാൽ അവർ ഇതിനെതിരെ നിരന്തരം ഗൂഢാലോചനകൾ നടത്തിക്കൊണ്ടേയിരിക്കുന്നു.

അതുകൊണ്ട് അല്ലയോ യുവാക്കളേ, നിങ്ങൾ ശ്രദ്ധിക്കുക. അല്ലാഹു നിങ്ങളോട് കൽപിച്ചതുപോലെ നിങ്ങളെല്ലാവരും അല്ലാഹുവിൻ്റെ കയർ മുറുകെ പിടിക്കുക. ഭിന്നിപ്പുകളെ നിങ്ങൾ അങ്ങേയറ്റം സൂക്ഷിക്കുക. ഈ ഭിന്നിപ്പുകളുടെ വേരറുക്കുകയും, അതിൻ്റെ സകല കാരണങ്ങളെയും ഇല്ലാതാക്കുകയും ചെയ്യുക; അത് ദേഹേച്ഛകളാകട്ടെ, അന്ധമായ കക്ഷിത്വമാകട്ടെ, മറ്റെന്തുതന്നെയാകട്ടെ.

സഹോദരങ്ങളേ, നിങ്ങൾ അക്കാര്യത്തിൽ അതീവ ശ്രദ്ധ പുലർത്തുക. കാരണം ഒരുപാട് യുവാക്കൾ കള്ളം പറയുന്നതിലോ, സലഫികളായ പ്രബോധകരുടെ—സത്യത്തിൻ്റെ പ്രബോധകരുടെ, അല്ലാതെ കക്ഷിത്വത്തിൻ്റെയും അസത്യത്തിൻ്റെയും പ്രബോധകരുടേയല്ല—അഭിമാനങ്ങളെ പിച്ചിച്ചീന്തുന്നതിലോ യാതൊരു സൂക്ഷ്മതയും കാണിക്കാത്തത് നാം കാണുന്നുണ്ട്. അവർ അവരുടെ അഭിമാനങ്ങളെ പിച്ചിച്ചീന്തുകയും, കള്ളങ്ങളും അപവാദങ്ങളും പ്രചരിപ്പിച്ച് അവരെ അപകീർത്തിപ്പെടുത്തുകയും ചെയ്യുന്നു. അതിനാൽ നിങ്ങൾ സത്യസന്ധത പുലർത്തുക. തീർച്ചയായും സത്യസന്ധത പുണ്യത്തിലേക്ക് നയിക്കും, പുണ്യം സ്വർഗ്ഗത്തിലേക്കും നയിക്കും. ഒരു മനുഷ്യൻ സത്യം പറയുകയും സത്യസന്ധത കാത്തുസൂക്ഷിക്കുകയും ചെയ്തുകൊണ്ടിരുന്നാൽ അല്ലാഹുവിങ്കൽ അവൻ സത്യസന്ധനായി രേഖപ്പെടുത്തപ്പെടും. എന്നാൽ ഒരാൾ നിരന്തരം കള്ളം പറയുകയും കളവ് പറയാൻ ശ്രമിക്കുകയും ചെയ്തുകൊണ്ടിരുന്നാൽ അല്ലാഹുവിങ്കൽ അവൻ വലിയ കളവുകാരനായി രേഖപ്പെടുത്തപ്പെടും.

കള്ളം പറയാൻ യാതൊരു മടിയുമില്ലാത്ത ചില ആളുകളുണ്ട്. അവർ അല്ലാഹുവിങ്കൽ കളവുകാരായി രേഖപ്പെടുത്തപ്പെട്ടേക്കാം എന്നതിൽ നമുക്ക് നിർഭയരാകാൻ കഴിയില്ല—അല്ലാഹു കാത്തുരക്ഷിക്കട്ടെ. ഇക്കൂട്ടർ എന്താണ് കാത്തിരിക്കുന്നത്?!

സഹോദരങ്ങളേ, മാന്യനായ പ്രവാചകൻ ﷺ ഗോത്രങ്ങളോടും കുടുംബങ്ങളോടുമുള്ള പക്ഷപാതിത്വങ്ങളെ താക്കീത് ചെയ്തിട്ടുണ്ട്. ഒരാൾ വിളിച്ചുപറഞ്ഞു: “ഓ അൻസ്വാറുകളേ!” മറ്റൊരാൾ വിളിച്ചുപറഞ്ഞു: “ഓ മുഹാജിറുകളേ!” അൻസ്വാറുകൾ എന്ന പദം വളരെ ശ്രേഷ്ഠമായതാണ്, അത് അല്ലാഹുവിൻ്റെ ഗ്രന്ഥത്തിലും പ്രവാചകൻ്റെ സുന്നത്തിലും വന്നിട്ടുള്ളതാണ്. അതുപോലെത്തന്നെയാണ് മുഹാജിറുകൾ എന്ന പദവും. എന്നാൽ ദേഹേച്ഛകളിലേക്കും അസത്യത്തിലേക്കും ക്ഷണിക്കാൻ വേണ്ടി ഈ രണ്ട് പദങ്ങളെയും ദുരുപയോഗം ചെയ്തപ്പോൾ റസൂൽ ﷺ പറഞ്ഞു:

أَدَعْوَى الْجَاهِلِيَّةِ وَأَنَا بَيْنَ أَظْهُرِكُمْ؟! دَعُوهَا فَإِنَّهَا مُنْتِنَةٌ

ഞാൻ നിങ്ങളുടെ ഇടയിലുണ്ടായിരിക്കെ ജാഹിലിയ്യത്തിൻ്റെ വാദങ്ങളോ?! നിങ്ങളത് ഉപേക്ഷിക്കുക, തീർച്ചയായും അത് ദുർഗന്ധം വമിക്കുന്നതാണ്. ⁶

ഇന്ന് കളത്തിൽ നിലനിൽക്കുന്ന കക്ഷിത്വങ്ങളിൽ നിന്ന് ഈ ദുർഗന്ധം വമിക്കുന്നുണ്ട്. യുവാക്കൾ ഈ വ്യക്തവും സത്യസന്ധവുമായ മൻഹജിനെ മുറുകെപ്പിടിക്കുന്നതിന് പകരം, ദേഹേച്ഛകളും കക്ഷികളും അവരെ പലവഴിക്കും വലിച്ചിഴക്കുകയാണ്—അല്ലാഹു കാത്തുരക്ഷിക്കട്ടെ.

ഈ ഐക്യം അല്ലാഹുവിൽ നിന്നുള്ള വലിയൊരു അനുഗ്രഹമാണ്. ഇതിന് നേരെ പുറംതിരിഞ്ഞുനിൽക്കാൻ നമുക്ക് സാധിക്കുമോ? ഈ രാജ്യം ഛിന്നഭിന്നമായിരുന്ന ഒരു കാലമുണ്ടായിരുന്നു. അതിലെ ജനങ്ങൾ വിവിധ കക്ഷികളും സംഘങ്ങളും ഗോത്രങ്ങളുമായി ചിതറിക്കിടന്നിരുന്നു. ഒരു ഗോത്രം തന്നെ പല കഷണങ്ങളായി വിഭജിക്കപ്പെടുകയും അവർ പരസ്പരം കൊല്ലുകയും കൊള്ളയടിക്കുകയും ചെയ്തിരുന്നു. അല്ലാഹു ഈ രാജ്യത്തെ ഈ അനുഗ്രഹീതമായ നല്ല ദഅ്‌വത്തിലൂടെ ഒന്നാക്കിത്തീർത്തു; തൗഹീദിൻ്റെ ദഅ്‌വത്തിലൂടെ, അല്ലാഹുവിൻ്റെ മതത്തിലെ വിശ്വാസപരമായ തൗഹീദിലൂടെ. സമുദായത്തെ ഒരൊറ്റ വാക്കിലും ഒരൊറ്റ മൻഹജിലും ഒരുമിപ്പിക്കുക എന്നത് അല്ലാഹു തബാറക വതആലയുടെ മഹത്തായ അനുഗ്രഹമാണ്.

