ശൈഖ് ഡോ. മുഹമ്മദ് ഹിശാം അത്ത്വാഹിരി
മുഹമ്മദ് നബി ﷺ യുടെ ദൗത്യത്തെ വിവരിക്കുന്ന ആയത്തിൽ അല്ലാഹു ഇസ്ലാമിന്റെ ലക്ഷ്യങ്ങളും ഉദ്ദേശ്യങ്ങളും വ്യക്തമാക്കുന്നു:
هُوَ الَّذِي بَعَثَ فِي الْأُمِّيِّينَ رَسُولًا مِّنْهُمْ يَتْلُو عَلَيْهِمْ آيَاتِهِ وَيُزَكِّيهِمْ وَيُعَلِّمُهُمُ الْكِتَابَ وَالْحِكْمَةَ وَإِن كَانُوا مِن قَبْلُ لَفِي ضَلَالٍ مُّبِينٍ وَآخَرِينَ مِنْهُمْ لَمَّا يَلْحَقُوا بِهِمْ وَهُوَ الْعَزِيزُ الْحَكِيمُ ذَلِكَ فَضْلُ اللَّهِ يُؤْتِيهِ مَن يَشَاءُ وَاللَّهُ ذُو الْفَضْلِ الْعَظِيمِ
‘അക്ഷരജ്ഞാനമില്ലാത്തവർക്കിടയിൽ അവരിൽ നിന്നുതന്നെയുള്ള ഒരു ദൂതനെ നിയോഗിച്ചവനാണവൻ. അവർക്ക് അവന്റെ വചനങ്ങൾ അദ്ദേഹം ഓതിക്കേൾപ്പിക്കുകയും അവരെ സംസ്കരിക്കുകയും അവർക്ക് വേദവും തത്വജ്ഞാനവും പഠിപ്പിക്കുകയും ചെയ്യുന്നു. തീർച്ചയായും അവർ മുമ്പ് വ്യക്തമായ വഴികേടിലായിരുന്നു. അവരിൽ പെട്ട, അവരോട് വന്നുചേർന്നിട്ടില്ലാത്ത മറ്റുചിലർക്കും അദ്ദേഹത്തെ നിയോഗിച്ചിരിക്കുന്നു. അവൻ പ്രതാപിയും യുക്തിമാനുമാകുന്നു. അത് അല്ലാഹുവിന്റെ അനുഗ്രഹമാണ്. അവൻ ഉദ്ദേശിക്കുന്നവർക്ക് അവനത് നൽകുന്നു. അല്ലാഹു മഹത്തായ അനുഗ്രഹമുള്ളവനാകുന്നു.’¹
അല്ലാഹു വീണ്ടും പറയുന്നു:
رُّسُلًا مُّبَشِّرِينَ وَمُنذِرِينَ لِئَلَّا يَكُونَ لِلنَّاسِ عَلَى اللَّهِ حُجَّةٌ بَعْدَ الرُّسُلِ وَكَانَ اللَّهُ عَزِيزًا حَكِيمًا
‘സന്തോഷവാർത്ത അറിയിക്കുന്നവരും താക്കീത് നൽകുന്നവരുമായ ദൂതന്മാരെയാണ് അയച്ചത്. ദൂതന്മാർക്ക് ശേഷം അല്ലാഹുവിനെതിരിൽ ആളുകൾക്ക് യാതൊരു ന്യായവും ഇല്ലാതിരിക്കാൻ വേണ്ടി. അല്ലാഹു പ്രതാപിയും യുക്തിമാനുമാകുന്നു.’²
അല്ലാഹു വീണ്ടും പറയുന്നു:
يَا أَهْلَ الْكِتَابِ قَدْ جَاءَكُمْ رَسُولُنَا يُبَيِّنُ لَكُمْ عَلَى فَتْرَةٍ مِّنَ الرُّسُلِ أَن تَقُولُوا مَا جَاءَنَا مِن بَشِيرٍ وَلَا نَذِيرٍ فَقَدْ جَاءَكُم بَشِيرٌ وَنَذِيرٌ وَاللَّهُ عَلَى كُلِّ شَيْءٍ قَدِيرٌ