നൂറ്റാണ്ടുകളോളം ഈ അറേബ്യൻ ഉപദ്വീപ് അജ്ഞതയിലും വഴികേടിലും, ശിർക്കിലും ബിദ്അത്തുകളിലും, അന്ധവിശ്വാസങ്ങളിലും, കൊലപാതകങ്ങളിലും കൊള്ളയടിക്കലുകളിലുമായി വഴിതെറ്റി നടന്നിരുന്നു. ഈ അനുഗ്രഹീതമായ നല്ല ദഅ്‌വത്തിലൂടെ അല്ലാഹു ഈ ഉപദ്വീപിലെ ജനങ്ങളെ ഒരുമിപ്പിച്ചു.

എന്നാൽ അസത്യത്തിൻ്റെ വക്താക്കൾക്ക് ഇതുകണ്ട് ഒരിക്കലും കൺകുളിർമയുണ്ടാവുകയില്ല. അവർ ഈ ഐക്യത്തിന് തിന്മയും ഭിന്നിപ്പുമാണ് ആഗ്രഹിക്കുന്നത്. ഇത് തകർക്കപ്പെടണമെന്നാണ് അവർ ആഗ്രഹിക്കുന്നത്. കാരണം ബിദ്അത്തുകാർ സലഫി മൻഹജിനെ ഭയപ്പെടുന്നു. യഥാർത്ഥ സത്യം കുടികൊള്ളുന്നത് സലഫി മൻഹജിലാണെന്ന് അവർക്ക് വ്യക്തമായി അറിയാം. ജൂതന്മാരും ക്രിസ്ത്യാനികളും ഇസ്ലാമിനെ അല്ലാതെ മറ്റൊന്നിനെയും ഭയപ്പെടുന്നില്ല; അഥവാ അവർ ‘വഹാബി ഇസ്ലാം’ എന്ന് വിളിക്കുന്ന ഈ യഥാർത്ഥ ഇസ്ലാമിനെ.

ഞാൻ ഈ സലഫി ദഅ്‌വത്തിൻ്റെ ലോകത്തുടനീളമുള്ള വ്യാപനത്തെ നിരീക്ഷിക്കാറുണ്ടായിരുന്നു. അൾജീരിയയിലെ ജനങ്ങൾ ശൈഖ് ഇബ്നു ബാസ്, ശൈഖ് ഇബ്നു ഉസൈമീൻ, ശൈഖ് അൽബാനി എന്നീ സലഫി മൻഹജിൻ്റെ ഇമാമുമാരിലേക്ക് തിരിയുന്നതായി കാണാമായിരുന്നു. അൾജീരിയൻ ജനത ഏകദേശം പൂർണ്ണമായും ഈ മൻഹജിലേക്ക് ഏകോപിക്കുന്ന അവസ്ഥയിലായിരുന്നു. അപ്പോഴാണ് അല്ലാഹുവിൻ്റെ ശത്രുക്കൾ ഗൂഢാലോചന നടത്തുകയും ആ ജനതയുടെ ദിശ മറ്റൊരിടത്തേക്ക് തിരിച്ചുവിടുകയും അവരെ അല്ലാഹുവിൻ്റെ സത്യമാർഗ്ഗത്തിൽ നിന്ന് അകറ്റുകയും ചെയ്തത്. ഈ രാജ്യത്ത് (സൗദി അറേബ്യയിൽ) സർവ്വകലാശാലകൾ സ്ഥാപിക്കപ്പെട്ടു. എന്നാൽ ഇന്ന് അവിടെ എന്താണ് സംഭവിക്കുന്നതെന്ന് നിങ്ങൾ കാണുന്നില്ലേ? ഇതെല്ലാം ബിദ്അത്തുകാരുടെയും വഴികേടിൻ്റെ വക്താക്കളുടെയും ഗൂഢാലോചനകൾ കാരണമാണ്, അവർക്ക് പിന്നിൽ അല്ലാഹുവിൻ്റെ ശത്രുക്കളുമുണ്ട്. കാരണം അവർ ഈ യഥാർത്ഥ ഇസ്ലാമിനെ ഭയപ്പെടുന്നു. അതുകൊണ്ടാണ് പാകിസ്ഥാനിലും അഫ്ഗാനിസ്ഥാനിലുമൊക്കെ സലഫിയ്യത്തിനെ ഇല്ലാതാക്കാൻ അവർ ഗൂഢാലോചന നടത്തുകയും അതിനെ കൊന്നൊടുക്കുകയും ചെയ്തത്. ഈ രാജ്യത്തും അതിനെ ഇല്ലാതാക്കാനും വേരോടെ പിഴുതെറിയാനും അവർ ആഗ്രഹിക്കുന്നു.

ഈ സമുദായത്തിന് ഒരു രക്ഷാമാർഗ്ഗവുമില്ല, ഈ രാജ്യത്തിനും ഈ ഉപദ്വീപിലെ ജനങ്ങൾക്കും യാതൊരു രക്ഷയുമില്ല; അവർ എല്ലാവരും ഒന്നിച്ച് അല്ലാഹുവിൻ്റെ കയർ മുറുകെ പിടിക്കുന്നതിലൂടെയല്ലാതെ. അവർ ഭിന്നിപ്പുകളെ വലിച്ചെറിയുകയും, അതിൻ്റെ അവസാനത്തെ കാരണത്തെപ്പോലും ഇല്ലാതാക്കുകയും ചെയ്യണം. ഈ കുപ്രചരണങ്ങളെയും വ്യാജ ആരോപണങ്ങളെയും അവർ ഉപേക്ഷിക്കണം. ജാഹിലിയ്യത്തിലും ഇസ്ലാമിലുമൊക്കെ കള്ളം പറയാൻ അറബികൾ ലജ്ജിച്ചിരുന്നുവെന്ന് അല്ലാഹുവാണെ സത്യം നമുക്കറിയാം. എന്നാൽ ഇന്ന് ധാരാളം ആളുകൾക്ക് കള്ളം പറയാനോ, അപവാദങ്ങൾ ഉന്നയിക്കാനോ, ഇസ്ലാം അങ്ങേയറ്റം എതിർത്ത അന്ധമായ കക്ഷിത്വം കാണിക്കാനോ യാതൊരു ലജ്ജയുമില്ല.

അല്ലാഹുവിൻ്റെ റസൂൽ ﷺ പറഞ്ഞു:

مَنْ خَرَجَ مِنَ الطَّاعَةِ وَفَارَقَ الْجَمَاعَةَ فَمَاتَ؛ مَاتَ مِيتَةً جَاهِلِيَّةً

ആരെങ്കിലും അനുസരണത്തിൽ നിന്ന് പുറത്തുപോകുകയും ജമാഅത്തുമായി (മുസ്ലിംകളുടെ സംഘവുമായി) വേർപിരിയുകയും എന്നിട്ട് മരണപ്പെടുകയും ചെയ്താൽ അവൻ്റെ മരണം ജാഹിലിയ്യാ മരണമാണ്. ⁷

ആരെങ്കിലും അനുസരണത്തിൽ നിന്ന് പുറത്തുപോകുകയും ജമാഅത്തുമായി വേർപിരിയുകയും എന്നിട്ട് മരണപ്പെടുകയും ചെയ്താൽ അവൻ്റെ മരണം ജാഹിലിയ്യാ മരണമാണ്.