‘വേദക്കാരേ, ദൂതന്മാർ വരാതിരുന്ന ഒരു ഇടവേളയ്ക്ക് ശേഷം നിങ്ങൾക്ക് കാര്യങ്ങൾ വിശദീകരിച്ചുതന്നുകൊണ്ട് ഇതാ നമ്മുടെ ദൂതൻ നിങ്ങളുടെ അടുക്കൽ വന്നിരിക്കുന്നു. ഞങ്ങൾക്ക് സന്തോഷവാർത്ത അറിയിക്കുന്നവനോ താക്കീതുകാരനോ വന്നിട്ടില്ല എന്ന് നിങ്ങൾ പറഞ്ഞേക്കാം എന്നതിനാലാണിത്. എന്നാൽ ഇതാ നിങ്ങൾക്ക് സന്തോഷവാർത്ത അറിയിക്കുന്നവരും താക്കീതുകാരനും വന്നിരിക്കുന്നു. അല്ലാഹു ഏതു കാര്യത്തിനും കഴിവുള്ളവനാകുന്നു.’³
അല്ലാഹു വീണ്ടും പറയുന്നു:
يَا أَهْلَ الْكِتَابِ قَدْ جَاءَكُمْ رَسُولُنَا يُبَيِّنُ لَكُمْ كَثِيرًا مِّمَّا كُنتُمْ تُخْفُونَ مِنَ الْكِتَابِ وَيَعْفُو عَن كَثِيرٍ قَدْ جَاءَكُم مِّنَ اللَّهِ نُورٌ وَكِتَابٌ مُّبِينٌ يَهْدِي بِهِ اللَّهُ مَنِ اتَّبَعَ رِضْوَانَهُ سُبُلَ السَّلَامِ وَيُخْرِجُهُم مِّنَ الظُّلُمَاتِ إِلَى النُّورِ بِإِذْنِهِ وَيَهْدِيهِمْ إِلَى صِرَاطٍ مُّسْتَقِيمٍ
‘വേദക്കാരേ, വേദഗ്രന്ഥത്തിൽ നിന്ന് നിങ്ങൾ ഒളിച്ചുവെച്ചിരുന്ന പല കാര്യങ്ങളും നിങ്ങൾക്ക് വെളിപ്പെടുത്തിത്തരികയും, പല കാര്യങ്ങളും വിട്ടുകളയുകയും ചെയ്തുകൊണ്ട് ഇതാ നമ്മുടെ ദൂതൻ നിങ്ങളുടെ അടുക്കൽ വന്നിരിക്കുന്നു. അല്ലാഹുവിങ്കൽ നിന്ന് ഒരു പ്രകാശവും വ്യക്തമായ ഒരു ഗ്രന്ഥവും നിങ്ങൾക്ക് വന്നുകിട്ടിയിരിക്കുന്നു. അല്ലാഹു തന്റെ പൊരുത്തം പിൻപറ്റിയവരെ അതുമുഖേന സമാധാനത്തിന്റെ വഴികളിലേക്ക് നയിക്കുന്നു. തന്റെ അനുമതിപ്രകാരം അന്ധകാരങ്ങളിൽ നിന്ന് അവരെ പ്രകാശത്തിലേക്ക് അവൻ പുറത്തുകൊണ്ടുവരികയും, നേരായ പാതയിലേക്ക് അവരെ നയിക്കുകയും ചെയ്യുന്നു.’⁴
ഈ ആയത്തുകളിൽ, ഇസ്ലാമിന്റെ മഹത്തായ ലക്ഷ്യങ്ങൾ വ്യക്തമാണ്, അവയിൽ ഏറ്റവും പ്രധാനപ്പെട്ടവ ഇവയാണ്:
- നിരക്ഷരതയിൽ നിന്ന് വിജ്ഞാനത്തിന്റെ മേഖലയിലേക്ക് ആളുകളെ പുറത്തുകൊണ്ടുവരിക; അവിടെ അവർ അല്ലാഹുവിന്റെ ഗ്രന്ഥം പാരായണം ചെയ്യുകയും പഠിക്കുകയും പഠിപ്പിക്കുകയും ചെയ്യുന്നു. അതുകൊണ്ടാണ് അവതരിപ്പിക്കപ്പെട്ട ആദ്യ വചനങ്ങൾ തന്നെ വായന, എഴുത്ത്, ചിന്ത, പഠനം എന്നിവ നിർദ്ദേശിച്ചത്.
- ആളുകളുടെ ധാർമ്മികതയെ മാലിന്യങ്ങളിൽ നിന്ന് ശുദ്ധീകരിച്ച് അവരെ സംസ്കരിക്കുക, കുടുംബ പ്രശ്നങ്ങൾ പരിഹരിക്കുക, സമൂഹങ്ങൾക്കിടയിൽ ബന്ധം വളർത്തുക, അവരെ സ്വാർത്ഥതയിൽ നിന്ന് മോചിപ്പിക്കുക.
- പിശാചിന്റെ അടിമത്തത്തിൽ നിന്നും സ്വന്തം ഇച്ഛകളിൽ നിന്നും ആളുകളെ പുറത്തുകൊണ്ടുവരിക; അതുവഴി അധികാര മോഹങ്ങൾക്കും സ്വാർത്ഥ താല്പര്യങ്ങൾക്കും സുഖസൗകര്യങ്ങൾക്കും അടിമകളാകുന്നതിൽ നിന്ന് ആത്മാവുകളെ പരിഷ്കരിക്കുകയും ശുദ്ധീകരിക്കുകയും ചെയ്യുക.
- നിർണ്ണായകമായ തെളിവ് സ്ഥാപിക്കുക; പ്രവാചകന്മാർ ഇല്ലാതിരുന്ന കാലഘട്ടത്തിലാണ് മുഹമ്മദ് നബി ﷺ യുടെ ദൗത്യം ആരംഭിച്ചത്. അതിനാൽ ഈ ഇടവേള അവസാനിപ്പിക്കുന്നതിനും വേദക്കാർക്കും മറ്റുള്ളവർക്കുമെതിരായി തെളിവ് സ്ഥാപിക്കുന്നതിനുമായാണ് പ്രവാചകൻ നിയോഗിക്കപ്പെട്ടത്. തങ്ങളിൽ നിന്ന് വ്യതിചലിച്ചവർക്കെതിരെ അല്ലാഹുവിന്റെ റസൂൽ തെളിവ് സ്ഥാപിച്ചു; അതുവഴി വഴിപിഴക്കുന്നതിനോ മറ്റുള്ളവരെ വഴിപിഴപ്പിക്കുന്നതിനോ ആർക്കും യാതൊരു ഒഴിവുകഴിവും ഉണ്ടാകില്ല.
- അല്ലാഹുവിനും അവന്റെ ദൂതന്മാർക്കും പ്രവാചകന്മാർക്കുമെതിരെയും, അല്ലാഹുവിന്റെ മതത്തിനും അവനെ ആരാധിക്കുന്നതിനുമെതിരെയുമുണ്ടായ വ്യതിയാനങ്ങളെ തുറന്നുകാട്ടുക.
- ആളുകൾക്കിടയിൽ ഐക്യദാർഢ്യവും കാരുണ്യവും വളർത്തുക, വംശീയ വിഭജനങ്ങൾ ഇല്ലാതാക്കുക, വ്യക്തികളും സമൂഹങ്ങളും തമ്മിലുള്ള ബന്ധം പരിപോഷിപ്പിക്കുക; അതുവഴി വിശ്വാസികൾ തങ്ങളുടെ രാജ്യങ്ങൾ തമ്മിലുള്ള ദൂരമോ വംശപാരമ്പര്യങ്ങളിലെ വ്യത്യാസങ്ങളോ പരിഗണിക്കാതെ സഹോദരന്മാരായി മാറുന്നു. അങ്ങനെ, എല്ലാ ദൂതന്മാരും ഈ മഹത്തായ കാര്യത്തെക്കുറിച്ചുള്ള സന്തോഷവാർത്ത അറിയിക്കുന്നവരും മുന്നറിയിപ്പുകാരുമായി വന്നു.