وَمَنْ قَاتَلَ تَحْتَ رَايَةٍ عُمِّيَّةٍ أَوْ عِمِّيَّةٍ، يَدْعُو إِلَى عَصَبِيَّةٍ، أَوْ يَغْضَبُ لِعَصَبَةٍ، وَيَنْصُرُ عَصَبَةً فَقُتِلَ؛ فَقِتْلَتُهُ جَاهِلِيَّةٌ، وَمَنْ خَرَجَ عَلَى أُمَّتِي يَضْرِبُ بَرَّهَا وَفَاجِرَهَا فَقَدْ بَرِئَ مِنِّي وَبَرِئْتُ مِنْهُ

ആരെങ്കിലും അന്ധമായ പതാകയ്ക്ക് കീഴിൽ യുദ്ധം ചെയ്യുകയും, ഒരു കക്ഷിത്വത്തിലേക്ക് ക്ഷണിക്കുകയോ, അല്ലെങ്കിൽ ഒരു കക്ഷിക്ക് വേണ്ടി കോപിക്കുകയോ, ഒരു കക്ഷിയെ സഹായിക്കുകയോ ചെയ്യുകയും എന്നിട്ടവൻ കൊല്ലപ്പെടുകയും ചെയ്താൽ അവൻ്റെ മരണം ജാഹിലിയ്യാ മരണമാണ്. എൻ്റെ സമുദായത്തിനെതിരെ ആരെങ്കിലും പുറപ്പെടുകയും, അതിലെ പുണ്യവാന്മാരെയും പാപികളെയും അവൻ വെട്ടിവീഴ്ത്തുകയും ചെയ്താൽ അവന് എന്നോട് യാതൊരു ബന്ധവുമില്ല, എനിക്ക് അവനോടും യാതൊരു ബന്ധവുമില്ല. ⁸

അല്ലാഹുവിൻ്റെ റസൂൽ ﷺ നിന്നിൽ നിന്ന് ബന്ധം വിച്ഛേദിച്ചിരിക്കുന്നു!

ഇത്തരം കക്ഷിത്വങ്ങൾ ഇന്ന് നമ്മുടെ ഇടയിൽ നിലനിൽക്കുന്നതും കൈകൾ കൊണ്ട് തൊട്ടറിയാൻ കഴിയുന്നതുമാണ്. അവർ യാതൊരു ന്യായവും സ്വീകരിക്കുകയില്ല, യാതൊരു തെളിവും അവർക്ക് ബോധ്യപ്പെടുകയുമില്ല. സത്യവാനെ അവർ വിശ്വസിക്കുകയില്ല, എന്നാൽ കളവുകാരനെ അവർ വിശ്വസിക്കുകയും ചെയ്യും. ഇതൊക്കെ ഇന്ന് നിലവിലുള്ളതാണ്, ഇവയൊക്കെ വലിയ ആപത്തുകളുമാണ്.

സഹോദരങ്ങളേ, നാം നമ്മെത്തന്നെ തിരുത്തുകയും ഇതിൽ നിന്നൊക്കെ രക്ഷപ്പെടാൻ ശ്രമിക്കുകയും ഇതിനെ ഇല്ലാതാക്കാൻ പരിശ്രമിക്കുകയും ചെയ്യേണ്ടത് അനിവാര്യമാണ്. മാന്യനായ റസൂൽ ﷺ പറയുന്നു:

مَنْ نَصَرَ بَاطِلًا وَهُوَ يَعْلَمُهُ؛ لَمْ يَزَلْ فِي سَخَطِ اللَّهِ حَتَّى يَنْزِعَ، وَمَنْ قَالَ فِي مُؤْمِنٍ مَا لَيْسَ فِيهِ؛ أَسْكَنَهُ اللَّهُ رَدْغَةَ الْخَبَالِ حَتَّى يَخْرُجَ مِمَّا قَالَ

ഒരാൾ അസത്യമാണെന്ന് അറിഞ്ഞുകൊണ്ട് ഒരു അസത്യത്തെ സഹായിച്ചാൽ, അവൻ അതിൽ നിന്ന് പിന്മാറുന്നത് വരെ അവൻ അല്ലാഹുവിൻ്റെ കോപത്തിലായിരിക്കും. ഒരു സത്യവിശ്വാസിയിലില്ലാത്ത കാര്യം ഒരാൾ അവനെക്കുറിച്ച് പറഞ്ഞാൽ, അവൻ ആ പറഞ്ഞതിൽ നിന്ന് പിന്മാറുന്നത് വരെ അല്ലാഹു അവനെ ‘റദ്ഗതുൽ ഖബാലിൽ’ പാർപ്പിക്കുന്നതാണ്. ⁹

എന്താണ് റദ്ഗതുൽ ഖബാൽ? അത് നരകവാസികളുടെ ശരീരത്തിൽ നിന്ന് ഒലിച്ചിറങ്ങുന്ന സ്രവങ്ങളാണ്. അസത്യത്തെ സഹായിക്കുന്നവർ പാർക്കുന്ന നരകത്തിലെ ഏറ്റവും മോശപ്പെട്ടതും ദുർഗന്ധം വമിക്കുന്നതുമായ സ്ഥലമാണത് എന്നാണ് ഞാൻ കരുതുന്നത്—അല്ലാഹു കാത്തുരക്ഷിക്കട്ടെ. ആ അസത്യം കുഫ്റോ, ബിദ്അത്തോ അല്ലെങ്കിൽ മറ്റെന്തുതന്നെയായാലും, അത് അസത്യമാണെന്ന് അറിഞ്ഞുകൊണ്ട് അവൻ അതിനെ സഹായിക്കുകയാണെങ്കിൽ അവൻ അതിൽ നിന്ന് പിന്മാറുന്നത് വരെ അവൻ അല്ലാഹുവിൻ്റെ കോപത്തിലായിരിക്കും. ഇനി അവൻ ഒരു അസത്യത്തിൽ തർക്കത്തിലേർപ്പെടുകയോ, അല്ലെങ്കിൽ ഒരു മുസ്ലിമിലില്ലാത്ത കാര്യം അവനെക്കുറിച്ച് പറയുകയോ ചെയ്താൽ അതിനുള്ള ശിക്ഷ അവൻ ആ പറഞ്ഞതിൽ നിന്ന് പിന്മാറുന്നത് വരെ അല്ലാഹു അവനെ റദ്ഗതുൽ ഖബാലിൽ പാർപ്പിക്കും എന്നതാണ്. ത്വബറാനിയുടെ ഒരു നിവേദനത്തിൽ ഇപ്രകാരം കൂടിയുണ്ട്: “അവൻ ഒരിക്കലും അതിൽ നിന്ന് പുറത്തുകടക്കുകയില്ല, പുറത്തുകടന്നിട്ടുമില്ല.” പരിശുദ്ധരും നിരപരാധികളുമായ വിശ്വാസികളുടെ മേൽ അപവാദങ്ങൾ ആരോപിക്കുന്നവന് എങ്ങനെയാണ് അതിൽ നിന്ന് പുറത്തുകടക്കാൻ സാധിക്കുക!

അതുകൊണ്ട് സഹോദരങ്ങളേ, അല്ലാഹുവിൻ്റെ കയർ മുറുകെ പിടിക്കാൻ നാം ബാധ്യസ്ഥരാണ്. ഭിന്നിപ്പുകളിൽ നിന്നും അതിൻ്റെ കാരണങ്ങളിൽ നിന്നും നാം വിട്ടുനിൽക്കണം.

നമുക്ക് സത്യം കാണിച്ചുതരാനും, സത്യത്തെ സത്യമായി കാണാനും അത് പിൻപറ്റാനും, അസത്യത്തെ അസത്യമായി കാണാനും അത് വർജ്ജിക്കാനും അല്ലാഹു തബാറക വതആലയോട് ഞാൻ പ്രാർത്ഥിക്കുന്നു. അവൻ നമ്മെ സത്യത്തിൻ്റെ പ്രബോധകരും, സത്യത്തിൻ്റെ സഹായികളുമാക്കട്ടെ. അസത്യത്തെ സഹായിക്കുന്നതിൽ നിന്നും, നിരപരാധികളായ വിശ്വാസികളുടെ മേൽ അപവാദം പറയുന്നതിൽ നിന്നും അവൻ നമ്മെ അകറ്റിനിർത്തട്ടെ. അത്തരക്കാരിൽ പെട്ടുപോകുന്നവരുടെ ഭയാനകമായ അവസ്ഥ അല്ലാഹുവിൻ്റെ റസൂൽ ﷺ നമ്മെ അറിയിച്ചിട്ടുണ്ടല്ലോ.

അവസാനമായി: ഈ ലഘുവായ പ്രഭാഷണം നമ്മുടെ മാന്യനായ പ്രവാചകൻ ﷺ യുടെ മേൽ സ്വലാത്ത് ചൊല്ലിക്കൊണ്ട് ഞാൻ അവസാനിപ്പിക്കുകയാണ്. അവിടുത്തെ അനുസരിക്കുന്നതിലേക്കും പിൻപറ്റുന്നതിലേക്കും ഞാൻ ഒരിക്കൽ കൂടി ക്ഷണിക്കുന്നു. തൻ്റെ മക്കൾക്ക് ഉപകാരപ്രദമാകുന്ന കാര്യങ്ങൾ വെച്ച് ഇതിന്മേൽ ഒരഭിപ്രായം രേഖപ്പെടുത്താൻ ഞാൻ നമ്മുടെ ശൈഖിനോട് അഭ്യർത്ഥിക്കുന്നു.

അവലോകനം

ശൈഖ് അബ്ദുൽ അസീസ് ബിൻ അബ്ദില്ലാഹ് ബിൻ ബാസ്:

അല്ലാഹുവിൻ്റെ ഗ്രന്ഥവും സുന്നത്തും മുറുകെപ്പിടിക്കുക, അവയ്ക്ക് വിരുദ്ധമായവയെ സൂക്ഷിക്കുക, ഭിന്നിപ്പുകളുടെയും അഭിപ്രായവ്യത്യാസങ്ങളുടെയും വാതിലുകളെയും ദേഹേച്ഛകളോടുള്ള പക്ഷപാതിത്വത്തെയും താക്കീത് ചെയ്യുക എന്നീ വിഷയങ്ങളിൽ ഫളീലത്തുശ്‌ശൈഖ് റബീഅ് ബിൻ ഹാദീ അൽ-മദ്ഖലിയുടെ അനുഗ്രഹീതമായ ഈ നല്ല പ്രഭാഷണം നാം കേട്ടു. അദ്ദേഹം അത് വളരെ നന്നായി അവതരിപ്പിക്കുകയും ഉപകാരപ്രദമാക്കുകയും ചെയ്തു. അല്ലാഹു അദ്ദേഹത്തിന് ഗുണകരമായ പ്രതിഫലം നൽകുകയും അത് ഇരട്ടിയാക്കി നൽകുകയും ചെയ്യട്ടെ.

ഇതുതന്നെയാണ് (നമ്മുടെ) ബാധ്യത. ചെറിയ കാര്യങ്ങളിലായാലും വലിയ കാര്യങ്ങളിലായാലും അല്ലാഹുവിൻ്റെ ഗ്രന്ഥത്തിലേക്കും സുന്നത്തിലേക്കുമാണ് നാം വിധികേടേണ്ടത്. അല്ലാഹു (جل وعلا) അവൻ്റെ വചനത്തിൽ പറഞ്ഞതുപോലെ:

يَـٰٓأَيُّهَا ٱلَّذِينَ ءَامَنُوٓا۟ أَطِيعُوا۟ ٱللَّهَ وَأَطِيعُوا۟ ٱلرَّسُولَ وَأُو۟لِى ٱلْأَمْرِ مِنكُمْ ۖ فَإِن تَنَـٰزَعْتُمْ فِى شَىْءٍ فَرُدُّوهُ إِلَى ٱللَّهِ وَٱلرَّسُولِ إِن كُنتُمْ تُؤْمِنُونَ بِٱللَّهِ وَٱلْيَوْمِ ٱلْـَٔاخِرِ ۚ ذَٰلِكَ خَيْرٌ وَأَحْسَنُ تَأْوِيلًا

സത്യവിശ്വാസികളേ, നിങ്ങൾ അല്ലാഹുവെ അനുസരിക്കുക. (അല്ലാഹുവിൻ്റെ) ദൂതനെയും നിങ്ങളിൽ നിന്നുള്ള കൈകാര്യകർത്താക്കളെയും അനുസരിക്കുക. ഇനി വല്ല കാര്യത്തിലും നിങ്ങൾക്കിടയിൽ തർക്കമുണ്ടാകുകയാണെങ്കിൽ നിങ്ങളത് അല്ലാഹുവിലേക്കും റസൂലിലേക്കും മടക്കുക. നിങ്ങൾ അല്ലാഹുവിലും അന്ത്യദിനത്തിലും വിശ്വസിക്കുന്നവരാണെങ്കിൽ (അതാണ് വേണ്ടത്‌). അതാണ് ഉത്തമവും കൂടുതൽ നല്ല പര്യവസാനമുള്ളതും.¹⁰

അവൻ (سبحانه) പറയുന്നു:

وَمَا ٱخْتَلَفْتُمْ فِيهِ مِن شَىْءٍ فَحُكْمُهُۥٓ إِلَى ٱللَّهِ

ഏതൊരു കാര്യത്തിൽ നിങ്ങൾ ഭിന്നിച്ചുവോ അതിലെ വിധി അല്ലാഹുവിലേക്കാകുന്നു. ¹¹

അല്ലാഹു (جل وعلا) പറയുന്നു:

وَٱعْتَصِمُوا۟ بِحَبْلِ ٱللَّهِ جَمِيعًا وَلَا تَفَرَّقُوا۟

നിങ്ങളെല്ലാവരും ഒന്നിച്ച് അല്ലാഹുവിൻ്റെ കയർ മുറുകെ പിടിക്കുക. നിങ്ങൾ ഭിന്നിച്ചുപോകരുത്. ¹²

അദ്ദേഹം പറഞ്ഞതുപോലെത്തന്നെയാണ് കാര്യങ്ങൾ. അല്ലാഹുവിൻ്റെ ഗ്രന്ഥവും റസൂൽ ﷺ യുടെ സുന്നത്തും മുറുകെപ്പിടിക്കാനും, ജനങ്ങൾക്കിടയിൽ തർക്കങ്ങളുണ്ടാകുമ്പോൾ അവയുടെ വിധി ഖുർആനിലേക്കും സുന്നത്തിലേക്കും മടക്കാനും വിശ്വാസികൾ ബാധ്യസ്ഥരാണ്.

അല്ലാഹുവിൻ്റെ ഗ്രന്ഥമോ റസൂൽ ﷺ യുടെ സുന്നത്തോ ഏതൊന്നിന് സത്യമാണെന്നും ശരിയാണെന്നും സാക്ഷ്യം വഹിച്ചുവോ അതാണ് ശരി. അവ രണ്ടുമോ അല്ലെങ്കിൽ അവയിലൊന്നോ ഏതൊന്നിന് അസത്യമാണെന്ന് സാക്ഷ്യം വഹിച്ചുവോ അതാണ് അസത്യം (ബാത്വിലായ കാര്യം). ഈ സമുദായത്തിലെ മുഴുവൻ ആളുകളുടെയും നിർബന്ധ ബാധ്യതയാണിത്. കാരണം അല്ലാഹു അപ്രകാരം കൽപിക്കുകയും നിർബന്ധമാക്കുകയും ചെയ്തിരിക്കുന്നു. റസൂൽ ﷺ യും അങ്ങനെത്തന്നെയാണ് പഠിപ്പിച്ചത്.