അല്ലാഹു പറയുന്നു:
رُّسُلًا مُّبَشِّرِينَ وَمُنذِرِينَ لِئَلَّا يَكُونَ لِلنَّاسِ عَلَى اللَّهِ حُجَّةٌ بَعْدَ الرُّسُلِ وَكَانَ اللَّهُ عَزِيزًا حَكِيمًا
‘സന്തോഷവാർത്ത അറിയിക്കുന്നവരും താക്കീത് നൽകുന്നവരുമായ ദൂതന്മാരെയാണ് അയച്ചത്. ദൂതന്മാർക്ക് ശേഷം അല്ലാഹുവിനെതിരിൽ ആളുകൾക്ക് യാതൊരു ന്യായവും ഇല്ലാതിരിക്കാൻ വേണ്ടി. അല്ലാഹു പ്രതാപിയും യുക്തിമാനുമാകുന്നു.’⁵
നബി ﷺ പറഞ്ഞു:
لَا تَحَاسَدُوا، وَلَا تَنَاجَشُوا، وَلَا تَبَاغَضُوا، وَلَا تَدَابَرُوا، وَلَا يَبِعْ بَعْضُكُمْ عَلَى بَيْعِ بَعْضٍ، وَكُونُوا عِبَادَ اللهِ إِخْوَانًا، الْمُسْلِمُ أَخُو الْمُسْلِمِ؛ لَا يَظْلِمُهُ، وَلَا يَخْذُلُهُ، وَلَا يَحْقِرُهُ، التَّقْوَى هَاهُنَا. وَيُشِيرُ إِلَى صَدْرِهِ ثَلَاثَ مَرَّاتٍ، بِحَسْبِ امْرِئٍ مِنَ الشَّرِّ أَنْ يَحْقِرَ أَخَاهُ الْمُسْلِمَ، كُلُّ الْمُسْلِمِ عَلَى الْمُسْلِمِ حَرَامٌ؛ دَمُهُ، وَمَالُهُ، وَعِرْضُهُ
‘നിങ്ങൾ പരസ്പരം അസൂയപ്പെടരുത്, വിലകൂട്ടി ലേലം വിളിക്കരുത്, പരസ്പരം വെറുക്കരുത്, പരസ്പരം പിന്തിരിഞ്ഞുനിൽക്കരുത്, നിങ്ങൾ പരസ്പരം കച്ചവടത്തിന് മീതെ കച്ചവടം ചെയ്യരുത്, അല്ലാഹുവിന്റെ ദാസന്മാരായിക്കൊണ്ട് നിങ്ങൾ സഹോദരന്മാരാകുക. ഒരു മുസ്ലിം മറ്റൊരു മുസ്ലിമിന്റെ സഹോദരനാണ്: അവൻ അവനെ ഉപദ്രവിക്കുകയോ, അവനെ കൈവിടുകയോ, അവനെ നിസ്സാരനാക്കുകയോ ഇല്ല. തഖ്വ ഇവിടെയാണ്.’ തന്റെ നെഞ്ചിലേക്ക് മൂന്ന് തവണ ചൂണ്ടിക്കൊണ്ട് നബി ﷺ ഇത് പറഞ്ഞു. ‘തന്റെ മുസ്ലിമായ സഹോദരനെ നിസ്സാരനാക്കുക എന്നത് തന്നെ ഒരാൾക്ക് മതിയായ തിന്മയാണ്. ഓരോ മുസ്ലിമിനും മറ്റൊരു മുസ്ലിം പവിത്രമാണ്: അവന്റെ രക്തവും അവന്റെ സമ്പത്തും അവന്റെ അഭിമാനവും.’⁶
- ജനങ്ങളിൽ നിന്ന് അടിച്ചമർത്തൽ നീക്കുക. അനീതി അതിന്റെ മൂന്ന് രൂപങ്ങളിലും നിരോധിക്കപ്പെട്ടിരിക്കുന്നു: അല്ലാഹുവിന് പങ്കുകാരെ ചേർക്കുന്ന ശിർക്ക് എന്ന അനീതി, മറ്റുള്ളവരോട് അതിക്രമം കാണിക്കുന്ന അനീതി, തന്നോട് തന്നെ അനീതി ചെയ്യുന്ന അതിക്രമം.