അതിനാൽ പണ്ഡിതന്മാർ, വിജ്ഞാനാന്വേഷികൾ, മതപരമായ ബാധ്യതകൾ ഏൽപ്പിക്കപ്പെട്ട മുഴുവൻ ആളുകൾ എന്നിവർക്കെല്ലാം നിർബന്ധമായ കാര്യം, അവർ അല്ലാഹുവിൻ്റെ ഗ്രന്ഥവും അവൻ്റെ റസൂൽ ﷺ യുടെ സുന്നത്തും മുറുകെപ്പിടിക്കുകയും, സച്ചരിതരായ മുൻഗാമികളുടെ—അഥവാ നബി ﷺ യുടെ അനുചരന്മാരുടെയും അവരെ നന്മയിൽ പിൻപറ്റിയവരുടെയും—മാർഗ്ഗത്തിലൂടെ സഞ്ചരിക്കുകയുമാണ്. അല്ലാഹു (جل وعلا) അവൻ്റെ വചനത്തിൽ പറഞ്ഞതുപോലെ:

وَٱلسَّـٰبِقُونَ ٱلْأَوَّلُونَ مِنَ ٱلْمُهَـٰجِرِينَ وَٱلْأَنصَارِ وَٱلَّذِينَ ٱتَّبَعُوهُم بِإِحْسَـٰنٍ رَّضِىَ ٱللَّهُ عَنْهُمْ وَرَضُوا۟ عَنْهُ وَأَعَدَّ لَهُمْ جَنَّـٰتٍ تَجْرِى تَحْتَهَا ٱلْأَنْهَـٰرُ خَـٰلِدِينَ فِيهَآ أَبَدًا ۚ ذَٰلِكَ ٱلْفَوْزُ ٱلْعَظِيمُ

മുഹാജിറുകളിൽ നിന്നും അൻസ്വാറുകളിൽ നിന്നും ആദ്യമായി മുന്നോട്ട് വന്നവരും, സുകൃതങ്ങളോടെ അവരെ പിൻപറ്റിയവരും ആരോ അവരെപ്പറ്റി അല്ലാഹു തൃപ്തിപ്പെട്ടിരിക്കുന്നു. അവനെപ്പറ്റി അവരും തൃപ്തിപ്പെട്ടിരിക്കുന്നു. താഴ്ഭാഗത്തുകൂടി അരുവികൾ ഒഴുകിക്കൊണ്ടിരിക്കുന്ന സ്വർഗ്ഗത്തോപ്പുകൾ അവർക്ക് അവൻ ഒരുക്കിവെക്കുകയും ചെയ്തിരിക്കുന്നു. എന്നെന്നും അവരതിൽ നിത്യവാസികളായിരിക്കും. അതത്രെ മഹത്തായ വിജയം. ¹³

ഇതാണ് നബി ﷺ യുടെ അനുചരന്മാർക്കും അവരെ നന്മയിൽ പിൻപറ്റിയവർക്കും അവരുടെ മാർഗ്ഗത്തിൽ സഞ്ചരിച്ചവർക്കുമുള്ള പ്രതിഫലം.

അതുപോലെ വിജ്ഞാനാന്വേഷികളുടെ ബാധ്യത, അവർ ദീനിൽ അവഗാഹം നേടുകയും, നീതിബോധവും സത്യസന്ധതയും പുലർത്തുകയും, സത്യം കണ്ടെത്താൻ പരിശ്രമിക്കുകയും ചെയ്യുക എന്നതാണ്. ഒപ്പം ഭിന്നിപ്പുകളുടെ കാരണങ്ങളിൽ നിന്നും, ദേഹേച്ഛകളെ പിൻപറ്റുന്നതിൽ നിന്നും, അന്ധമായ അനുകരണത്തിൽ നിന്നും, ഇന്ന വ്യക്തിയോടോ അല്ലെങ്കിൽ ഇന്ന സംഘത്തോടോ ഉള്ള പക്ഷപാതിത്വങ്ങളിൽ നിന്നും അവർ അകന്നുനിൽക്കേണ്ടതുണ്ട്.

സത്യം പിൻപറ്റുകയും അത് മുറുകെപ്പിടിക്കുകയും അതിന് വിരുദ്ധമായതിനെ വർജ്ജിക്കുകയും ചെയ്യുക എന്നതാണ് ബാധ്യത. അത് പറഞ്ഞത് നിങ്ങളുടെ പിതാവോ സഹോദരനോ മറ്റാരെങ്കിലുമോ ആയിരുന്നാലും ശരി, നിങ്ങൾ സത്യം പിൻപറ്റാൻ ബാധ്യസ്ഥരാണ്. അതാണ് പിൻപറ്റപ്പെടാൻ ഏറ്റവും അർഹമായത്.

അല്ലാഹു (جل وعلا) അവൻ്റെ മഹത്തായ ഗ്രന്ഥത്തിൽ പറയുന്നു:

فَلَا وَرَبِّكَ لَا يُؤْمِنُونَ حَتَّىٰ يُحَكِّمُوكَ فِيمَا شَجَرَ بَيْنَهُمْ ثُمَّ لَا يَجِدُوا۟ فِىٓ أَنفُسِهِمْ حَرَجًا مِّمَّا قَضَيْتَ وَيُسَلِّمُوا۟ تَسْلِيمًا

ഇല്ല, നിൻ്റെ രക്ഷിതാവിനെത്തന്നെയാണ സത്യം; അവർക്കിടയിൽ ഭിന്നിപ്പുണ്ടായ കാര്യത്തിൽ അവർ നിന്നെ വിധികർത്താവാക്കുകയും, നീ വിധികൽപ്പിച്ചതിനെപ്പറ്റി പിന്നീട് തങ്ങളുടെ മനസ്സുകളിൽ ഒരു വിഷമവും തോന്നാതിരിക്കുകയും, അത് പൂർണ്ണമായി സമ്മതിച്ചനുസരിക്കുകയും ചെയ്യുന്നതുവരെ അവർ വിശ്വാസികളാകുകയില്ല. ¹⁴

അവൻ (جل وعلا) പറയുന്നു:

قُلْ إِن كُنتُمْ تُحِبُّونَ ٱللَّهَ فَٱتَّبِعُونِى يُحْبِبْكُمُ ٱللَّهُ وَيَغْفِرْ لَكُمْ ذُنُوبَكُمْ

(നബിയേ) പറയുക: നിങ്ങൾ അല്ലാഹുവെ സ്നേഹിക്കുന്നുണ്ടെങ്കിൽ എന്നെ നിങ്ങൾ പിൻപറ്റുക. എങ്കിൽ അല്ലാഹു നിങ്ങളെ സ്നേഹിക്കുകയും നിങ്ങളുടെ പാപങ്ങൾ പൊറുത്തുതരികയും ചെയ്യുന്നതാണ്. ¹⁵

അവൻ (سبحانه) പറയുന്നു:

وَمَآ ءَاتَىٰكُمُ ٱلرَّسُولُ فَخُذُوهُ وَمَا نَهَىٰكُمْ عَنْهُ فَٱنتَهُوا۟ ۚ وَٱتَّقُوا۟ ٱللَّهَ ۖ إِنَّ ٱللَّهَ شَدِيدُ ٱلْعِقَابِ

റസൂൽ നിങ്ങൾക്ക് നൽകിയതെന്തോ അത് നിങ്ങൾ സ്വീകരിക്കുക. എന്തിൽ നിന്നൊക്കെ അവൻ നിങ്ങളെ വിലക്കിയോ അതിൽ നിന്നെല്ലാം നിങ്ങൾ വിട്ടുനിൽക്കുകയും ചെയ്യുക. നിങ്ങൾ അല്ലാഹുവെ സൂക്ഷിക്കുക. തീർച്ചയായും അല്ലാഹു കഠിനമായി ശിക്ഷിക്കുന്നവനാണ്. ¹⁶

നബി ﷺ പറയുന്നു:

مَنْ أَطَاعَنِي فَقَدْ أَطَاعَ اللَّهَ، وَمَنْ عَصَانِي فَقَدْ عَصَى اللَّهَ

ആരെങ്കിലും എന്നെ അനുസരിച്ചാൽ അവൻ അല്ലാഹുവെ അനുസരിച്ചു. ആരെങ്കിലും എന്നെ ധിക്കരിച്ചാൽ അവൻ അല്ലാഹുവെ ധിക്കരിച്ചു. ¹⁷