അല്ലാഹു പറയുന്നു:
إِنَّ اللَّهَ لَا يَظْلِمُ النَّاسَ شَيْئًا وَلَكِنَّ النَّاسَ أَنفُسَهُمْ يَظْلِمُونَ
‘തീർച്ചയായും അല്ലാഹു ജനങ്ങളോട് ഒട്ടും അനീതി കാണിക്കുകയില്ല. എന്നാൽ ജനങ്ങൾ അവരോട് തന്നെ അനീതി കാണിക്കുകയാണ് ചെയ്യുന്നത്.’⁷
നബി ﷺ പറഞ്ഞു:
اتَّقُوا الظُّلْمَ؛ فَإِنَّ الظُّلْمَ ظُلُمَاتٌ يَوْمَ الْقِيَامَةِ، وَاتَّقُوا الشُّحَّ؛ فَإِنَّ الشُّحَّ أَهْلَكَ مَنْ كَانَ قَبْلَكُمْ، وَحَمَلَهُمْ عَلَى أَنْ سَفَكُوا دِمَاءَهُمْ، وَاسْتَحَلُّوا مَحَارِمَهُمْ
‘നിങ്ങൾ അനീതിയെ സൂക്ഷിക്കുക, കാരണം അന്ത്യനാളിൽ അനീതി അന്ധകാരമായിരിക്കും. നിങ്ങൾ അത്യാഗ്രഹത്തെയും സൂക്ഷിക്കുക, കാരണം നിങ്ങൾക്ക് മുമ്പുള്ളവരെ അത് നശിപ്പിച്ചിട്ടുണ്ട്; രക്തം ചിന്താനും നിരോധിക്കപ്പെട്ടവ അനുവദനീയമാക്കാനും അതവരെ പ്രേരിപ്പിച്ചു.’⁸
- സൃഷ്ടികൾക്കിടയിൽ കാരുണ്യം സ്ഥാപിക്കുക, അതിൽ ഏറ്റവും ശ്രേഷ്ഠമായ രൂപം അല്ലാഹു കരുണാനിധികളിൽ വെച്ച് ഏറ്റവും വലിയ കരുണാനിധിയാണെന്ന തിരിച്ചറിവാണ്. അതിനാൽ, മറ്റുള്ളവരോട് കാരുണ്യവും ദയയും കാണിക്കാൻ നാം ബാധ്യസ്ഥരാണ്.
പ്രതികാരത്തെക്കുറിച്ചുള്ള ആയത്തുകളിൽ അല്ലാഹു പറയുന്നു:
فَمَنْ عُفِيَ لَهُ مِنْ أَخِيهِ شَيْءٌ فَاتِّبَاعٌ بِالْمَعْرُوفِ وَأَدَاءٌ إِلَيْهِ بِإِحْسَانٍ ذَلِكَ تَخْفِيفٌ مِّن رَّبِّكُمْ وَرَحْمَةٌ فَمَنِ اعْتَدَى بَعْدَ ذَلِكَ فَلَهُ عَذَابٌ أَلِيمٌ وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ
‘എന്നാൽ അവന് കൊലയാളിക്ക് തന്റെ സഹോദരന്റെ പക്ഷത്തുനിന്ന് വല്ല ഇളവും നൽകപ്പെടുന്ന പക്ഷം അവൻ മര്യാദ പാലിക്കുകയും, നല്ല നിലയിൽ അവന് നഷ്ടപരിഹാരം കൊടുത്തുതീർക്കുകയും ചെയ്യേണ്ടതാണ്. നിങ്ങളുടെ രക്ഷിതാവിങ്കൽ നിന്നുള്ള ഇളവും കാരുണ്യവുമാകുന്നു അത്. അതിനു ശേഷവും ആരെങ്കിലും അതിക്രമം കാണിച്ചാൽ അവന് വേദനയേറിയ ശിക്ഷയുണ്ട്. ബുദ്ധിമാന്മാരെ, പ്രതികാര നടപടിയിലാണ് നിങ്ങൾക്ക് ജീവിതമുള്ളത്. നിങ്ങൾ സൂക്ഷ്മതയുള്ളവരാകാൻ വേണ്ടിയാണിത്.’⁹
നബി ﷺ പറഞ്ഞു:
الرَّاحِمُونَ يَرْحَمُهُمُ الرَّحْمَنُ، ارْحَمُوا أَهْلَ الْأَرْضِ يَرْحَمْكُمْ مَنْ فِي السَّمَاءِ، الرَّحِمُ شِجْنَةٌ مِنَ الرَّحْمَنِ، فَمَنْ وَصَلَهَا وَصَلَهُ اللهُ، وَمَنْ قَطَعَهَا قَطَعَهُ اللهُ
‘കരുണ കാണിക്കുന്നവരോട് പരമകാരുണികൻ കരുണ കാണിക്കും. ഭൂമിയിലുള്ളവരോട് നിങ്ങൾ കരുണ കാണിക്കുക, ആകാശത്തിലുള്ളവൻ നിങ്ങളോട് കരുണ കാണിക്കും. കുടുംബബന്ധം പരമകാരുണികനിൽ നിന്ന് ഉരുത്തിരിഞ്ഞതാണ്. ആരെങ്കിലും കുടുംബബന്ധം ചേർക്കുന്ന പക്ഷം അല്ലാഹു അവനുമായി ബന്ധം ചേർക്കുന്നതാണ്, ആരെങ്കിലും കുടുംബബന്ധം മുറിക്കുന്ന പക്ഷം അല്ലാഹു അവനുമായുള്ള ബന്ധം മുറിക്കുന്നതുമാണ്.’¹⁰
നബി ﷺ യുടെ അനുചരന്മാരിൽ പെട്ട ഒരാൾ ഒരു നിവേദനത്തിൽ ഇപ്രകാരം പറഞ്ഞതായി കാണാം:
يَا رَسُولَ اللَّهِ! إِنِّي لَأَذْبَحُ الشَّاةَ فَأَرْحَمُهَا، أَوْ قَالَ: إِنِّي لَأَرْحَمُ الشَّاةَ أَنْ أَذْبَحَهَا. قَالَ: وَالشَّاةُ إِنْ رَحِمْتَهَا، رَحِمَكَ الله مَرَّتَيْنِ.
‘അദ്ദേഹം പറഞ്ഞു: അല്ലാഹുവിന്റെ ദൂതരേ! ഞാൻ ആടിനെ അറുക്കുന്നതിന് മുമ്പ് അതിനോട് കരുണ കാണിക്കാറുണ്ട്, അല്ലെങ്കിൽ അദ്ദേഹം പറഞ്ഞു, അറുക്കുമ്പോൾ ഞാൻ ആടിനോട് കരുണ കാണിക്കാറുണ്ട്, അതിനാൽ അതിനെ അറുക്കാൻ ഞാൻ മടിക്കുന്നു. അപ്പോൾ നബി ﷺ മറുപടി പറഞ്ഞു: നീ ആടിനോട് കരുണ കാണിച്ചാൽ അല്ലാഹു നിന്നോടും കരുണ കാണിക്കും. ഇത് രണ്ട് തവണ ആവർത്തിച്ചു.’¹¹
- അൽജുമുഅ 62:2-4.
- അന്നിസാഅ് 4:165.
- അൽമാഇദ 5:19.
- അൽമാഇദ 5:15-16.
- അന്നിസാഅ് 4:165.
- അബൂ ഹുറൈറയിൽ നിന്ന് മുസ്ലിം റിപ്പോർട്ട് ചെയ്തത്, ഇബ്നു ഉമറിൽ നിന്ന് ബുഖാരിയിലും മുസ്ലിമിലുമായി സമാനമായ നിവേദനം കാണാം.
- യൂനുസ് 10:44.
- അൽ ബുഖാരി അൽ അദബുൽ മുഫ്റദിൽ റിപ്പോർട്ട് ചെയ്തത്, ഇതൊരു സ്വഹീഹായ ഹദീസാണ്.
- അൽബഖറ 2:178-179.
- അബൂ ദാവൂദും അത്തിർമിദിയും റിപ്പോർട്ട് ചെയ്തത്, ഇതിലെ പദപ്രയോഗം അബ്ദുല്ലാഹ് ബിൻ അംറിൽ നിന്ന് അത്തിർമിദി രേഖപ്പെടുത്തിയതാണ്. അത്തിർമിദി ഇതിനെ ഹസൻ സ്വഹീഹ് എന്ന് രേഖപ്പെടുത്തിയിരിക്കുന്നു.
- അൽ ബുഖാരി അൽ അദബുൽ മുഫ്റദിൽ റിപ്പോർട്ട് ചെയ്തത്, അൽ അൽബാനി ഇതിനെ സ്വഹീഹാക്കിയിട്ടുണ്ട്.