അവിടുന്ന് പറയുന്നു:

كُلُّ أُمَّتِي يَدْخُلُونَ الْجَنَّةَ إِلَّا مَنْ أَبَى، قِيلَ: يَا رَسُولَ اللَّهِ، مَنْ يَأْبَى؟ قَالَ: مَنْ أَطَاعَنِي دَخَلَ الْجَنَّةَ، وَمَنْ عَصَانِي فَقَدْ أَبَى

എൻ്റെ സമുദായത്തിലുള്ള എല്ലാവരും സ്വർഗ്ഗത്തിൽ പ്രവേശിക്കുന്നതാണ്; വിസമ്മതിച്ചവനൊഴികെ. അപ്പോൾ ചോദിക്കപ്പെട്ടു: അല്ലാഹുവിൻ്റെ റസൂലേ, ആരാണ് വിസമ്മതിക്കുന്നത്? അവിടുന്ന് പറഞ്ഞു: ആരെങ്കിലും എന്നെ അനുസരിച്ചാൽ അവൻ സ്വർഗ്ഗത്തിൽ പ്രവേശിച്ചു. ആരെങ്കിലും എന്നെ ധിക്കരിച്ചാൽ അവനാണ് വിസമ്മതിച്ചവൻ. ¹⁸

അതിനാൽ മതപണ്ഡിതന്മാരുടെ ബാധ്യത അവർ ജനങ്ങൾക്ക് (സത്യം) എത്തിച്ചുകൊടുക്കുകയും, അവരെ ബോധവൽക്കരിക്കുകയും, അവർക്ക് നിർബന്ധമായ കാര്യങ്ങൾ അവർക്ക് വ്യക്തമാക്കിക്കൊടുക്കുകയും ചെയ്യുക എന്നതാണ്. അതുപോലെത്തന്നെ വിജ്ഞാനാന്വേഷികളും പണ്ഡിതന്മാരെ മാതൃകയാക്കുകയും സത്യം വ്യക്തമാക്കുന്നതിൽ അവരുടെ മാർഗ്ഗത്തിൽ സഞ്ചരിക്കുകയും വേണം. ഭിന്നിപ്പുകളും തർക്കങ്ങളും ദേഹേച്ഛകളെ പിൻപറ്റുന്നതും അവർ അങ്ങേയറ്റം സൂക്ഷിക്കേണ്ടതുണ്ട്. ഇപ്രകാരം തന്നെയാണ് സാധാരണക്കാരായ മുസ്ലിംകളുടെയും ബാധ്യത; അവർ സത്യത്തിൽ ഉറച്ചുനിൽക്കണം. തങ്ങൾക്ക് പരിചയമുള്ള, സുന്നത്തിൻ്റെ ആളുകളാണെന്നും അല്ലാഹുവിൻ്റെ ദീനിൽ ഉറച്ചുനിൽക്കുന്നവരാണെന്നും സത്യത്തിൻ്റെ വക്താക്കളാണെന്നും ബോധ്യമുള്ള പണ്ഡിതന്മാരോട് അവർ ചോദിച്ചു മനസ്സിലാക്കണം. അവർ (ദീനിൽ) നിലകൊള്ളുകയും, തങ്ങൾക്ക് സംശയമുള്ള കാര്യങ്ങളെക്കുറിച്ച് ചോദിക്കുകയും വേണം. അല്ലാഹു (جل وعلا) അവൻ്റെ വചനത്തിൽ പറഞ്ഞതുപോലെ:

فَٱسْـَٔلُوٓا۟ أَهْلَ ٱلذِّكْرِ إِن كُنتُمْ لَا تَعْلَمُونَ

നിങ്ങൾക്ക് അറിവില്ലെങ്കിൽ വിവരം ഉള്ളവരോട് നിങ്ങൾ ചോദിക്കുക. ¹⁹

അറിവില്ലാതെ മതവിധി (ഫത്‌വ) നൽകിയ ഒരു കൂട്ടരെക്കുറിച്ച് റസൂലുള്ളാഹി ﷺ പറഞ്ഞതായി ഉദ്ധരിക്കപ്പെടുന്നു:

أَلَا سَأَلُوا إِذْ لَمْ يَعْلَمُوا؛ إِنَّمَا شِفَاءُ الْعِيِّ السُّؤَالُ

അവർക്ക് അറിവില്ലായിരുന്നെങ്കിൽ അവർക്ക് ചോദിക്കാമായിരുന്നില്ലേ? തീർച്ചയായും അജ്ഞതയ്ക്കുള്ള മരുന്ന് ചോദിച്ചറിയുക എന്നതാണ്. ²⁰

ഇതുപോലെത്തന്നെ പണ്ഡിതന്മാർക്ക് അറിവ് പ്രചരിപ്പിക്കലും, പള്ളികളിലൂടെയും പൊതുസദസ്സുകളിലൂടെയും റേഡിയോയിലൂടെയും പത്രങ്ങളിലൂടെയും അറിവ് എത്തിച്ചുകൊടുക്കാൻ സാധിക്കുന്ന സകല മാർഗ്ഗങ്ങളിലൂടെയും ജനങ്ങൾക്ക് സത്യം വ്യക്തമാക്കിക്കൊടുക്കലും നിർബന്ധമാണ്. കാരണം ജനങ്ങൾക്ക് അറിവിൻ്റെ ആവശ്യമുണ്ട്; “അല്ലാഹു പറഞ്ഞു, റസൂൽ ﷺ പറഞ്ഞു” എന്ന അറിവിൻ്റെ ആവശ്യമുണ്ട്. അതിനോടൊപ്പം തന്നെ അസത്യങ്ങളെ വ്യക്തമാക്കിക്കൊടുക്കുകയും അതിനെക്കുറിച്ച് മുന്നറിയിപ്പ് നൽകുകയും ചെയ്യണം.

ശൈഖ് മുഹമ്മദ് ബിൻ അബ്ദിൽ വഹാബിൻ്റെ (رَحِمَهُ اللَّهُ) ദഅ്‌വത്തിനെക്കുറിച്ച് ഫളീലത്തുശ്‌ശൈഖ് റബീഅ് സൂചിപ്പിച്ചത് തികച്ചും സത്യമാണ്. ഈ അനുഗ്രഹീതമായ ദഅ്‌വത്ത് നൽകിക്കൊണ്ട് അല്ലാഹു ഈ രാജ്യത്തെ അനുഗ്രഹിച്ചിരിക്കുന്നു. ഇതൊരു സലഫി ദഅ്‌വത്താണ്. എന്നാൽ അല്ലാഹുവിൻ്റെ ശത്രുക്കൾ ഈ ദഅ്‌വത്തിനെ വികലമാക്കുകയും അതിനെ ‘വഹാബിസം’ എന്ന് വിളിക്കുകയും ചെയ്തു. ഈ ദഅ്‌വത്തിൻ്റെ വക്താക്കൾ ഇന്നതൊക്കെ ചെയ്ത ബിദ്അത്തുകാരാണെന്ന് അവർ ആരോപിച്ചു. യഥാർത്ഥത്തിൽ ആരോപണമുന്നയിക്കുന്ന അവരാണ് വഴിപിഴച്ച ബിദ്അത്തുകാർ. അവർ ഒന്നുകിൽ വിവരമില്ലാത്തവരോ, അല്ലെങ്കിൽ വിവരമില്ലാത്തവരെ അന്ധമായി അനുകരിക്കുന്നവരോ ആണ്. അഥവാ അജ്ഞനോ അജ്ഞനെ അനുകരിക്കുന്നവനോ ആണ്. അതല്ലെങ്കിൽ വ്യക്തമായ അറിവുണ്ടായിട്ടും അല്ലാഹുവെ ധിക്കരിക്കുന്ന, തൻ്റെ ദേഹേച്ഛയെ പിൻപറ്റുന്നവനാണ്. സലഫി ദഅ്‌വത്തിൻ്റെ ശത്രുക്കൾ ഇക്കൂട്ടരാണ്: ഒന്നുകിൽ അജ്ഞൻ, അല്ലെങ്കിൽ അജ്ഞനെ അനുകരിക്കുന്നവൻ, അതുമല്ലെങ്കിൽ ദുർവാശിക്കാരനായ ദേഹേച്ഛയെ പിൻപറ്റുന്നവൻ. അവൻ തൻ്റെ ലൗകിക നേട്ടങ്ങളെയും ആഗ്രഹങ്ങളെയും സംരക്ഷിക്കാൻ വേണ്ടി ജനങ്ങളെ തൃപ്തിപ്പെടുത്താൻ ആഗ്രഹിക്കുന്നവനാണ്. അല്ലാഹു നമ്മെ കാത്തുരക്ഷിക്കട്ടെ.

ശൈഖ് മുഹമ്മദ് ബിൻ അബ്ദിൽ വഹാബിൻ്റെ (رَحِمَهُ اللَّهُ) ദഅ്‌വത്ത്, സ്വഹാബികളും (അല്ലാഹു അവരെ പൊരുത്തപ്പെടട്ടെ) അവരെ നന്മയിൽ പിൻപറ്റിയവരും സഞ്ചരിച്ച അതേ മാർഗ്ഗത്തിലുള്ള സലഫി ദഅ്‌വത്താണ്. ശൈഖുൽ ഇസ്ലാം ഇബ്നു തൈമിയ്യ, ഇബ്നുൽ ഖയ്യിം, ഇബ്നു കസീർ തുടങ്ങിയ ഇസ്ലാമിലെ മുൻനിര ഇമാമുമാരൊക്കെ അവരെയാണ് പിൻപറ്റിയത്. പന്ത്രണ്ടാം നൂറ്റാണ്ടിൽ, കൃത്യമായി പറഞ്ഞാൽ പന്ത്രണ്ടാം നൂറ്റാണ്ടിൻ്റെ പകുതിയിലാണ് ശൈഖ് മുഹമ്മദ് ബിൻ അബ്ദിൽ വഹാബ് കടന്നുവന്നത്. ഈ സമുദായത്തിന്, പ്രത്യേകിച്ച് ഈ അറേബ്യൻ ഉപദ്വീപിലെ ജനങ്ങൾക്ക് അല്ലാഹുവിൻ്റെ വലിയൊരു കാരുണ്യമായിരുന്നു അത്. അല്ലാഹുവിന് മാത്രം നിർവ്വഹിക്കേണ്ട യഥാർത്ഥ ആരാധന എന്താണെന്നും, തൗഹീദിൻ്റെ യാഥാർത്ഥ്യം എന്താണെന്നും, മുശ്രിക്കുകൾ ഏതവസ്ഥയിലായിരുന്നുവെന്നും, മുൻഗാമികളായ സലഫുകൾ ഏതവസ്ഥയിലായിരുന്നുവെന്നും അദ്ദേഹം അവർക്ക് വ്യക്തമാക്കിക്കൊടുത്തു. സച്ചരിതരായ മുൻഗാമികളുടെ മാർഗ്ഗം അദ്ദേഹം അവർക്ക് കാണിച്ചുകൊടുക്കുകയും, (സത്യമാർഗ്ഗത്തിലുള്ള) പോരാട്ടത്തിലേക്ക് അവരെ ക്ഷണിക്കുകയും ചെയ്തു. സത്യം വ്യക്തമാക്കുന്നതിന് വേണ്ടി ‘കിതാബുത്തൗഹീദ്’, ‘കശ്ഫുശ്ശുബുഹാത്ത്’, ‘അൽ-ഉസ്വൂലുസ്സലാസ’ എന്നീ ഗ്രന്ഥങ്ങൾ അദ്ദേഹം രചിച്ചു. അവ വളരെ മഹത്തായ, ഉപകാരപ്രദമായ ഗ്രന്ഥങ്ങളാണ്.

അതുപോലെത്തന്നെ ശൈഖുൽ ഇസ്ലാം ഇബ്നു തൈമിയ്യയുടെ ഗ്രന്ഥങ്ങളും അദ്ദേഹം അവർക്കിടയിൽ പ്രചരിപ്പിച്ചു. കാരണം അവയിൽ അറിവും നന്മയും, അല്ലാഹുവിൻ്റെ ഗ്രന്ഥത്തിലേക്കും റസൂൽ ﷺ യുടെ സുന്നത്തിലേക്കുമുള്ള പ്രബോധനവുമുണ്ടായിരുന്നു. അപ്രകാരം ഈ ദഅ്‌വത്ത് മുഖേന അല്ലാഹു മുസ്ലിംകൾക്ക് വലിയ ഉപകാരം ചെയ്തു. സത്യത്തെ സഹായിക്കുകയും അതിൽ ഉറച്ചുനിൽക്കുകയും ചെയ്ത ആലുസഊദിൻ്റെയും മറ്റുള്ളവരുടെയും സഹായത്താൽ ഈ അറേബ്യൻ ഉപദ്വീപിലെ ജനങ്ങളെ അല്ലാഹു ഇതിലൂടെ ഒരുമിപ്പിച്ചു. അവർ അല്ലാഹുവിങ്കലേക്ക് ക്ഷണിക്കുകയും ഈ ദഅ്‌വത്തിനെ സഹായിക്കുകയും ചെയ്തു; അല്ലാഹുവിൻ്റെ ദീനിനെ സഹായിക്കാൻ വേണ്ടി, അല്ലാഹുവിൻ്റെ ഗ്രന്ഥത്തെയും റസൂൽ ﷺ യുടെ സുന്നത്തിനെയും സഹായിക്കാൻ വേണ്ടി. അങ്ങനെ അല്ലാഹു അവരെ സഹായിക്കുകയും അവർക്ക് വിജയങ്ങൾ തുറന്നുകൊടുക്കുകയും ചെയ്തു. കിഴക്ക് മുതൽ പടിഞ്ഞാറ് വരെയും തെക്ക് മുതൽ വടക്ക് വരെയും ഈ അറേബ്യൻ ഉപദ്വീപിലെ ജനങ്ങളെ അല്ലാഹു അവർക്ക് കീഴിൽ സത്യത്തിലും അല്ലാഹുവിൻ്റെ മതത്തിലെ നിയമങ്ങൾ പിൻപറ്റുന്നതിലും അല്ലാഹുവിൻ്റെ ദീനിൽ ഉറച്ചുനിൽക്കുന്നതിലുമായി ഒരുമിപ്പിച്ചു. അതിനാൽ അല്ലാഹുവിന് സർവ്വ സ്തുതിയും.

അതുകൊണ്ട് ഈ അഖീദ മുറുകെപ്പിടിക്കലും, അതിലേക്ക് ക്ഷണിക്കലും, അതിനെ സംരക്ഷിക്കലും ബാധ്യതയാണ്. യുക്തിയോടും, സദുപദേശത്തോടും, വിട്ടുവീഴ്ചയോടും കൂടി ജനങ്ങൾക്കിടയിൽ അത് പ്രചരിപ്പിക്കണം; അല്ലാതെ കാഠിന്യമോ പരുഷതയോ പാടില്ല. അബദ്ധങ്ങളും വ്യതിയാനങ്ങളും സംശയങ്ങളും വ്യക്തമാക്കേണ്ടത് വളരെ സ്പഷ്ടമായിട്ടും, മൃദുലമായിട്ടും യുക്തിയോടുകൂടിയുമാകണം. അവിടെ പരുഷതയോ കഠിനതയോ വളഞ്ഞ വഴികളോ പാടില്ല. മറിച്ച് അല്ലാഹു (جل وعلا) പറഞ്ഞതുപോലെ, വ്യക്തമായ വിവരണവും, വ്യക്തമായ ശൈലിയും, വിട്ടുവീഴ്ചയും യുക്തിയുമാണ് വേണ്ടത്:

ٱدْعُ إِلَىٰ سَبِيلِ رَبِّكَ بِٱلْحِكْمَةِ നിൻ്റെ രക്ഷിതാവിൻ്റെ മാർഗ്ഗത്തിലേക്ക് നീ യുക്തിദീക്ഷയോടുകൂടി ക്ഷണിക്കുക. (അതായത് അറിവുകൊണ്ട്, ‘അല്ലാഹു പറഞ്ഞു, റസൂൽ പറഞ്ഞു’ എന്നതുകൊണ്ട്. ഓരോ കാര്യങ്ങളെയും അതിൻ്റെ യഥാർത്ഥ സ്ഥാനത്ത് വെച്ചുകൊണ്ട്.) وَٱلْمَوْعِظَةِ ٱلْحَسَنَةِ ۖ وَجَـٰدِلْهُم بِٱلَّتِى هِىَ أَحْسَنُ സദുപദേശത്തോട് കൂടിയും (ക്ഷണിക്കുക). ഏറ്റവും നല്ല രീതിയിൽ അവരുമായി സംവാദം നടത്തുകയും ചെയ്യുക. ²¹

നബി ﷺ പറഞ്ഞു:

مَا كَانَ الرِّفْقُ فِي شَيْءٍ إِلَّا زَانَهُ، وَلَا يُنْزَعُ مِنْ شَيْءٍ إِلَّا شَانَهُ

ഏതൊരു കാര്യത്തിലും വിട്ടുവീഴ്ചയുണ്ടാകുമ്പോൾ അതതിനെ അലങ്കരിക്കാതിരിക്കില്ല. ഏതൊരു കാര്യത്തിൽ നിന്നും വിട്ടുവീഴ്ച എടുത്തമാറ്റപ്പെട്ടുവോ അതതിനെ വികൃതമാക്കാതിരിക്കില്ല.²²

അല്ലാഹു അവിടുത്തെ (നബി ﷺ യെ) വിശേഷിപ്പിച്ചത് അവൻ്റെ വചനത്തിൽ ഇപ്രകാരമാണ്:

فَبِمَا رَحْمَةٍ مِّنَ ٱللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ ٱلْقَلْبِ لَٱنفَضُّوا۟ مِنْ حَوْلِكَ

അല്ലാഹുവിങ്കൽ നിന്നുള്ള കാരുണ്യം കൊണ്ടാണ് നീ അവരോട് സൗമ്യനായത്‌. നീ ഒരു പരുഷസ്വഭാവിയും കഠിനഹൃദയനുമായിരുന്നുവെങ്കിൽ നിൻ്റെ ചുറ്റുനിന്നും അവർ പിരിഞ്ഞുപോകുമായിരുന്നു. ²³

അതിനാൽ പ്രബോധകർ ഉൾക്കാഴ്ചയുള്ളവരാകാനും, ജനങ്ങളെ ബോധവൽക്കരിക്കാനും, മൃദുലത കാണിക്കാനും ബാധ്യസ്ഥരാണ്. വ്യക്തവും സ്പഷ്ടവുമായ ശൈലികൾ സ്വീകരിക്കാൻ അവർ ശ്രദ്ധിക്കണം. കഠിനതയും പരുഷതയും അവർ അങ്ങേയറ്റം സൂക്ഷിക്കണം. അതുപോലെ ഇന്ന വ്യക്തിയോടോ അല്ലെങ്കിൽ ഇന്ന കക്ഷിയോടോ ഉള്ള അന്ധമായ പക്ഷപാതിത്വവും ഒഴിവാക്കേണ്ടതുണ്ട്.

ഉപകാരപ്രദമായ അറിവും സത്കർമ്മങ്ങളും നൽകി അല്ലാഹു എല്ലാവരെയും അനുഗ്രഹിക്കട്ടെ. മുഴുവൻ മുസ്ലിംകളുടെയും അവസ്ഥകൾ അവൻ നന്നാക്കിത്തീർക്കുകയും, മതത്തിൽ അവർക്ക് ശരിയായ അവഗാഹം നൽകുകയും ചെയ്യട്ടെ. അവരിലെ ഏറ്റവും ഉത്തമന്മാരായവരെ അവരുടെ ഭരണാധികാരികളാക്കുകയും, അവരുടെ നേതാക്കളെ നന്നാക്കിത്തീർക്കുകയും ചെയ്യട്ടെ. ഈ രാജ്യത്തെ ഭരണാധികാരികളെ അല്ലാഹു അനുഗ്രഹിക്കട്ടെ.

എല്ലാ നന്മകൾക്കും അല്ലാഹു അവർക്ക് തൗഫീഖ് നൽകട്ടെ. അവരിലൂടെ സത്യത്തെ അല്ലാഹു സഹായിക്കട്ടെ. സന്മാർഗ്ഗം പ്രാപിച്ച വഴികാട്ടികളായി അല്ലാഹു അവരെ മാറ്റട്ടെ. അവരുടെ ഉപദേശകരെ അല്ലാഹു അവർക്ക് നന്നാക്കിക്കൊടുക്കുകയും മോശപ്പെട്ട ഉപദേശകരിൽ നിന്നും അവരെ കാത്തുരക്ഷിക്കുകയും ചെയ്യട്ടെ.

എല്ലാ നന്മകൾക്കും ഫളീലത്തുശ്‌ശൈഖ് റബീഅ് അവർകൾക്ക് അല്ലാഹു തൗഫീഖ് നൽകുകയും, അദ്ദേഹത്തിൻ്റെ ഈ വാക്കുകൾക്ക് ഏറ്റവും നല്ല പ്രതിഫലം നൽകുകയും ചെയ്യട്ടെ.

നമ്മുടെ നബി മുഹമ്മദിൻ്റെയും അവിടുത്തെ കുടുംബാംഗങ്ങളുടെയും അനുചരന്മാരുടെയും അവരെ നന്മയിൽ പിൻപറ്റിയവരുടെയും മേൽ അന്ത്യനാൾ വരെ അല്ലാഹുവിൻ്റെ സ്വലാത്തും സലാമും ഉണ്ടായിരിക്കട്ടെ.

1. സൂറത്ത് ആലുഇംറാൻ – 102 ↩︎
2. സൂറത്തുന്നിസാഅ് – 1 ↩︎
3. സൂറത്തുൽ അഹ്സാബ് – 70-71 ↩︎
4. സൂറത്ത് ആലുഇംറാൻ – 103 ↩︎
5. സൂറത്തുന്നിസാഅ് – 59 ↩︎
6. സഹീഹുൽ ബുഖാരി – 4905 ↩︎
7. സഹീഹ് മുസ്ലിം – 1848 ↩︎
8. സഹീഹ് മുസ്ലിം – 1848 ↩︎
9. സുനനു അബീദാവൂദ് – 3597 ↩︎
10. സൂറത്തുന്നിസാഅ് – 59 ↩︎
11. സൂറത്തുശ്ശൂറാ – 10 ↩︎
12. സൂറത്ത് ആലുഇംറാൻ – 103 ↩︎
13. സൂറത്തുത്തൗബ – 100 ↩︎
14. സൂറത്തുന്നിസാഅ് – 65 ↩︎
15. സൂറത്ത് ആലുഇംറാൻ – 31 ↩︎
16. സൂറത്തുൽ ഹശ്ർ – 7 ↩︎
17. സഹീഹുൽ ബുഖാരി – 7137, സഹീഹ് മുസ്ലിം – 1835 ↩︎
18. സഹീഹുൽ ബുഖാരി – 7280 ↩︎
19. സൂറത്തുന്നഹ്ൽ – 43 ↩︎
20. സുനനു അബീദാവൂദ് – 336 ↩︎
21. സൂറത്തുന്നഹ്ൽ – 125 ↩︎
22. സഹീഹ് മുസ്ലിം – 2594 ↩︎
23. സൂറത്ത് ആലുഇംറാൻ – 159 ↩︎